ރާއްޖޭގެ ކަޅު ބާޒާރުން ގަންނަން ލިބޭ ޑޮލަރުގެ އަގު ވަރަށް ބޮޑު ވެއްޖެއެވެ.

ޑޮލަރުގެ އަގު ބޮޑުވެފައިވަނީ ބޭރުގެ ޓްރާންސެކްޝަންތަކުގައި ޑޮލަރުން ކެނޑުމުގައި ބޭންކް އޮފް މޯލްޑިވްސް (ބީއެމްއެލް) އިން ގެނައި ބަދަލުތަކާ ގުޅިގެންނެވެ.

އެގޮތުން މިއަދު ހެނދުނު ބޭންކުން ކުރި އިއުލާނުގައި ގެނައި ބަދަލުތަކުގެ ތެރޭގައި:

1. މިހާރު ހުރި ޑެބިޓް ކާޑުތައް: އެމްވީއާރު އެކައުންޓްތަކާ ގުޅިފައިވާ ކާޑަށް ބޭރުގެ މުއާމަލާތްތަކަށް ދޭ އެލަވަންސް ސަސްޕެންޑް ކުރުން
2. އައު ޑެބިޓް އަދި ކްރެޑިޓް ކާޑު: އެމްވީއާރު އެކައުންޓުތަކާ ގުޅިފައިވާ ކާޑުތަކަށް ބޭރުގެ މުއާމަލާތްތަކަށް ދޭ އެލަވަންސް މެދުކަނޑާލުން
3. މިހާރު ހުރި ސްޓޭންޑަރޑް އަދި ގޯލްޑް ކަރެޑިޓް ކާޑު: ބޭރުގެ މުއާމަލާތްތަކަށް މަހުން މަހަށް ލިމިޓް 100 ޑޮލަރަށް ދަށްކުރުން

ރާއްޖޭގެ މަރުކަޒީ ބޭންކްގެ ތެރެއިން ޑޮލަރު ނުލިބި އެކަމުގެ ތާށިކަން އިންތިހާއަށް ބޮޑެވެ. އެގޮތުން މި ފަހަކުން އައިސް އާންމު ގޮތެއްގައި 18 ރުފިޔާއަށް ލިބޭ ޑޮލަރު، މިއަދު ލިބެން ހުރީ 20 ރުފިޔާ އާއި 21 ރުފިޔާގެ ދެމެދުގެ އަގެއްގައެވެ.

އަދި ބޭންކުތަކުން ޑޮލަރު ގަންނަން ލިބޭ އަގަކީ 15.42 ރުފިޔާ ކަމުގައި ވީ ނަމަވެސް، އެ އަގުގައި ޑޮލަރު ނުލިބޭތާ އެތައް ދުވަހެއް ވެއްޖެއެވެ. އެހެންކަމުން ބޭންކުތަކުގައި ދައުރުވާ ޑޮލަރުގެ ތާށިކަމުގެ މައްސަލަ ހައްލުކުރުމުގެ މަސައްކަތް ސަރުކާރުން ދަނީ ކުރަމުންނެވެ.