ވޯލްޑް ކަޕްގައި ސްޕެއިނުން ކުޅުނު ދެވަނަ މެޗުގައި ސައުދީ އަރަބިއްޔާގެ މައްޗަށް 4-0 ގެ ތަފާތު ބޮޑު ނަތީޖާއަކުން ކުރިހޯދައި، އެޓީމުން މުބާރާތުގެ އުއްމީދުތައް އާކޮށްފިއެވެ. މެޗުގެ ފުރަތަމަ ހާފުގައި މިކޭލް އޮޔަރްޒަބަލް އާއި ލަމީން ޔަމާލް ދެއްކި މޮޅު ކުޅުމާއެކު ސްޕެއިން މިހާރު އޮތީ ގްރޫޕް އެޗްގެ އެއްވަނައިގައެވެ.

މެޗުގެ ފުރަތަމަ ލަނޑު 10 ވަނަ މިނެޓުގައި ކާމިޔާބުކޮށްދިނީ އުމުރުން އެންމެ 18 އަހަރުގެ ލަމީން ޔަމާލްއެވެ. މިއީ ވޯލްޑް ކަޕެއްގައި އޭނާ ފުރަތަމަ އެގާރައިގައި ހިމެނިގެން ކުޅުނު ފުރަތަމަ މެޗެވެ. އޮޔަރްޒަބަލް ނަގައިދިން ހުރަހަކުން ޔަމާލް މި ލަނޑު ޖެހިއިރު، އޭނާ ވެފައިވަނީ ވޯލްޑް ކަޕެއްގައި ސްޕެއިނަށް ލަނޑު ޖަހައިދިން ދެވަނަ ޓީނޭޖު ކުޅުންތެރިޔާއަށެވެ.

Ad by Hajj Corporation

ފުރަތަމަ މެޗުގައި ކޭޕް ވާޑްއާ ދެކޮޅަށް ދެއްކި ފެންވަރު ދަށް ކުޅުމުގެ ސަބަބުން ފާޑުކިޔުން އަމާޒުވި އޮޔަރްޒަބަލް ވަނީ މި މެޗުގައި ތަފާތު ދައްކާފައެވެ. އޭނާ ވަނީ ތިން މިނެޓުގެ ތެރޭގައި ދެ ލަނޑު ޖަހައި ސްޕެއިނަށް މެޗުގެ ކޮންޓްރޯލް ހޯދައިދީފައެވެ. މެޗުގެ ފުރަތަމަ 25 މިނެޓުގެ ތެރޭގައި ތިން ލަނޑުގައި (ދެ ލަނޑާއި އެއް އެސިސްޓް) ބައިވެރިވެ، އޭނާ ވަނީ 1966 ގެ ފަހުން ވޯލްޑް ކަޕް މެޗެއްގެ ފެށުމުގައި މިފަދަ ކާމިޔާބީއެއް ހޯދި ދެވަނަ ކުޅުންތެރިޔާގެ ޝަރަފް ހޯދާފައެވެ.

ސްޕެއިންގެ ހަތަރުވަނަ ލަނޑަކީ ދެވަނަ ހާފު ފެށިގެން ހަތަރުވަނަ މިނެޓުގައި ސައުދީގެ ހަސަން އަލް ތަމްބަކްތީ އަތުން ބައިކޮޅަށް ވަން ލަނޑެކެވެ. މާކް ކުކުރެއްލާ ފޮނުވާލި ހަމަލާއެއް ސައުދީ ކީޕަރު މުހައްމަދު އަލް އޮވައިސް ދިފާއުކުރި ނަމަވެސް، އެ ބޯޅަ ތަމްބަކްތީގެ ގައިގައި ޖެހިފައި ގޯލުގެ ތެރެއަށް ވަނީއެވެ.

މެޗުގެ ފަހުބައިގައި ޕެޑްރޯ ޕޯރޯ އާއި ފެރާން ޓޮރޭޒްއަށް ލަނޑު ޖަހާނެ ރަނގަޅު ފުރުސަތުތަކެއް ލިބުނު ނަމަވެސް، ސައުދީ ކީޕަރު ވަނީ އެ ހަމަލާތައް ހުއްޓުވާފައެވެ. އަދި އިތުރު ވަގުތުގައި ޓޮރޭޒް ޖެހި ލަނޑެއް ވީއޭއާރު ބެލުމަށްފަހު އޮފްސައިޑް ކަމަށް ނިންމާފައިވެއެވެ.

މި މޮޅާއެކު ސްޕެއިން ވަނީ ކުރިއަށް އޮތް ބުރަށް ދިއުމުގެ އުއްމީދު ބޮޑުކޮށްފައެވެ. ހާއްސަކޮށް 2025 ވަނަ އަހަރު ފެށުނީއްސުރެ 14 މެޗުން 21 ލަނޑުގައި ބައިވެރިވެފައިވާ އޮޔަރްޒަބަލްގެ ފޯމަކީ ސްޕެއިންގެ ކޯޗު ލުއިސް ޑެ ފުއެންޓޭއަށް ލިބޭނެ ބޮޑު ހިތްހަމަޖެހުމެކެވެ.