އަންނަ އަހަރު ބާއްވާ ލޯކަލް ކައުންސިލް އިންތިހާބަށް ތައްޔާރުވުމަށް ސަރުކާރު ހިންގާ ޕާޓީ، ޕީއެންސީގެ ލީޑާޝިޕްގެ ބޭފުޅުން ރަށްރަށަށް ދަތުރުފުޅު ފައްޓަވައިފިއެވެ.

ސިލްސިލާގޮތެެއްގައި ކުރިއަށްދާ މި ދަތުރުތަކުގެ ތެރެއިން މިރޭ ޕާޓީގެ ޑެޕިއުޓީ ޕީޖީ ލީޑަރު އަދި ވިލިމާލެ ދާއިރާގެ މެމްބަރު މުޙައްމަދު އިސްމާއީލާއި ކޮލަމާފުށި ދާއިރާގެ މެމްބަރު އިބްރާހިމް ދީދީގެ އިތުރުން ފަތުރުވެރިކަމާއި ތިމާވެއްޓާބެހޭ ވުޒާރާގެ ޑެޕިއުޓީ މިނިސްޓަރ ނަބީލް ޒަމީލް ވަނީ މަކުނުދޫ ދާއިރާ އަށް ވަޑައިގެންފައެވެ.

Ad by Hajj Corporation

ޕީއެންސީން ބުނީ އެ ޕާޓީގެ ލީޑާޝިޕްގެ ބޭފުޅުން ރަށްރަށް ކުރައްވާ މި ދަތުރުތަކުގައި އެ ރަށްރަށުގައި ތިބި ޕާޓީގެ ސްޓިއަރިންގް ކޮމިޓީ އާއި މެމްބަރުންނާ ބައްދަލުކުރައްވާނެ ކަމަށެވެ.

އެ ރަށްރަށުގައި ޕާޓީގެ ހަރަކާތްތައް އިންތިޒާމްކުރުމާއި ޕާޓީގެ އާންމު މެންބަރުންގެ ބައިވެރިވުން އިތުރުކުރުމާ ގުޅޭ ގޮތުން މަޝްވަރާ ކުރާނެ ކަމަށް ވެސް ޕީއެންސީން ބުންޏެވެ.

ލޯކަލް ކައުންސިލު އިންތިހާބު ބާއްވަނީ އަންނަ އަހަރުގެ މާޗު މަހު އެވެ.

ލޯކަލް ކައުންސިލް އިންތިހާބަށް ޕީއެންސީން އެ ޕާޓީގެ ހަރަކާތްތައް ވަރުގަދަކުރަން ފެށިއިރު، އެ ޕާޓީގެ ލީޑާޝިޕްގެ ބައެއް ބޭފުޅުން ކުރިން ވިދާޅުވެފައި ވަނީ އެ އިންތިހާބުގައި ވެސް އެ ޕާޓީން ބޮޑު ކާމިޔާބީއެއް ހޯދާނެ ކަމަށެވެ.