34 ވަނަ ގައުމީ އެތުލެޓިކްސް މުބާރާތުގެ ފިރިހެނުންގެ 10000 މީޓަރު ދުވުމުގެ ރަން މެޑަލް މެރެތަން ރަނަރސް މޯލްޑިވްސްގެ މުޙައްމަދު އިރުފާން ހޯދައިފިއެވެ. އިރުފާން މި ރޭސް ނިންމާފައިވަނީ 35 މިނިޓާއި 10.30 ސިކުންތުންނެވެ.

މި ރޭހުގެ ރިހި މެޑަލް ހޯދި ދިވެހި ސިފައިންގެ ކުލަބުގެ މުޙައްމަދު ރަޝީދު ރޭސް ނިންމާފައިވަނީ 36 މިނިޓާއި 41.16 ސިކުންތުންނެވެ. އަދި ލޯ މެޑަލް ހޯދި މެރެތަން ރަނަރސް މޯލްޑިވްސް ޔޫސުފް އިބްރާހިމް ރޭސް ނިންމާފައިވަނީ 37 މިނިޓާއި 40.07 ސިކުންތުންނެވެ.

2021 ވަނަ އަހަރު ދުވުމުގެ ދާއިރާއަށް ނުކުތް މުޙައްމަދު އިރުފާނަކީ މިވަގުތު ރާއްޖޭގައި އެންމެ އަވަހަށް ކުރިއަރަމުން އަންނަ ދުވުންތެރިންގެ ތެރެއިން އެކެކެވެ. އޭނާ ވަނީ ރާއްޖޭގައި ފަހަކަށް އައިސް ބޭއްވޭ ގިނަ ދިގު ދުވުންތަކުން ފާހަގަކޮށްލެވޭ ކާމިޔާބީތަކެއް ހޯދާފައެވެ.

އެގޮތުން ނިމިދިޔަ ދިރާގު ރޯޑް ރޭސްގެ 10 ކިލޯމީޓަރުގެ ބައިން އިރުފާން ވަނީ ދެވަނަ ހޯދާފައެވެ. އަދި މިދިޔަ އަހަރުގެ ހުޅުމާލެ ރަން ގައި 5 ކިލޯމީޓަރުގެ ބައި 16 މިނެޓާއި 15 ސިކުންތުން ނިންމައި، އެއްވަނަ ހޯދުމުގެ އިތުރުން މިއަހަރު ފުވައްމުލަކުގައި ބޭއްވި ދިރާގު ފުވައްމުލައް ރަން ގެ 10000 މީޓަރު ދުވުމުންވެސް އެއްވަނަ ހޯދާފައިވެއެވެ.

އިރުފާންގެ މި ކާމިޔާބީއާއެކު ރާއްޖޭގެ ދުވުމުގެ މައިދާނުގައި އޭނާގެ ހުނަރުވެރިކަން އިތުރަށް ސާބިތުކޮށްދީފައިވާއިރު، ކުރިއަށް އޮތް ތަނުގައިވެސް އިތުރު ކާމިޔާބީތަކެއް ހޯދާނެކަމަށް އުއްމީދު ކުރެވެއެވެ.