ވެލާނާ އިންޓަރނޭޝަނަލް އެއަރޕޯޓު (ވީއައިއޭ)ގެ އައު ޕެސެންޖަރ ޓާމިނަލަށް އިތުރު 7 އެއާލައިނެއް ބަދަލުކުރުމުގެ މަސައްކަތް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ފަށައިފިއެވެ.

މިހާތަނަށް އައު ޓާމިނަލުން ޚިދުމަތް ދެމުން އަންނަނީ ހަމައެކަނި ޤައުމީ އެއާލައިން، މޯލްޑިވިއަން އެކަނި ކަމަށްވާއިރު، އެ އެއާލައިންގެ ބައިނަލްއަޤްވާމީ ދަތުރުތަކަށް މިހާރު ބޭނުންކުރަމުން އަންނަނީ އާ ޓާމިނަލެވެ.

Ad by Hajj Corporation

އެމްއޭސީއެލްއިން މި މަހުގެ ތެރޭގައި އައު ޓާމިނަލަށް ބަދަލުކުރުމަށް އަމާޒު ހިފާފައިވާ އެއާލައިންތަކުގެ ތެރޭގައި ޗޮންޖިން އެއާލައިންސް، ބިއޯންޑް، ޒިއަމެން އެއާ، އޮމާން އެއާ، ފިޓްސް އޭވިއޭޝަން، ޔޫއެސް ބަންގްލާ އެއާލައިންސް އަދި އެއާ އަރަބިއާ ހިމެނެއެވެ. މީގެ އިތުރުން ބެންކޮކް އެއާވޭސް އަދި ބެޓިކް އެއާވޭސް ވެސް އައު ޓާމިނަލަށް ބަދަލުކުރެވޭނެއެވެ.

26 ޖުލައި 2025 ގައި ހުޅުވުނު މި އައު ޓާމިނަލަކީ 72،000 އަކަ މީޓަރުގެ ސަރަހައްދެއްގައި ތަރައްޤީކޮށްފައިވާ ޒަމާނީ ވަސީލަތްތަކާ އެކު ޤާއިމްކޮށްފައިވާ ޓާމިނަލެކެވެ. މި ޓާމިނަލްގައި 47 ޗެކިން ކައުންޓަރާއި، 6 ސެލްފް ސާވިސް ޗެކިން ކިއޮސްކް އަދި ސީޕްލޭންއަށް ޚާއްސަ 24 ޗެކިން ކައުންޓަރ ޤާއިމްކޮށްފައިވެއެވެ.

އައު ޓާމިނަލްގައި އިމިގްރޭޝަން ކައުންޓަރުތައް ދެގުނަ އިތުރުކޮށްފައިވާއިރު، ފުރާ ފަސިންޖަރުންނަށް 20 އަށްވުރެ ގިނަ ކައުންޓަރާއި 6 އީގޭޓް، އަދި އަންނަ ފަސިންޖަރުންނަށް 28 ކައުންޓަރާއި 7 އީގޭޓް ޤާއިމްކޮށްފައިވެއެވެ. އަދި ރާއްޖޭގައި ފުރަތަމަ ފަހަރަށް 12 އެއިރޯ ބްރިޖް މި ޓާމިނަލުގައި ހަރުކޮށްފައިވާއިރު، މި ބްރިޖްތަކަކީ އޭސީ ކުރެވިފައިވާ ޒަމާނީ ވަސީލަތްތަކެވެ.

އަހަރަކު 7 މިލިއަން ފަސިންޖަރުންނަށް ޚިދުމަތް ދެވޭ ފެންވަރަށް ތަރައްޤީކޮށްފައިވާ މި ޓާމިނަލްގައި އެންމެ ޒަމާނީ ބެގޭޖް ސްކޭން ކުރުމުގެ ނިޒާމާއި ހައި ސްޕީޑް ބެގޭޖް ބެލްޓުތައް ބޭނުންކުރެވޭނެއެވެ.