ލަލީގާގައި ހޮނިހިރު ދުވަހުގެ ރޭ އެތުލެޓިކް ކްލަބާ ދެކޮޅަށް ކުޅުނު މެޗު 1-0 އިން ކާމިޔާބުކޮށް، ބާސެލޯނާއިން ތާވަލުގެ އެއްވަނައިގައި އޮތް ލީޑު އަލުން ހަތަރު ޕޮއިންޓަށް އިތުރުކޮށްފިއެވެ. މި މެޗުގައި ބާސެލޯނާގެ ހަމައެކަނި ލަނޑު ކާމިޔާބުކޮށްދިނީ ޒުވާން ތަރި ލަމީން ޔަމާލްއެވެ.

ރެއާލް މެޑްރިޑުން ސެލްޓާ ވިގޯ އަތުން ހޯދި މޮޅާއެކު ޕޮއިންޓުގެ ފަރަގު ކުޑަކޮށްފައި ވަނިކޮށް، ހަންސީ ފްލިކްގެ ޓީމުން ވަނީ މި މޮޅާއެކު އަލުން ވާދަވެރި ރެއާލްއާ ދެމެދު އޮތް ފަރަގު ބޮޑުކޮށްފައެވެ. ސެން މަމޭސް ސްޓޭޑިއަމްގައި ކުޅުނު މި މެޗުގެ ފުރަތަމަ މިނެޓުގައި އެތުލެޓިކް ކްލަބަށް ލީޑު ނެގުމަށް ރަނގަޅު ފުރުސަތެއް ލިބުނު ނަމަވެސް، ޔާއޯ ކަންސޭލޯ ދިފާއުކުރަން އުޅުނު ބޯޅައެއް ވަނީ ގޯލުގެ ހުރަސް ދަނޑީގައި ޖެހިފައެވެ.

Ad by Hajj Corporation

މެޗުގެ ފުރަތަމަ ހާފުގައި ބާސެލޯނާއަށް ގިނަ ފުރުސަތުތަކެއް އުފެއްދިފައި ނުވާއިރު، ފެރާން ޓޮރޭޒް ފޮނުވާލި ހަމަލާއެއް ވަނީ ގޯލުގެ ދަނޑިއަށް އަމާޒުވެފައެވެ. މީގެ އިތުރުން މާކަސް ރަޝްފޯޑް ފޮނުވާލި ނުރައްކާތެރި ހަމަލާއެއް އެތުލެޓިކްގެ ކީޕަރު އުނާއި ސިމޯން ވަނީ ދިފާއުކޮށްފައެވެ.

ބާސެލޯނާއިން މެޗުގެ ލީޑު ނެގީ 68 ވަނަ މިނެޓުގައެވެ. އޭރިއާ ތެރެއިން ލިބުނު ފުރުސަތެއްގައި ލަމީން ޔަމާލް ވަނީ ވަރަށް ރީތިކޮށް ބޯޅަ ގޯލުގެ ތެރެއަށް ފޮނުވާލާފައެވެ. މިއީ މި ސީޒަނުގެ ލީގުގައި އޭނާ ކާމިޔާބުކުރި 14 ވަނަ ލަނޑެވެ. މިއާއެކު އޭނާ ވެފައިވަނީ މި ސީޒަނުގައި ބާސެލޯނާއަށް އެންމެ ގިނަ ލަނޑު ޖަހައިދިން ކުޅުންތެރިޔާއަށެވެ.

އެތުލެޓިކް ކްލަބުން މެޗުގެ ފަހުކޮޅު ނަތީޖާ ހަމަހަމަ ކުރުމަށް ގިނަ މަސައްކަތްތަކެއް ކުރިއެވެ. އެގޮތުން އޮއިހާން ސަންސެޓަށް ލިބުނު ފުރުސަތު ފާހަގަކޮށްލެވެއެވެ. ނަމަވެސް ބާސެލޯނާގެ ޑިފެންސްލައިނުން ވަނީ އެތުލެޓިކްގެ ހަމަލާތައް ހުއްޓުވައި، ތިން ޕޮއިންޓް ކަށަވަރުކޮށްފައެވެ.

މި މޮޅާއެކު ބާސެލޯނާއިން ވަނީ 2015 އާއި 2017 އާ ދެމެދު ހެދި ރެކޯޑަށްފަހު، ފުރަތަމަ ފަހަރަށް އެތުލެޓިކް ކްލަބުގެ ދަނޑުގައި ޖެހިޖެހިގެން ދެ މެޗުން މޮޅުވެފައެވެ. މިއީ އެތުލެޓިކްގެ ކޯޗު އާނެސްޓޯ ވަލްވާޑޭގެ ކެރިއަރުގައި ބާސެލޯނާ އަތުން ބަލިވި 16 ވަނަ ފަހަރެވެ.