ފަސްލައްކަ ރުފިޔާ ލިބޭ ބީ އެމް އެލް ސްޓާޓަޕް ގްރާންޓަށް އެދި ހުށަހެޅުމުގެ ފުރުސަތު މިއަދު ހުޅުވާލައިފިއެވެ. މިއީ އުފެދެމުން އަންނަ ވިޔަފާރިތަކަށް އަމާޒުކޮށް އަަލަށް ވިޔަފާރިއެއް ފެށުމަށް ނުވަތަ ހިންގަމުންދާ ވިޔަފާރިއެއް ކުރިއެރުވުމަށް ބީއެމްއެލް އިން ދޫކުރާ ހިލޭ އެހީއެކެވެ.

ބީއެމްއެލް ސްޓާޓަޕް ގްރާންޓަށް އެދި ހުށަހަޅާ ޕްރޮޕޯސަލްތަކުން ހޮވާލެވޭ ދެ ވިޔަފާރިއަކަށް 500،000 ރުފިޔާގެ ގްރާންޓެއް ދިނުމަށް އެ ކުންފުނިން ވަނީ ނިންމާފައެެވެ. ހަމައެފަދައިން އެ ވިޔަފާރިތަކުން ހުށަހަޅާ ޕްލޭންއާ އެއްގޮތަށް ވިޔަފާރިތައް ފަށައި، ބޭނުންވާ ފައިނޭންޝަލް އެޑްވައިސްވެސް ބޭންކުން ފޯރުކޮށްދޭނެއެވެ.

މިކަމާ ގުޅޭގޮތުން ބީއެމްއެލްގެ އެކްޓިންގ ސީއީއޯ ޢާއިޝަތު ނޫރައްދީން ވިދާޅުވީ، ވިޔަފާރިތައް ބާރުވެރި ކުރުވުމަކީ އިޤްތިސާދެއް ދެމެހެެއްޓެނިވިގޮތެއްގައި ތަރައްގީ ކުރުމަށް ނުހަނު ބޭނުންތެރި ކަމެއް ކަމަށެވެ. އަދި ބީ އެމް އެލް ގެ ފަރާތުން މި ގްރާންޓް ޕޮރޮގްރާމުގެ އަމާޒަކީ ވިޔަފާރީގެ ރޫޙު އާލާކުރުމާއި ރާއްޖޭގެ ހުނަރުވެރި ވިޔަފާރިވެރިން އުފެއްދުންކަމަށެވެ. އަދި ހަމައެއާއިއެކު، ވިޔަފާރިތަކަށް ބޭނުންވާ އެހީތެރިކަން ފޯރުކޮއްދީ، ވިޔަފާރިތަކަކީ އިޤްތިސާދަށް ފައިދާކުރާ ކާމިޔާބު ވިޔަފާރިތަކަށް ހެދުންކަމަށެވެ. އެގޮތުން ބީއެމްއެލްގެ ސްޓާޓަޕް ގްރާންޓް ތިން ވަނަ އަހަރެއްގައި ހިންގޭކަމީ ބެންކުން ފާހުރުވެރިކަމާއިއެކު ފާހަގަކުރާ ކަމެއްކަމަށް އާއިޝަތު ނޫރައްދީން ވިދާޅުވިއެވެ.

ސްޓާޓަޕް ގްރާންޓަށް އެދި ހުށަހެޅުމުގެ އެންމެ ފަހު ތާރީޚަކީ އޮކްޓޫބަރު 17 ވަނަ ދުވަހުގެ ރޭ 11:59 އެވެ. މި ގްރާންޓާށް ހުށަހެޅުމަށް އަށް އީމެއިލް ކުރެވޭނެއެވެ.

މި ގްރާންޓަށް އެދި ހުށަހެޅުމާއި ޝަރުތުތަކާ ބެހޭ އިތުރު މަޢުލޫމާތު ބޭންކުގެ ވެބްސައިޓް އިން ލިބޭނެއެވެ.