12:40 PM

ދުނިޔޭގެ ފުޓްބޯޅައިގެ މައި އިދާރާ، ފީފާގެ ރައީސް ޖިއާނީ އިންފަންޓީނޯ މި މަހުގެ 24 ވަނަ ދުވަހު ރާއްޖެއަށް ރަސްމީ ދަތުރުފުޅެއް ކުރަން ހަމަޖެހިއްޖެއެވެ.

Ad by Hajj Corporation

މިކަން ޢިއުލާން ކުރަށްވަމުން ފުޓްބޯލް އެސޯސިއޭޝަން އޮފް ދަ މޯލްޑިވްސް (އެފްއޭއެމް) ގެ ރައީސް، އަހުމަދު ތޯރިގު (ޓޮމް) ވިދާޅުވި ގޮތުގައި މިއީ ދިވެހި ފުޓްބޯޅައިގެ ތާރީޚުގައި ވަރަށް މުހިންމު ދުވަހެކެވެ.

މި ދަތުރުފުޅަކީ މުޅި ގައުމުގައި ފުޓްބޯޅަ އިތުރަށް ކުރިއެރުވުމަށް އާ އަޒުމަކާއެކު މަސައްކަތްކުރުމުގެ ނިޝާނެއް ކަމަށާއި، މި ޒިޔާރަތުގެ ސަބަބުން ދިވެހިރާއްޖޭގައި ފުޓްބޯޅަ ތަރައްޤީކުރުމުގެ މަސައްކަތް އަވަސްވެގެންދާނެ ކަމަށް ޓޮމް ފާހަގަކުރެއްވިއެވެ.

19 އަހަރު ފަހުން ފީފާގެ ރައީސަކު ރާއްޖެއަށް ކުރައްވާ ފުރަތަމަ ދަތުރު ކަމަށްވާ މި ދަތުރުފުޅުގައި، ފީފާއިން އެފްއޭއެމްއާއެކު އޮތް ގުޅުން އިތުރަށް ހަރުދަނާވެގެންދާނެ ކަމަށް އެފްއޭއެމްގެ ރައީސް ވިދާޅުވިއެވެ.

އިންފަންޓީނޯގެ މި ދަތުރުފުޅުގައި ރާއްޖޭގެ ފުޓްބޯޅައިގެ ވަސީލަތްތައް އިތުރަށް ތަރައްޤީކުރުމާ ގުޅޭ ގޮތުން މުހިންމު މަޝްވަރާތަކެއް ކުރިއަށް ގެންދެވޭނެ ކަމަށް އެފްއޭއެމްއިން ބުނެފައިވެއެވެ. މީގެ އިތުރުން ރާއްޖޭގެ ފުޓްބޯޅައިގެ ކުރިމަގާ ގުޅޭ ގޮތުން ވެސް މަޝްވަރާކުރެވޭނެ ކަމަށް އެ އެސޯސިއޭޝަނުން މަޢުލޫމާތު ދީފައިވެއެވެ.

ފީފާގެ ރައީސްގެ މި ތާރީޚީ ދަތުރުފުޅާ ގުޅިގެން ރާއްޖޭގެ ފުޓްބޯޅައަށް އާ ހިތްވަރަކާއި ކުރިއެރުންތަކެއް ލިބިގެންދާނެ ކަމަށް ފުޓްބޯޅަ ލޯބިވާ ފަރާތްތަކުން އުންމީދު ކުރެއެވެ.

މިއީ ފީފާގެ ރައީސަކު ރާއްޖެ ވަޑައިގަންނަވާ ދެ ވަނަ ފަހަރެވެ. މީގެ ކުރިން ފީފާގެ އެއިރުގެ ރައީސް ސެޕް ބެލްޓާ ވަނީ ސުނާމީގައި ގެއްލުން ލިބުނު ގައުމުތަކަށް ކުރެއްވި ދަތުރެއްގެ ތެރެއިން 2006 ގައި ދެ ދުވަހަށް ރާއްޖެ ޒިޔާރަތްކުރައްވައިފަ އެވެ.