ބާސެލޯނާ އާއި ރެއާލް މެޑްރިޑްގެ ރައީސުންގެ މެދުގައި އަނެއްކާވެސް ބަހުގެ ހަމަލާތައް ބަދަލުކުރަން ފަށައިއެވެ.

މި ދެމެދުގައި އުފެދުނު ނުތަނަވަސްކަން ފެށުނީ ރެއާލް މެޑްރިޑްގެ އެސެމްބްލީގައި ވާހަކަ ދައްކަވަމުން ފްލޮރެންޓީނޯ ޕެރޭޒް، ބާސެލޯނާގެ ކުރީގެ ކާމިޔާބީތައް އައިސްފައިވަނީ ކުރީގެ ރެފްރީންގެ ވެރިޔާ ނެގްރޭރާއަށް ދިން “ފައިސާ”ގެ ސަބަބުން ކަމަށް ވިދާޅުވުމުންނެވެ. ޕެރޭޒް މިވާހަކަ ނިސްބަތް މިކުރަނީ ބާސެލޯނާގެ އެންމެ ކާމިޔާބު ދުވަސްވަރުގައި ރެފްރީންނަށް ރިޝްވަތު ދިންކަމަށް ތުހުމަތުކޮށް މިހާރު ސްޕެއިންގެ ކޯޓުތަކުގައި ބާސެލޯނާއާ ދެކޮޅަށް ކުރާ ދަޢުވާތަކާގުޅިގެންނެވެ.

Ad by Hajj Corporation

މިބަޔާނާއި ގުޅިގެން ބާސެލޯނާގެ ރަީސް މިވަނީ ޕެރޭޒް އައި ރެއާލް މެޑްރިޑްއަށް ނިސްބަތްކޮށް ހޫނު ބަހުގެ ހަމަލާތަކެއް ފޮނުވާލާފައެވެ.

ލަޕޯޓާ ވަނީ ވަގުތުން ރައްދު ދެއްވާ، މެޑްރިޑްގެ ކިބައިގައި “ބާސާ އަށް ޝައުޤުވެރިކަން ބޮޑުވުމުގެ” ބަލިމަޑުކަމެއް ހުރިކަމަށްބުނެ، އަދި ބާސާއިން ދުވަހަކުވެސް ރެފްރީއަކަށް ރިޝްވަތު ނުދޭ ކަމަށް ވިދާޅުވިއެވެ. އޭނާ އިތުރަށް ވިދާޅުވީ ރެފްރީން “އަބަދުވެސް މެޑްރިޑަށް ފައިދާވާ ގޮތަށް ކަންތައް ކުރާ” ކަމަށާއި، އެގޮތުންއެންމެ ފަހުން ލީގުގައި ކުޅުނު މެޗުގައިވެސް ރެއާލް ޖެހި ދެގޯލު ބާތިލު ކުރަން ޖެހޭ ކަމަށް އޭނާ ދަޢުވާ ކުރެއްވިއެވެ. ލަޕޯޓާ ވިދާޅުވި ގޮތުގައި، “އެ ގޯލްތައް ނުޖެހުނު ނަމަ، ލީގުގެ އެއްވަނައިގައި އޮންނާނީ ބާސާ” އެވެ – މިއީ ކޮންމެ ބާސެލޯނާ ފޭނެއްގެ ހިތުގައިވެސް ލިޔެވިފައިވާ ޖުމްލައެކެވެ.

މީގެ އިތުރުން ލަޕޯޓާ ވަނީ ރެއާލް މެޑްރިޑް ޓީވީ އިން “ކޮންމެ ހަފްތާއަކު ރެފްރީންނަށް ނުފޫޒު ފޯރުވާ” ކަމަށް ތުހުމަތު ކުރައްވާފައެވެ. އަދި މިކަންކަން ހަމއަކަށް އެޅުވުމަށް ލަލީގާގެ ރައީސް ޖޭވިއަރ ޓެބާސްކުރާ މަސައްކަތް ދިފާޢުކޮށް ވާހަކަ ދައްކާފައިވެއެވެ. ލަޕޯޓާ ވަނީ މެޑްރިޑްގެ ބޮޑު އެދުމަކީ ޓެބާސް ބަދަލުކުރުން ކަމަށް ވިދާޅުވެ، “އެމީހުން ރާވާ އެއްވެސް ސްޓްރެޓެޖީއަކަށް އޭނާ އިތުބާރު ނުކުރައްވާ” ކަމަށް ވިދާޅުވެފައެވެ.

ބާސެލޯނާއާ ރެއާލް މެޑްރިޑް ފާހަގަވެގެންދަނީ ދަނޑު މަތީގެ އިތުރުން ދަނޑުން ބޭރުގައިވެސް ވާދަވެރި ދެޓީމުގެ ގޮތުގައެވެ. މި ވާދަވެރިކަމުގެ އަސްލަކީ މީގެ އެތަކެއް އަހަރުތަކެއް ކުރިންފެށިގެން މެޑްރިޑްގެ މައި ސަރުކާރުން ބާސެލޯނާ ނިސްބަތްވާ ކެޓަލޯނިއާ ސަރަހައްދު އިސްތިއުމާރުކޮށްފައި އޮތް އޮތުމެވެ. މިވާދައިގެ ހޫނުގައި މީގެ ކުރިންވެސް ދަނޑުމަތިންނާއި ދަނޑު ބޭރުން ދެފަރާތުންވަނީ ގިނަ ހަމަލާތަކެއް ބަދަލުކޮށްފައެވެ.