މިމަހު 30 ގައި ޗައިނާގެ ޖިއާޒިން ކުރިޔަށްގެންދާ އޭޝިއާ މެރަތަންގައި ރާއްޖޭގެ ފަރާތުން ތަމްސީލުކުރާނެ އެތްލީޓަކަށް މުޙައްމަދު އިރުފާން ހޮވިއްޖެއެވެ.
2021 ވަނަ އަހަރު ދުވުމުގެ ތެރެއަށް ވަތް މުޙައްމަދު އިރުފާނަކީ މިވަގުތުގައި ރާއްޖޭގައި އަރަމުން އަންނަ ދުވުންތެރިއެކެވެ. އެގޮތުން ރާއްޖޭގައި މިފަހަކަށް އައިސް ބާއްވާ ދިގު ދުވުންތަކުގައި އިރުފާން އަންނަނީ ކުރިއެރުން ހޯދަމުންނެވެ. އަދި ނިމިދިޔަ ދިރާގު ރޯޑް ރޭސްގައި 10 ކިލޯމީޓަރު ބައިން އިރުފާނު ވަނީ ދެވަނަ ހޯދާފައެވެ. މީގެ އިތުރުން މިދިޔަ އަހަރުގެ ހުޅުމާލެ ރަން ގައި 5 ކިލޯމީޓަރުގެ ބައި 16 މިނެޓާއި 15 ސިކުންތުން ނިންމައި، އެއްވަނަ ހޯދާފައިވެއެވެ.

އިރުފާން އެންމެ ފުރަތަމަ އިންޓަރ ނޭޝަނަލް މެރަތަން އެއްގައި ބައިވެރިވެފައިވަނީ 2022 ވަނަ އަހަރުގައި ތުރުކީގެ އަންތާލިޔާގައި ބޭއްވި ފުލް މެރަތަންގައެވެ. އެފަހަރު އިރުފާނު ވަނީ 2 ގަޑި އިރާއި 51 މިނެޓު ތެރޭގައި ރޭސް ނިންމާފައެވެ. އަދި އޭގެފަހުން އޮސްޓްރޭލިއާގެ ގޯލްޑް ކޯސްޓް ހާފް މެރަތަން 1 ގަޑި އިރާއި 13 މިނެޓުން ނިންމާފައެވެ.

އޭޝިއަން ގޭމްސްގައި އިރުފާނު ދުވަން ހަމަޖެހިފައިވަނީ ފުލް މެރަތަންގައެވެ. އެގޮތުން މުބާރާތުން ހާސިލް ކުރަން ބޭނުންވަނީ ރަނގަޅު ޓައިމިން އަކަށް ރޭސް ނިންމައި، ކުރިޔަށް އޮތް އެހެނިހެން މުބާރާތްތަކަށް ތައްޔާރުވުންކަމުގައި މިނޫހަށް މަޢުލޫމާތުދެމުން އިރުފާން ބުނެފައިވެއެވެ.