ރާއްޖޭގެ ބޮޑެތި ފުޓްބޯޅަ ކްލަބްތަކަށާއި ގައުމީ ޓީމަށް ވެސް ކުޅެފައިވާ އަސްހަދު އަލީ (އަޑުބަރޭ)ގެ މައްޗަށް ޖިނާއީ ތިން ދައުވާއެއް އުފުލައިފި އެވެ.

މި ދައުވާތަކާ ގުޅޭ އަޑުއެހުންތައް ކްރިމިނަލް ކޯޓުން މާދަމާއަށް ވަނީ ތާވަލުކޮށްފަ އެވެ.

Ad by Hajj Corporation

އަޑުބަރޭގެ މައްޗަށް އުފުލާފައިވާ ދައުވާތަކުގެ ތެރޭގައި އަނިޔާދިނުމުގެ ދައުވާއާއި، މުދަލަށް ގެއްލުންދިނުމުގެ ދައުވާއާއި، މީހަކަށް އަނިޔާއެއް ދިނުމަށް ބިރުދެއްކުމުގެ ދައުވާ ހިމެނެ އެވެ.

ނަމަވެސް، މި ދައުވާތަކަކީ ކޮން މައްސަލައަކާ ގުޅިގެން ކުރާ ދައުވާތަކެއް ކަމެއް އަދި ސާފެއް ނުވެ އެވެ. ކްރިމިނަލް ކޯޓުން ވެސް މިކަމާ ގުޅޭ އިތުރު ތަފްސީލެއް ހާމަކޮށްފައެއް ނުވެ އެވެ.

އަސްހަދަކީ ކުރީގެ ޓޫރިޒަމް މިނިސްޓަރު އަލީ ވަހީދުގެ އެންމެ ގާތް އެކުވެރިޔާ ގޮތުގައި ފާހަގަކުރެވޭ މީހެކެވެ. މިދިޔަ ސަރުކާރުގައި ޓޫރިޒަމް މިނިސްޓަރަކަށްހުރެ ޢަލީ ވަހީދު މުވައްޒަފުންތަކަކަށް ޖިންސީ ގޯނާ ކުރިކަމަށް ތުހުމަތުވާ މައްސަލައެއް ބަލަމުން އަންނަނިކޮށް އޭނާ ރާއްޖެއިން ބޭރަށް ފުރަން ޖާމިނުވިީ ވެސް އަޑުބަރޭ އެވެ.

އެ މައްސަލައިގައި އަލީ ވަހީދު ޝަރީއަތަށް ހާޒިރުކޮށް ނުދިނުމުގެ ސަބަބުން، ޔޫތު މިނިސްޓްރީގެ ސްޓޭޓް މިނިސްޓަރެއްގެ މަގާމުގައި ހުއްޓާ އަސްހަދު 15 ދުވަހަށް ޖަލަށް ވެސް ލިޔެވެ. އަސްހަދު ޖަލުން މިނިވަންވީ 2022 މާޗު 6 ގަ އެވެ.