އިސްރާއީލުން ފަލަސްތީނުގެ ޣައްޒާގައި ހިންގަނީ ނަސްލު ނައްތާލުމުގެ ލާއިންސާނީ ޢަމަލުތަކެއް ކަމަށާއި، އެ މުޅި ހާދިސާއިން ފެންނަނީ ބައިނަލްއަގުވާމީ ނާއިންސާފު ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް އެފަދައިން ވިދާޅުވީ ރޭ، އެކުވެރި ދައުލަތްތަކުގެ 79 ވަނަ އާންމު ޖަލްސާގައި ތަގުރީރު ދެއްވަމުންނެވެ. އެގޮތުން އިސްރާއީލް އަދި އެ ގައުމަށް ވާގިވެރިވާ އެމެރިކާ ފަދަ ގަައުމުތަކުގެ ކުރިމަތީގައި ރައީސް ވަނީ، ފަލަސްތީނުގެ މައްސަލައިގައި ބޮޑެތި ކަންބޮޑުވުންތަކެއް ފާޅުކުރައްވާފައެވެ.

އެގޮތުން ރައީސް ވިދާޅުވީ، އެއްވެސް ގައުމަކުން އެހެން ގައުމެއްގެ އިންސާނީ ހައްގުތަކަށް އަރައި، އެ ހައްގުތަކުން ނިގުޅައިގުމަތީ ބައިނަލްއަގުވާމީ ދުނިޔެއިން އެކަން ތަހައްމަލުކޮށްގެންވާނެ ކަމެއް ނޫން ކަމަށެވެ. އަދި އެފަދަ ޙާލަތެއްގައި އެ ގައުމެއްގެ ކުޑަ ނުވަތަ ބޮޑު މިނަށް، އަދި އެގައުމެއްގެ މުއްސަނދިކަމަކަށް ބެލިގެން ނުވާނެ ކަމަށްވެސް ރައީސް ވިދާޅުވިއެވެ.

ރައީސް ޑރ. މުޙައްމަދު މުޢިއްޒު، ފަލަސްތީނުގެ ރައީސް މަޙްމޫދު އައްބާސްއާ، އެމެރިކާގައި ބައްދަލުކުރެއްވުން -- ފޮޓޯ/ ރައީސް އޮފީސް

އިސްރާއީލުން ހިންގާ ޖަރިމާތަކަށް އިޝާރަތްކުރައްވަމުން ރައީސް ވިދާޅުވީ، މިއަދު އިސްރާއީލުން ގެންދަނީ އެއްވެސް ކުށެއް ނެތް އަންހެނުންނާއި ކުޑަ ކުދިން ހިމެނޭހެން، އެތައް ބަޔަކު ޝަހީދުކުރަމުން ކަމަށެވެ. އަދި ހަމައެހެންމެ، ފަލަސްތީނުގެ ރައްޔިތުންގެ ގެދޮރާއި، ހޮސްޕިޓަލްތަކާއި އަދި މަދަރުސާތަކަށް ވެސް އެއްވެސް ތަފާތުކުރުމެއް ނެތި ޙަމަލާތައް ދެމުން ކަމަށެވެ. އަދި އެމަންޒަރުތަކުން މިއަދު ފެންނަނީ ބައިނަލްއަގުވާމީ ދުނިޔޭގެ އިންތިހާ ނާއިންސާފާއި، ބައިނަލްއަގުވާމީ ދުނިޔެއަށް އިސްރާއީލުން ގޮންޖަހާ މަންޒަރު ކަމުގައި ރައީސް ވިދާޅުވިއެވެ.

ގެތަކާއި ހޮސްޕިޓަލްތަކާއި ސްކޫލުތައް އދި އިންސާނީ އެހީގެ ވަސީލަތްތައް ތަކުރާރުކޮށް [އިސްރާއީލުން] އެ ގެންދަނީ ހަލާކުކުރަމުން. [ފަލަސްތީނުގެ] ފިރިހެނުންނާއި އަންހެނުންނާއި ކުޑަ ކުދިން ތަކުރާރުކޮށް މަރަމުން. ހާހުން ހާހަށް ޣައްޒާގައި އެތައް ބަޔަކު އެމީހުން ގެންދަނީ މަރަމުން - ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

ރައީސް ވަނީ، މިއަދު ޣައްޒާގެ މައްސަލައިގައި އިސްރާއީލާމެދު ބަހެއް ނުބުނެވި ވަނިކޮށް، އިސްރާއީލުން ލުބުނާނަށް ވެސް ޙަމަލާ ދޭން ފަށާފައިވާކަން ފާހަގަކުރައްވާފައެވެ.

ޣައްޒާގައި ކުޑަ ކުއްޖަކު އުރާލައިގެން މީހަކު

ރައީސްގެ ވާހަކަފުޅުގައި، އިސްރާއީލުން ޙަމަލާދީ، މަރާފައިވާ ލުބްނާން އަދި އަލް-ޖަޒީރާގެ ނޫސްވެރިންގެ ހަނދާން ވެސް އައުކުރެއްވިއެވެ. އަދި އަލް-ޖަޒީރާގެ އޮފީސްތައް ބަންދުކުރުމަށް އިސްރާއީލުން ކުރާ މަސައްކަތްތަކަކީ، އެ ގައުމުން ހިންގާ ޖަރީމާތައް ބައިނަލްއަގުވާމީ ދުނިޔެއަށް ފޮރުވުމަށް ކުރާ ކަމެއް ކަމުގައި ރައީސް ވިދާޅުވިއެވެ.

އެއާއެކު ރައީސް ވަނީ އިސްރާއީލު ޖަވާބުދާރީ ކުރުވުމަށް، ބައިނަލްއަގުވާމީ ދުނިޔެއަށް ގޮވާލައްވާފައެވެ.