ކޮޕާ ޑެލް ރޭ ސެމީ ފައިނަލްގެ ދެވަނަ ލެގުގައި އެގްރިގޭޓުން ބަލިވެ ބާސެލޯނާ މުބާރާތުން ވަކިވާން ޖެހިއްޖެއެވެ.ބާސެލޯނާގެ އަމިއްލަ ދަނޑުގައިި ރޭގައި ކުޅުނު ކޮޕަޑެލްރޭގެ ދެވަނަ ލެގުގައި ބާސެލޯނާ އެތްލެޓިކޯގެ މައްޗަށް 3 ގޯލުގެ ތަފާތުން ކުރިހޯދިނަމަވެސް އެޓީމު ވަނީ ސެމީ ފައިނަލުގެ ފުރަތަމަ ލެގުގައި އެތްލެޓިކޯ އަތުން 4-0 ގެ ތަފާތުބޮޑު ނަތީޖާއަކުން ބަލިވެފައެވެ.

ބާސެލޯނާގެ ދަނޑުގައި ކުޅުނު މި މެޗުގައި އެޓީމުން ވަނީ މެޗުގެ ކުރީކޮޅުން ފެށިގެން ވަރުގަދަ ކުޅުމެއް ދައްކާފައެވެ. އެގޮތުން މެޗުގެ ފުރަތަމަ 71 ސިކުންތުގެ ތެރޭގައި ފާމިން ލޮޕޭޒް ފޮނުވާލި ހަމަލާއެއް ގޯލުގެ ހުރަސް ދަނޑީގައި ވަނީ ޖެހިފައެވެ. ބާސެލޯނާއިން މެޗުގެ ލީޑު ނެގީ 29 ވަނަ މިނެޓުގައި ޒުވާން ކުޅުންތެރިޔާ މާކް ބާނަލް ކާމިޔާބުކޮށްދިން ލަނޑުންނެވެ.

Ad by Hajj Corporation

ފުރަތަމަ ހާފު ނިމެން ކައިރިވެފައި ވަނިކޮށް، ޕެޑްރީއަށް ކުރި ފައުލަކާ ގުޅިގެން ބާސެލޯނާއަށް ލިބުނު ޕެނަލްޓީއެއް ކާމިޔާބުކޮށް ރަފީނިއާ ވަނީ އެޓީމުގެ ދެވަނަ ލަނޑު ޖަހައިދީފައެވެ. މެޗުގެ 72 ވަނަ މިނެޓުގައި ބާނަލް ވަނީ އޭނާގެ ދެވަނަ ލަނޑު ޖަހައި ބާސެލޯނާއަށް އުންމީދު އާކޮށްދީފައެވެ. ނަމަވެސް މެޗުގެ ފަހު ވަގުތުކޮޅުގައި ހެޓްރިކް ފުރިހަމަކުރަން ބާނަލްއަށް ލިބުނު ފުރުސަތާއި، ލަމީން ޔަމާލް ފޮނުވާލި ހަމަލާ ވަނީ ނާކާމިޔާބުވެފައެވެ.

މި މެޗުގައި ދެ ލަނޑު ޖެހި ބާނަލް ވަނީ އުމުރުން 18 އަހަރާއި 281 ދުވަހުގައި ބާސެލޯނާއަށް ކޮޕާ ޑެލް ރޭ މެޗެއްގައި ދެ ލަނޑު ޖަހައިދިން އެންމެ ޒުވާން ކުޅުންތެރިޔާގެ ރެކޯޑު ހަދާފައެވެ. ބާސެލޯނާއިން މެޗުގައި 21 ހަމަލާ އުފެއްދި ނަމަވެސް، އެތުލެޓިކޯއިން ވަނީ އެޓީމުގެ ލީޑު ދިފާއުކޮށްފައެވެ.

މިއީ އެތުލެޓިކޯ މެޑްރިޑުން ކޮޕާ ޑެލް ރޭގެ ފައިނަލަށް ދަތުރުކުރި 20 ވަނަ ފަހަރެވެ. އަދި މިއީ ކޯޗު ޑިއޭގޯ ސިމިއޯނީގެ އިރުޝާދުގެ ދަށުން އެޓީމު ފައިނަލަށް ދިޔަ ދެވަނަ ފަހަރުގެ އިތުރުން، ވޭތުވެދިޔަ 13 އަހަރު ތެރޭގައި އެޓީމު މި މުބާރާތުގެ ފައިނަލަށް ދިޔަ ފުރަތަމަ ފަހަރެވެ.