ބްރެޒިލްގެ ފުޓްބޯޅަ ލެޖެންޑް ރޮނާލްޑީނިއޯ، ކުޅުން ހުއްޓާލާފައި އޮތް އޮތުން ނިމުމަކަށް ގެނެސް އިޓަލީގެ ތިންވަނަ ޑިވިޝަންގެ ކްލަބެއް ކަމަށްވާ ރަވޭނާއާ ގުޅިއްޖެއެވެ. 2002 ވަނަ އަހަރުގެ ވޯލްޑް ކަޕް ކާމިޔާބުކުރި ތަރި، އުމުރުން 46 އަހަރުގައި އަލުން ފުޓްބޯޅައަށް އެނބުރި އައުމަށް ނިންމި މި ނިންމުމަކީ ގިނަ ބަޔަކަށް ލިބުނު ބޮޑު ސިހުމެކެވެ.

ބާސެލޯނާ އަދި ޕީއެސްޖީގެ ކުރީގެ ތަރި ރޮނާލްޑީނިއޯ ފުޓްބޯޅަ ކުޅުން ރަސްމީކޮށް ހުއްޓާލީ 2018 ވަނަ އަހަރުއެވެ. ނަމަވެސް އޭނާ އެންމެ ފަހުން ވާދަވެރި މެޗެއް ކުޅެފައިވަނީ 2015 ވަނަ އަހަރު ފްލުމިނެންސޭއަށް ކުޅުމަށްފަހުއެވެ. އޭގެ ފަހުން އޭނާ ވަނީ މެކްސިކޯގެ ކްއެރެޓާރޯ އަދި ބްރެޒިލްގެ ފްލެމެންގޯ ފަދަ ކްލަބްތަކަށް ކުޅެފައެވެ.

Ad by Hajj Corporation

މި އެއްބަސްވުމާ ގުޅޭގޮތުން ވާހަކަ ދައްކަމުން ރޮނާލްޑީނިއޯ ބުނީ، "އަނެއްކާވެސް ބޯޅައާއެކު ނަށާލުމަށާއި، އިގްނާޒިއޯ އަދި ސިޕްރިއާނީ އާއިލާއާއެކު އައު ސަފްހާއެއް ލިޔުމަށް ކެތްމަދުވެފައިވާ" ކަމަށެވެ. އަދި ފުޓްބޯޅައަކީ އަބަދުވެސް އޭނާއަށް އުފާވެރިކަން ގެނެސްދޭ ކަމެއް ކަމަށާއި، އެ ރޫހު ރަވޭނާއަށް ގެނެސްދޭން ބޭނުންވާ ކަމަށްވެސް އޭނާ ބުންޏެވެ.

ރަވޭނާގެ އޮނަރަރީ ވައިސް ޕްރެޒިޑެންޓް އާރިއޭޑޯ ބްރައިޑާ މި ސޮއިކުރުމަކީ "އާދަޔާ ހިލާފު ސޮއިކުރުމެއް" ގެ ގޮތުގައި ސިފަކޮށްފައިވެއެވެ. ބްރައިޑާ ބުނި ގޮތުގައި ރޮނާލްޑީނިއޯ އަކީ އުމުރެއް ނެތް ޗެމްޕިއަނެކެވެ. އޭނާ މެޗުތަކުގައި ކުޅޭނެތޯ ނުވަތަ ނޫންތޯ އަދި ކަށަވަރު ނުވި ނަމަވެސް، އެއީ ވެދާނެ ކަމެއް ކަމަށް ބްރައިޑާ އިޝާރާތް ކުރިއެވެ.

އިޓަލީގެ ރިޕޯޓްތައް ބުނާގޮތުން، 2026/27 ސީޒަންގައި ރޮނާލްޑީނިއޯ ސެރީ ސީގެ މެޗުތަކުން ފެނުމުގެ ފުރުސަތު ކުޑައެވެ. އޭގެ ބަދަލުގައި އޭނާ ބޭނުންކުރާނީ ކްލަބް އިޝްތިހާރު ކުރުމަށާއި، މާކެޓިންގެ ކަންކަމުގައެވެ. އަދި ބައެއް ހާއްސަ އެގްޒިބިޝަން މެޗުތަކުގައި އޭނާ ކުޅޭނެ ކަމަށް ބެލެވެއެވެ.

ރޮނާލްޑީނިއޯ މިހާރު ވަނީ އެ ކްލަބްގެ ހިއްސާދާރަކަށްވެސް ވެފައެވެ. އޭނާ ކްލަބަށް އިންވެސްޓް ކުރުމުގެ އިތުރުން ބްރޭންޑް އެމްބަސެޑަރެއްގެ ގޮތުގައި މަސައްކަތް ކުރާނެއެވެ. ސަޕޯޓަރުން އޭނާ ދަނޑުމަތިން ފެނުމަށް އުންމީދު ކުރި ނަމަވެސް، މިވަގުތު ބޮޑަށް ބެލެވެނީ އޭނާ ފެންނާނީ ކްލަބްގެ ހިންގުމުގެ ދާއިރާއިން ކަމަށެވެ. ނަމަވެސް ދަނޑުމަތިން ރޮނާލްޑީނިއޯ ފެނުމަކީވެސް ދުރުގައިވާކަމެއް ނޫންކަމަށް ރިޕޯޓްތައް އަންނަނީ ބުނަމުންނެވެ.