ޓްރާންސްފަރ މާކެޓުގައި ބޮޑެތި ހޭދަތައް ނުކުރާ ކުލަބެއްގެ ގޮތުގައި މީހުންނަށް ހީވެފައި އޮތް އާސެނަލް މަތިމައްޗަށް ޚަރަދުކުރަން ފަށައިފިއެވެ. މިއާއެކު އާސެނަލް މިހާރު ވަނީ ޕްރިމިއަރ ލީގުގެ އެންމެ އެގްރެސިވް ކުލަބުތަކުގެ ތެރެއިން އެއް ކުލަބަށް ބަދަލުވެފައެވެ.

މި ބަދަލުވުމުގެ އެންމެ ފަހުގެ ހެއްކަކީ ކްރިސްޓަލް ޕެލަސްގެ މިޑްފީލްޑަރ އެބެރެޗި އެޒެ ސޮއި ހޯދުމަށް އެތައްދުވަހެއް ވަންދެން ޓޮޓްނަމް މަސައްކަތްކޮށް ކޮންޓްރެކްޓްގައި ސޮއި ކުރާ ހިސާބުގައި ވަނިކޮށް، ޒަމާންވީ ހަތުރު ޓޮޓްނަމްއަށް ނޭނގި ފަހުވަގުތު ދޯކާދީފައި އެޒެ އާސެނަލް އަށް ސޮއިކުރަން އެއްބަސްވުމެވެ. 60 މިލިޔަނަށް އެޒެ ގަންނަން އާސެނަލް އިން ކްރިސްޓަލް ޕެލަސް އަށް ހުށަހަޅާފައިވާއިރު، ޕެލަސްއިން މި ޑީލަށް ފަސޭހަކަމާއެކު އާނބަސްބުނެފައިވާކަމަށް ރިޕޯޓްތައް ލިބެއެވެ.

Ad by Hajj Corporation

ޓޮޓްނަމް އަށް ބަދަލުވުމަށް އެއްބަސްވުމަށްފަހު ދޯކާދީފައިވާއިރު އެޒެ އާއި އެއްގޮތަށް ކަބީރު ސިންގް އަކީވެސް ފަހުވަގުތު ކުއްލިއަކަށް ދޯކާދީފައި އެހެންދިމާލަކަށް ފޯކަސް އަނބުރާލުމަށް މަޝްހޫރުކަން ހޯދާފައިވާ ކެރެކްޓާއެކެވެ.

ޑޭވިޑް އޯންސްޓީން އަދި ފަބްރީޒިއޯ ރޮމާނޯ ފަދަ މަޝްހޫރު ގިނަ ރިޕޯޓަރުން ހާމަކޮށްފައިވާ ގޮތުގައި، މިދިޔަ ހަފްތާގައި ކައި ހަވަރޓްޒަށް ލިބުނު ސީރިއަސް އަނިޔާތަކާއި ގުޅިގެން އެތަން ފޫބެއްދުމަށް އާސެނަލްއިން ވަނީ 27 އަހަރުގެ އެޒެއަށް އަލުން ޝައުގުވެރިކަން ފާޅުކޮށް، އޭނާގެ ސޮއި ހޯދުމަށް ކުއްލިގޮތަކަށް އަވަސް ފިޔަވަޅުތަކެއް އަޅާފައެވެ.

ފާހަގަކޮށްލެވޭ އަނެއްކަމަކަމީ މި ޓްރާންސްފާގައި، އާސެނަލް އިން މީގެކުރިންވެސް އެޒެ ގެ ސޮއި ހޯދުމަށް ޝައުޤުވެރިކަން ފާޅުކޮށްފައިވީނަމަވެސް، އޭނާގެ ސޮއި ހޯދުމަށް އޭރު މާބޮޑު މަސައްކަތެއްއާސެނަލް އިން ކޮށްފައި ނުވާކަމެވެ. ނަމަވެސް އާސެނަލްގެ ޒަމާންވީ ވާދަވެރިއާ އަށް އެޒެ ބަދަލުވުމަކީ އާސެނަލް އަށް ބަލަން ވަރަށް އުނދަގޫވާނެ މަންޒަރެކެވެ. މިއީ ފަރުދާގެ ފުރަގަހުން އަވަސް އަވަހަށް އާސެނަލް އިން މި ޑީލް ނިންމަން ބޭނުންވި އެންމެ ބޮޑު އެއް ސަބަބެވެ.

މިއާއެކު މިކެލް އަރޓެޓާ އަދި އާސެނަލްގެ ސްޕޯޓިންގ ޑިރެކްޓަރ ބަރޓާގެ އިރުޝާދުގެ ދަށުން އާސެނަލްގެ ޓްރާންސްފަރ ސިޔާސަތަށް ވަނީ ބޮޑު ބަދަލެއް އައިސްފައިވާކަން އެނގެއެވެ. މި ސަމަރގައި އެކަނި ވެސް އާސެނަލްއިން ވަނީ މާޓިން ޒުބިމެންޑީ، ވިކްޓަރ ގިއޯކެރެސް، ކްރިސްޓިއަން ނޯގާޑް، މޮސްކުއެރާ ފަދަ ކުޅުންތެރިންގެ އިތުރަށް، ބެންޗުގައި ބޭތިއްބުމަށް ކެޕާ އަރިޒަބަލާގާ އަދި ނޯނީ މަޑުއެކޭ ފަދަ ކުޅުންތެރިން އަގުބޮޑުކޮށް ގެނެސްފައެވެ. މިކުޅުންތެރިންގެ ސޮއި ހޯދުމަށް މި ޓްރާންސްފާގައި 200 މިލިއަން ޕައުންޑު އަށްވުރެ ބޮޑު އަދަދެއް ހޭދަކޮށްފައިވާކަން ފާހަގަކޮށްލެވެއެވެ.

އެޒެ ބުރާސްފަތި ދުވަހު ފްރެޑްރިކްސްޓަޑާ ދެކޮޅަށް ކުޅޭ ޔޫރަޕާ ލީގު ކޮލިފައިންގމެޗަށްފަހު އެޒެ އާސެނަލްގެ މެޑިކަލް ޓެސްޓުތައް ހަދާނެ ކަމަށް ބެލެވެއެވެ.

ޕެލަސް ޖޯޒީގައި ފާއިތުވެދިޔަ 2 މަސްތެރޭގައި 2 ޓްރޮފީ ކާމިޔާބުކުރި އެޒެ އާސެނަލް އަށް ބަދަލުވުމަށް އެއްބަސްވެފައިވާއިރު، ފާއިިތުވެ ދިޔަ 6 އަހަރުރެތޭގައި އާސެނަލް އިން ޓްރާންސްފާ މާކެޓްގައި 850 މިލިޔަން ޕައުންޑްއަށްވުރެ ބޮޑު ޚަރަދެއް ކޮށް، ކާމިޔާބުކުރެވިފައިވަނީ ދެ ސީލްޑް ގެ އިތުރުން އެންމެ ތަށްޓެކެވެ.