2040 ވަނަ އަހަރު ފުރިހަމައަށް ތަރައްޤީވެފައިވާ ޤައުމެއްގެ ގޮތުގައި ދިވެހިރާއްޖެ ދެކެން ބޭނުންވާ ކަމަށާއި އެއީ އަމާޒެއް ކަމަށް ރައީސުލްޖުމްހޫރިއްޔާ ވިދާޅުވެއްޖެއެވެ. އެމަނިކުފާނު މިހެން ވިދާޅުވީ އދ. އާއްމު މަޖިލީހާ ތަޤުރީރު ކުރައްވަމުން ދެއްކެވި ވާހަކަފުޅުގައެވެ.

އެމަނިކުފާނުގެ މި ތަޤްރީރުގައި ދެމެހެއްޓެވި ތަރައްޤީއާއި ޑިމޮކްރަސީގެ ހަމަ ހިފަހައްޓާ ނަމޫނާ ދައްކާ ޤައުމެއްގެ ގޮތުގައި ދިވެހިރާއްޖެ ދެކެން ބޭނުންވާ ކަމަށްވެސް ވިދާޅުވިއެވެ.

"އަޅުގަނޑުމެން ނިންމާ ގިނަ ނިންމުންތަކާއި، މަސައްކަތްކުރާ އެތައް ގަޑިއިރެއްގެ ތެރޭން، ތަރައްޤީވެފައިވާ ޤައުމަކަށް ވުމަކީ، ވަރަށް ބުރަ މަސައްކަތެއް ކަމުގައި ހީވިޔަސް، އަދި ވަރަށް ދުރު ފުރުޞަތެއް ކަމުގައި ވިޔަސް، އަޅުގަނޑު ތިޔަބޭފުޅުންނަށް ދަންނަވާނީ، މިއީ އަމާޒަކާއެކު ޙާސިލްކުރެވޭނެ ކަމެކޭ. ރައީސުލްޖުމްހޫރިއްޔާ ވިދާޅުވިއެވެ.

އދގެ 79 ވަނަ އާއްމު މަޖިލީހުގައި ރައީސް ތަޤުރީރު ކުރައްވަނީ - ފޮޓޯ ރައީސް އޮފީސް

އދގެ 79 ވަނަ އާއްމު މަޖިލީހުގައި ދެއްވި ތަޤުރީރު ފައްޓަވަމުން ރައީސުލްޖުމްހޫރިއްޔާ ވަނީ ދުނިޔެއަށް މިވަގުތު ބޮޑެތި މައްސަލަތަކެއް ކުރިމަތިވެފައިވާކަން ފާހަގަކުރައްވާފައެވެ. އަދި އެ މައްސަލަތަކުގެ ސަބަބުން އަސަރުނުކުރާ ޤައުމެއް ނެތްކަމަށްވެސް އެމަނިކުފާނު ވިދާޅުވިއެވެ. މިއަދު އިންސާނިއްޔަތަށް ކުރިމަތިވެފައިވާ ޙާލަތަށް ރިޢާޔަތްކުރައްވާ ރައީސް ވިދާޅުވީ ކާރިސާގެ މި ލިސްޓް ދިގުވަމުން ދާކަމަށެވެ.

"ފަގީރުކަމާއި ބަނޑުހައިހޫނުކަމާއި މޫސުމަށް އަންނަ ބަދަލުތަކާއި ދިރިއުޅުމުގެ އަގުތަކުގެ ޚަރަދާއި ހިޖުރަކުރުމާއި އޮޕިއޮއިޑް އެޑިކްޝަން މިހެން ގޮސް މި ލިސްޓް އަދިވެސް ދަނީ އިތުރުވަމުން. އަޅުގަނޑު އަތުގައި މި އޮތް ޗާޓު ބައްލަވާ، [މިދެންނެވި ފަދަ ކާރިސާ] އަކާ ކުރިމަތި ނުލާ، ހުސް ފެހިކޮށް އޮތް ޤައުމެއް އެބައޮތްތޯ؟ ސަބަބަކީ އަޅުގަނޑުމެން އެންމެން މިތިބީ ރަތް ކުލައިގައި. ރައީސް ވިދާޅުވިއެވެ.