ބާސެލޯނާގެ އާ ނޫކޭމްޕް ސްޓޭޑިއަމްގެ މަސައްކަތް ކުރިއަށްދާ ގޮތް ދައްކުވައިދޭ ލީކްވެފައިވާ ފުޓޭޖަކުން ސްޓޭޑިއަމްގެ މިހާރުގެ ހާލަތު ހާމަވެ، ގިނަ ކަންބޮޑުވުންތަކެއް ފާޅުކުރަންފެށުމާއެކު މެނޭޖްމަންޓުން ހޫނުފެނަށް ވެއްޓިއްޖެއެވެ.

ބާސެލޯނާއިން ދަނޑުގެ ހުއްދަތައް ހޯދުމުގައި މުނިސިޕަލްޓީއަށް ހުށަހަޅާފައިވާ ފޮޓޯ ތަކާއި ވީޑިއޯތަކުގެ އިތުރުން ހުށަހެޅި ހެކިތަކާއި ފުށޫއެރުންތަކެއް މިވީޑިއޯތަކުގައި ހުރިކަމަށް ބުނެވެއެވެ. އެހެންކަމުން އަންނަ މަހުގެ މެދުތެރޭގައި ހުޅުވަން ރޭވިފައިވާ ސްޓޭޑިއަމް މި ފުޓޭޖުގެ ސަބަބުން ކުލަބުން އަލުން ސްޓޭޑިއަމް ހުޅުވުން އިތުރަށް ލަސްކުރަން ޖެހިދާނެ ކަމަށް ބުނެވެއެވެ.

Ad by Hajj Corporation

ބާސެލޯނާގެ ސްޓޭޑިއަމްގެ މަރާމާތުގެ މަސައްކަތައް 2023 ވަނަ އަހަރުންފެށިގެން ކުޅެމުން އަންނަނީ މޮންޖުއިކް ސްޓޭޑިއަމްގައެވެ. ކުލަބުގެ 125 ވަނަ އަހަރީ ދުވަސް ފާހަގަކުރުމަށް 2023 ވަނަ އަހަރުގެ ނޮވެމްބަރު މަހު ސްޓޭޑިއަމް ހުޅުވުމަށް ރޭވި ނަމަވެސް، އެ ތާރީޚަށް މަސައްކަތް ނިންމާލެވިފައެއް ނުވެއެވެ.

އޭގެ ފަހުން 2024 ވަނަ އަހަރުގެ މެއި 10 ގައި ބޭއްވުމަށް ހަމަޖެހިފައިވާ އެލް ކްލާސިކޯއަށް ސްޓޭޑިއަމް ހުޅުވުމަށް އަމާޒުކުރި ނަމަވެސް، އެ ތާރީޚުވެސް ފަހަނައަޅައި ގޮސްފައިވެއެވެ. އެންމެ ފަހުން އޮގަސްޓް 10 އަށް ކަނޑައެޅި ތާރީޚުވެސް ވަނީ ބަދަލުކުރަން ޖެހިފައެވެ.

ލީކްވެފައިވާ ފުޓޭޖުން ދައްކާގޮތުގައި ސްޓޭޑިއަމްގެ ދަނޑުގައި ވިނަ އިންދާފައި ނުވާއިރު، ކޮންކްރީޓް ސަރަހައްދުތައް ހާމައަށް ފެންނަން ހުއްޓެވެ. ޑަގްއައުޓްގެ ފަރުނީޗަރުތައް ހަރުކޮށްފައި ނުވާއިރު، ސްޓޭޑިއަމްގެ އެތެރޭގައި ކަރަންޓް ވައިރުތައް ސީލިންގުން ދަށަށް ދޫވެފައި ހުރި މަންޒަރާއި، ބިލްޑިންގ މެޓީރިއަލްތައް އެކި ތަންތަނަށް އެޅިފައިވާ މަންޒަރު ފެނެއެވެ.

މީގެ އިތުރުން ކޮންކޯސްތައް ނިމިފައި ނުވާއިރު، ފާޚާނާތަކުގެ މަސައްކަތްވެސް ކުރިއަށް ގޮސްފައިވަނީ ވަރަށް މަދުންނެވެ. މިހާރުގެ ހާލަތަށް ބަލާއިރު، ކުރިން ވަޢުދުވެފައިވާ ގޮތަށް އަންނަ ސެޕްޓެމްބަރުމަހުގެ 14 ވަނަ ދުވަހު ހުޅުވިދާނެކަމަށް މިހާރު އޮތީ ސުވާލު އުފެދިފައެވެ.
ބާސެލޯނާ މި ސީޒަނުގެ ގްރޫޕް ސްޓޭޖުގެ މެޗުތައް އަންނަ މަހުގެ 16 ގައި ފަށާއިރު، އޭގެ ކުރިން ގްރޫޕް ސްޓޭޖު ކުޅޭނެ ދަނޑެއް ކަނޑައަޅަށްޖެހެއެވެ. އަދި ގްރޫޕް ސްޓޭޖު ފެށުމަށްހު، ގްރޫޕް މަރުޙަލާ ނިމެންދެން ޖަވަނަރީ މަހާއި ހަމައަށް ސްޓޭޑިއަމް ބަދަލު ނުކުރެވޭނެއެވެ. އެހެންކަމުން ބާސެލޯނާއިން މިހާރު މިއަހަރުގެ ޗެންޕިއަންސް ލީގުގެ ގްރޫޕް ސްޓޭޖު ކުޅޭނީ މޮންޖުއިކްގައި ކަމަށް ނިންމައި ޔުއޭފާ އަށް ހުށަހެޅުމަށް އަންނަނީ ތައްޔާރުވަމުންނެވެ.