ގައުމީ ފުޓްބޯޅަ ޓީމުގެ ކޯޗަކަށް ތަޖުރިބާކާރު ކޯޗު މުހައްމަދު ޝިޔާޒް (މޯހަން) ހަމަޖައްސައިފިއެވެ.

މޯހަން އަކީ 2008 ވަނަ އަހަރުގެ ސާފް ޗެމްޕިއަންޝިޕުގައި ރާއްޖެއަށް ތަށި ހޯދައިދިން ޓީމުގެ އެސިސްޓެންޓް ކޯޗެވެ.

ދިވެހި ފުޓުބޯޅައަށް މޯހަން ހޯދައިދިން ކާމިޔާބީތަކުގެ ތެރޭގައި ކުލަބު ނިއުރޭޑިއަންޓަށް ކޯޗުކޮށްދީ އެ ކުލަބަށް ދިވެހި ޕްރެމިއާ ލީގާއި ގައުމީ ފުޓްބޯޅަ މުބާރާތް ކާމިޔާބު ކޮށްދީފައިވެއެވެ. އަދި ކުލަބު އީގަލްސް އަށް ކޯޗުކޮށްދީ އެ ކުލަބަށް ޗެރިޓީ ޝީލްޑެއް ވެސް ކާމިޔާބުކޮށްދީފައިވެއެވެ.

މޯހަން މިހާރު ހުރީ އީގަލްސްގެ ކޯޗުކަމުގައެވެ.

އެފްއޭއެމުން ބުނީ މޯހަން އަށް ގައުމީ ކޯޗުކަންދިނީ އަންނަ މަހު ސްރީލަންކާއާ ދެކޮޅަށް ކުޅޭ މެޗުތަކަށާއި ކުރިއަށްއޮތް އޭޝިއަން ކަޕް ކޮލިފައިންގެ މެޗުތަކާއެކު އަންނަ ނޮވެމްބަރު މަހާ ހަމައަށް ކަމަށެވެ.

ގައުމީ ފުޓްބޯޅަ ޓީމުގެ ކޯޗުކަމުގައި އެންމެ ފަހުން ހަވާލުވެ ހުރީ ފުޓްބޯޅަ އަށް 75 އަހަރު ފުރޭ ޑައިމަންޑް ޖުބިލީ ކޮމިޓީގެ ޗެއާމަން ކޯޗު އަލީ ސުޒޭންއެވެ.

Ad by Hajj Corporation