ސަމާލުވޭ!! ވާދަވެރީން ބިރުގަންނަވާލަން އައު ސީޒަން ފެށެެންވާއިރަށް އާޓެޓާ އައު އުކުޅުތަކެއް
12 އޯގަސްޓު 2025 - 05:47

އައު ސީޒަނާއެކު އާސެނަލް އިން ދަނީ ކުޅުންތެރިން ގެނައުމުގެ އިތުރުން އައު އުކުލުތަކެއް ތައާރަފްކުރަމުންނެވެ. އެގޮތުން އާސެނަލް ފުޓްބޯޅަ ކްލަބުން އެމިރޭޓްސް ސްޓޭޑިއަމްގެ ކުޅުންތެރިންގެ ޓަނަލްއަށް ބޮޑު ބަދަލެއް ގެނެސްފިއެވެ. އެގޮތުން ކުރީގައި ކުޅުންތެރިން ބޭރަށް ނިކުންނައިރު ވަށައިގެން ބެދިފައިވާ މާހައުލެއް ހުރިނަމަވެސް މިހާރު އިނދިކޮޅު ކުޅުންތެރިން ދަނޑަށް ނިކުމެގެންދާނީ އާރސެނަލްގެ ސަޕޯޓަރުންގެ ވަރުގަދަ އަޑުތަކުގެ ތެރެއިންނެވެ. މި ބަދަލު ގެނެސްފައިވަނީ ވާދަވެރި ޓީމުތަކުގެ ކުޅުންތެރިންނަށް ނަފްސާނީ ގޮތުން އަސަރުކުރުވުމުގެ ބޭނުމުގައި ކަމަށް ވެއެވެ.

Ad by Hajj Corporation
މި ބަދަލާއެކު، ކުރިން ޓަނަލްގައި ހުރި ކަވަރު ދާއިމީކޮށް ނަގާލާފައިވާއިރު، ޓަނަލްގެ ދޮރުމަތީގައި ސްކްރީނެއް ހަރުކޮށްފައިވެއެވެ. މި ސްކްރީނުގެ ސަބަބުން ކުޅުންތެރިންނަށް އެއްޗެހި އުކުމުން ސަލާމަތްވެވޭނެ ނަމަވެސް، މާހައުލުގެ އަޑުގަދަކަން އިތުރުވެ، އަޑުގެ ގަދަމިނުގެ އަސަރު އިތުރުވާނެއެވެ.
އާޓެޓާގެ އުކުޅުތައް
އާސެނަލްގެ ކޯޗް މިކެލް އާޓެޓާއަކީ ޓީމަށް ކުރިއެރުން ހޯދުމަށް އައު އުކުޅުތައް ބޭނުންކުރުމަށް ފަސްޖެހޭ މީހެއް ނޫނެވެ. މީގެ ކުރިން ވެސް އޭނާ ވަނީ އެކި ގޮތްގޮތުން ޓީމުގެ ފެންވަރު މަތިކުރުމަށް މަސައްކަތްކޮށްފައެވެ. މީގެ ތެރޭގައި ޓްރެއިނިންގ ގްރައުންޑްގައި ސްޕީކަރު ބަހައްޓައިގެން ލިވަރޕޫލްގެ އެންފީލްޑް ސްޓޭޑިއަމްގެ މާހައުލު ހިތްވަރުދިނުމާއި، ކުޅުންތެރިންގެ ސަމާލުކަން އިތުރުކުރުމަށް ޕިކްޕޮކެޓުން ލައްވާ ކުޅުންތެރިންގެ ފޯނާއި ވޮލެޓް ވަގަށް ނެގުން ފަދަ ކަންކަން ހިމެނެއެވެ.
މީގެ އިތުރުން، އާޓެޓާ ވަނީ ޓީމުގެ އެކުވެރިކަން އިތުރުކުރުމަށް "ވިން" ނަމަކަށް ކިޔާ ޗޮކްލެޓް ލެބްރަޑޯ ކުއްތާއެއް ޓްރެއިނިންގ ގްރައުންޑަށް ގެނެސް، ޓީމުގެ ފެމިލީ މާހައުލު އިތުރުކުރުމަށް މަސައްކަތްކޮށްފައެވެ. އަދި ކުޅުންތެރިންނަށް ލައިޓްބަލްބް އާއި ލެމަން ފަދަ ތަކެތި ބޭނުންކޮށްގެން އެކި ފިލާވަޅުތައް ދީފައިވެއެވެ.
ޓަނަލްގެ މި އައު ބަދަލުން އެދެވޭ ނަތީޖާއެއް ނެރެވޭނެތޯ ބަލަން ޖެހޭއިރު، އާސެނަލްގެ ކުރިއެރުމަށް އާޓެޓާ ގެންނަ އައު ބަދަލުތަކަކީ ޓީމުން ދުރުމުސްތަޤުބަލަށް ބޮޑެތި ކާމިޔާބީތައް ހޯދުމަށް އަޅަމުންގެންދާ މުހިންމު ފިޔަވަޅުތަކެއްކަމުގައި ފާހަގަކުރެވެއެވެ.