ބައިނަލްއަޤްވާމީ ގޮތުން މަސްތުވާތަކެއްޗާއި ދެކޮޅަށް މަސައްކަތްކުރާ ދުވަސް ކަމުގައިވާ 26 ޖޫން 2025 ގައި ތިނަދޫސިޓީގައި "ޢާއިލީ ދުވުމުގެ" ނަމުގައި ޚާއްޞަ އިވެންޓެއް ބާއްވައިފިއެވެ. މި އިވެންޓުގައި 900 އަށްވުރެ ގިނަ މީހުން ބައިވެރިވެފައިވާކަން ފާހަގަކުރެވެއެވެ.

މި އިވެންޓުގެ މައިގަނޑު މަޤްޞަދަކީ މުޖުތަމަޢު އެއްކޮށް ނުކުމެ ފާޅުގައި މަސްތުވާތަކެއްޗަށް "ނޫނެކޭ" ބުނުމާއި، މަސްތުން ސާފު މުޖުތަމަޢެއް ބިނާކުރުމަށް މަސައްކަތްކުރުމުގެ ރޫޙު އާލާކުރުން ކަމަށް އިންތިޒާމުކުރި ފަރާތުން ހާމަކޮށްފައިވެއެވެ. މިއީ "ގިރިންދާ" ޖަމްޢިއްޔާއިން ވޭތުވެދިޔަ 2 އަހަރު ވަންދެން ހުވަދު އަތޮޅުގައި ތަޖުރިބާކޮށް، ރަނގަޅު ނަތީޖާ ފެންނަމުންދާ މަސައްކަތު މޮޑެލެއްކަން ފާހަގަކުރެވެއެވެ.

Ad by Hajj Corporation

4 ކިލޯމީޓަރުގެ މި ދުވުން އިންތިޒާމުކޮށްފައިވަނީ "ގިރިންދާ" ޖަމްޢިއްޔާގެ އިސްނެގުމުގެ މަތިން ރައުހަތު ސްޕޯޓްސްއާއި، ހުވަދު އަތޮޅުގެ ދިވެހި ފުލުހުންނާއި، ތިނަދޫ ސިޓީ ކައުންސިލްގެ އިދާރާ ގުޅިގެންނެވެ. މި އިވެންޓުގައި ތުއްތު ކުދިންނާއި، އެކުދިންގެ މައިންބަފައިންނާއި، އެކި މުއައްސަސާތަކުގެ މުވައްޒަފުންގެ އިތުރުން ހުވަދު އަތޮޅުގެ ފުލުހުންނާއި ވެރިން، އަދި ބައެއް ރަށްރަށުގެ ކައުންސިލް މެންބަރުން ބައިވެރިވެފައިވެއެވެ.

މި އިވެންޓަށް ހަވަރު ސްޕޯޓްސް އަދި ނޯވާޓެކްގެ މައި ސްޕޮންސަރޝިޕްގެ އިތުރުން، ތިނަދޫސިޓީއާއި މުޅި ހުވަދުއަތޮޅުގެ ކެޔޮޅުންނާއި، ފުލުހުންނާއި، އާންމު ރައްޔިތުންގެ މާލީ އެހީތެރިކަން ވަރަށް ބޮޑަށް ލިބިފައިވެއެވެ. މީގެއިތުރުން ތިނަދޫސިޓީގެ ޑިޓޮކްސް ސެންޓަރާއި، އެހެނިހެން ވިޔަފާރިތަކާއި މުއައްސަސާތަކުގެ އެހީތެރިކަންވެސް ފާހަގަކޮށްލެވެއެވެ.

މި އިވެންޓު ރަސްމީކޮށް މީޑިއާ ނުކުރި ނަމަވެސް، ސޯޝަލް މީޑިއާގައި މި އިވެންޓަށް ވަރަށް ބޮޑު މަޤްބޫލުކަމަކާއި ތަޢުރީފް ލިބިފައިވާކަން ފާހަގަކުރެވެއެވެ. މިފަދަ އިވެންޓުތަކަކީ މުޖުތަމަޢުގެ ހޭލުންތެރިކަން އިތުރުކޮށް، މަސްތުވާތަކެއްޗާ ދެކޮޅަށް މަސައްކަތްކުރުމުގައި މުހިންމު ދައުރެއް އަދާކުރާ ހަރަކާތްތަކެއް ކަމުގައި ބެލެވެއެވެ.