އިސްރާއީލްގެ ''ގްރޭޓަރ އިސްރާއީލް'' (ބޮޑު އިސްރާއީލް) ވިޝަން އަށް މިސްރުން ދެކޮޅުހަދާކަން ހާމަކޮށްފިއެވެ.

މިސްރުގެ ފޮރިން މިނިސްޓަރ ބަދުރު އަބްދުއްލަތީފް ހޯމަ ދުވަހު ވަނީ ފަލަސްތީނުގެ ބޮޑުވަޒީރު މުޙައްމަދު މުސްތަފާއާއެކު ބްލޮކޭޑް ކުރެވިފައިވާ ގާޒާ ސްޓްރިޕްގެ ރަފާ ބޯޑަރު ކްރޮސިންގ އަށް ޒިޔާރަތް ކުރަށްވާފައެވެ. އަދި އެތަނުގައި ހުންނަވައި އޭނާ ވަނީ އިސްރާއީލްގެ ''ގްރޭޓަރ އިސްރާއީލް'' ވިޝަންއާއި މިސްރުން ދެކޮޅު ހަދާކަން ހާމަކުރަށްވާފައެވެ.

Ad by Hajj Corporation

"އަޅުގަނޑުމެން ޣާއްޒާއިން ފަލަސްތީނު ރައްޔިތުން ނެރުމަށް ކުރެވޭ އެއްވެސް މަސައްކަތެއް ބަލައެއް ނުގަންނަން،" ބަދުރު އަބްދުއްލަތީފް ވިދާޅުވިއެވެ.

ފާއިތުވި ހަފްތާގައި އިސްރާއީލްގެ ބޮޑުވަޒީރު ބެންޖަމިން ނެތަންޔާހޫ ވަނީ އޭނާ "ގްރޭޓަރ އިސްރާއީލް" ގެ ވިސްނުމާ ވަރަށް ބޮޑަށް ގުޅިފައިވާ ކަމަށް ބުނެފައެވެ. އަދި އޭނާ އަމިއްލަ ނަފްސު ދެކެނީ އެއީ ތާރީޚީ އަދި ރޫޙާނީ މިޝަނެއްގެ ގޮތުގައި ކަމަށް ބުނެފަވެއެވެ.

"މިތަނަށް އައުމަށް ހުވަފެން ދެކުނު ޖީލުތަކެއްގެ ޔަހޫދީންނާއި، އަހަރެމެންގެ ފަހުން އަންނާނެ ޖީލުތަކެއްގެ ޔަހޫދީންނާއެކު" އޭނާ ބުނެފަވެއެވެ.

"ގްރޭޓަރ އިސްރާއީލް" އަކީ އިސްރާއީލްގެ ސިޔާސީ މައިދާނުގައި ބޭނުންކުރާ ބައިބަލްގެ ބަހެކެވެ. މި ބަސް ބޭނުންކުރަނީ އިސްރާއީލްގެ ސަރަޙައްދު ފުޅާކޮށް، ވެސްޓް ބޭންކާއި، ޣާއްޒާއާއި، ސީރިއާގެ ގޮލާން ހައިޓްސްއާއި، މިސުރުގެ ސިނާއީ ޕެނިންސުލާއާއި، އަދި ޖޯޑަންގެ ބައެއް ސަރަޙައްދުތައް ހިމެނުމަށެވެ.

މިސްރުގެ ފޮރިން މިނިސްޓަރު އަބްދުއްލަތީފް އިތުރަށް ފާހަގަކުރެއްވި ގޮތުގައި އިސްރާއީލުން ވަނީ ޣާއްޒާއަށް އިންސާނީ އެހީ ފޯރުކޮށްދިނުމަށް ހުރަސްތަކެއް އަޅާފައެވެ.

"އިސްރާއީލްގެ ހުރަސްތައް ނައްތާލެވުމާއެކު މިސުރުން ޣާއްޒާއަށް އިންސާނީ އެހީ ފޯރުކޮށްދިނުމަށް ތައްޔާރަށް މިތިބީ،" އޭނާ އިތުރުކުރެއްވިއެވެ.