ގިނަ ދުވަސްތަކެއް ވަންދެން ދެކެވެމުން އައި ވާހަކަތަކަށް ފަހު، ރެއަލް މެޑްރިޑްގެ 9 ނަންބަރު ޖާރސީ ބްރެޒިލްގެ ޒުވާން ތަރި އެންޑްރިކްއަށް ދޭން ނިންމައިފިއެވެ. މި ޖާރސީއަކީ ކުރިން ކިލިއަން އެމްބާޕޭ ލައިގެން ކުޅުނު ޖާރސީއެވެ.

19 އަހަރުގެ ސްޓްރައިކަރު އެންޑްރިކް ރެއަލް މެޑްރިޑަށް ބަދަލުވީ މިދިޔަ އަހަރު ބްރެޒިލްގެ ޕަލްމެއިރާސް އިންނެވެ. އޭނާގެ ފުރަތަމަ ސީޒަންގައި 16 ނަންބަރު ޖާރސީގައި ކުޅެ، 7 ލަނޑާއި އެއް އެސިސްޓް ހޯދިއެވެ.

ލޫކާ މޮޑްރިޗް ކްލަބުން ވަކިވުމާ ގުޅިގެން އެމްބާޕޭ 10 ނަންބަރު ޖާރސީއަށް ބަދަލުވުމުން، 9 ނަންބަރު އޮތީ ހުސްވެފައެވެ. އެންމެ ފުރަތަމަ މި ޖާރސީ އެންޑްރިކްއަށް ދޭނެ ކަމަށް ލަފާކުރެވުނު ނަމަވެސް، ފީފާ ކްލަބް ވޯލްޑް ކަޕްގައި ގޮންޒާލޯ ގާސިއާ ފާހަގަވުމާ ގުޅިގެން އެކަމާ މެދު ޚިޔާލު ތަފާތުވުންތަކެއް އުފެދުނެވެ. އަދި އޭރު ބައެއް ނޫސްތަކުން މި ޖާރސީ ގާސިއާއަށް ދޭން ނިންމާފައިވާކަންވެސް ރިޕޯޓްކުރިއެވެ. އެންޑްރިކްއަށް 9 ނަންބަރު ދީފައިވާކަން ރެއާލްގެ އޮފިޝިއަލް ވެބްސައިޓް އައި މީސްމީޑިޔާތަކުގައި ވަނީ ހާމަކޮށްފައެވެ.

އަދި ގޮންޒާލޯ އާ ކޮންޓްރެކްޓެއްގައި ސޮއިކޮށް، އޭނާ 16 ނަންބަރު ޖާރސީގައި ކުޅޭނެކަން މިހާރު ވަނީ ކަށަވަރުވެފައެވެ.

އެންޑްރިކްއަށް މިހާރު ލިބިފައިވާ 9 ނަންބަރު ޖާރސީއަކީ ރޮނާލްޑޯ، ކްރިސްޓިއާނޯ ރޮނާލްޑޯ އަދި ކަރީމް ބެންޒެމާ ފަދަ ކްލަބުގެ އެންމެ މަޝްހޫރު ކުޅުންތެރިން ލައިގެން ކުޅުނު ޖާރސީއެކެވެ. ފުރަތަމަ ސީޒަންގައި މަދު ވަގުތުކޮޅެއް ލިބުނު ނަމަވެސް، ޒާބީ އަލޮންސޯގެ ދަށުން އިތުރު ފުރުސަތުތައް ލިބޭނެކަމަށް އެންޑްރިކް އުންމީދު ކުރެއެވެ. މިވަގުތު އޭނާ ހުރީ އަނިޔާގައެވެ.