ދިވެހި ފުލުހުންގެ ބެލުމުގެ ދަށުގައި އަތޮޅުވެހީގައި ހުރި ދިވެހި ފިރިހެނަކު މިއަދު ނިޔާވެއްޖެއެވެ.

ފުލުހުން ބުނި ގޮތުގައި ނިޔާވެފައިވަނީ އަތޮޅުވެހީގެ ހަތް ނަންބަރު ގޮޅީގެ ބަންދުގައި ހުރި ގ. ޒާމިއާ، 48 އަހަރުގެ އަޙްމަދު އަފްރާހުއެވެ. އޭނާ ނިޔާވެފައިވަނީ މިއަދު ފަތިހުގެ ވަގުތެއްގައެވެ.

ފުލުހުން ބުނި ގޮތުގައި އޭނާގެ ހަރަކާތް ހުއްޓިފައިވާ ކަމަށް މިއަދު ފަތިހު 05:50 ހާއިރު ފުލުހުންނަށް ފާހަގަކުރެވެމުން އޭނާ އައިޖީއެމް ހޮސްޕިޓަލަށް ގެންދެވުނެވެ. އެހެން ނަމަވެސް ހޮސްޕިޓަލަށް ގެންދިޔައިރު ވެސް އޭނާ ނިޔާވެފައިވާ ކަމަށް ހޮސްޕިޓަލުން މައުލޫމާތު ދީފައިވާ ކަމަށް ފުލުހުން ބުންޏެވެ.

ފުލުހުން ބުނި ގޮތުގައި އެ މައްސަލަ ފުލުހުންގެ މޭޖާ ކްރައިމް އިންވެސްޓިގޭޝަން ޑިޕާޓްމެންޓުން ތަހުގީގުކުރާއިރު، އެ މައްސަލައިގެ މައުލޫމާތު އެޗްއާރްސީއެމް އަދި އިންޓެގްރިޓީ ކޮމިޝަން (އެންއައިސީ)އަށް ވަނީ ހިއްސާކޮށްފައެވެ.

އަދި އެ ހާދިސާއާ ގުޅިގެން ކަން ހިނގާފައިވާ ގޮތުގެ އެތެރޭގެ ތަހުގީގެއް ފުލުހުންގެ ޕްރޮފެޝަނަލް ސްޓެންޑާޑް ކޮމާންޑުން ކުރަމުން އަންނަ ކަމަށް ވެސް ފުލުހުން ބުންޏެވެ.

ނިޔާވި އަފްރާހް ހައްުޔަރުކޮށްފައިވަނީ މިދިޔަ ހުކުރު ދުވަހުއެވެ. އޭނާ ހައްޔަރުކުރި ސަބަބެއް ފުލުހުން ހާމަކޮށްފައެއް ނުވެއެވެ.