ޖުވެންޓަސްގެ ބްރެޒިލްގެ މިޑްފީލްޑަރު ޑަގްލަސް ލުއިޒް، ޕްރިމިއަރ ލީގް ކްލަބް ނޮޓިންގހަމް ފޮރެސްޓަށްބަދަލުވުމަސް އެއްބަސްވެއްޖެއެވެ. މިއެއްބަސްވުމުގެ ދަށުން ފުރަތަމަ އަހަރުގައި ލޯނު އެއްބަސްވުމެއްގެ ދަށުންކުޅެ، ދެވަނަ އަހަރުގައި ދާއީމީކޮށް ގަތުމަށް ފޮރެސްޓް އަށް މަޖުބޫރުވާނެއެވެ.

ލުއިޒް އަނބުރާ ޕްރީމިއަރ ލީގަށް އައީ އެސްޓަން ވިލާއިން ޔުވެންޓަސް އަށް 31.5 މިލިއަން ޔޫރޯއަށް ބަދަލުވިތާ އެންމެ އަހަރެއް ފަހުންނެވެ.

Ad by Hajj Corporation

މި ޓްރާންސްފަރ ފުރަތަމަ ފެށިގެންދާނީ 3 މިލިއަން ޔޫރޯގެ އަހަރު ދުވަހުގެ ލޯނު އެއްބަސްވުމެއްގެ ގޮތުގައެވެ. އަދި ކްލަބުން ކަނޑައަޅާފައިވާ ޝަރުތުތަކެއް ފުރިހަމަވުމުން، 25 މިލިއަން ޔޫރޯ ހަތަރު ބައިކުޅަ ބަޔަށް ބަހާލައިގެން ދައްކާ ގޮތަށް ދާއިމީ އެއްބަސްވުމަކަށް ބަދަލުވާނެއެވެ.

މީގެ އިތުރުން، ކުޅުންތެރިޔާ ވަކި ލަނޑުދަނޑިތަކެއް ޙާޞިލުކުރުމުން އިތުރު 3.5 މިލިއަން ޔޫރޯގެ ބޯނަސްއެއް ލިބޭގޮތަށް ވަނީ ހަމަޖެހިފައެވެ. މި ހުރިހާ އަދަދެއް އެއްކޮށްލުމުން މުޅި ޑީލްގެ ޖުމްލަ އަގު 31.5 މިލިއަން ޔޫރޯއަށް އަރާނެއެވެ.

ޑަގްލަސް ލުއިޒްގެ މި ބަދަލުވުމަކީ ނޮޓިންގހަމް ފޮރެސްޓްގެ މިޑްފީލްޑް ވަރުގަދަކުރުމަށް އެޅޭ މުހިންމު ފިޔަވަޅެއްގެ ގޮތުގައި ބެލެވެއެވެ.މީގެ އިތުރުން ބްރެޒިލްގެ ޤައުމީ ޓީމަށް ކުޅެފައިވާ ލުއިޒް އަށް އަންނަ އަހަރުގައި ބާއްވާ ވޯލްޑްކަޕް ސްކޮޑުން ޖާގަހޯދުމަށް އެޅޭ ވަރަށް މުހިންމު ފިޔަވަޅަކަށްވެގެންދާނެއެވެ.