އިންޓަގްރޭޓެޑް ޓޫރިޒަމްގެ ކޮންސެޕްޓަށް ގދ. ކަނޑެވާރެހާ ތަރައްގީ ކުރަން އެ އަތޮޅު ހޯޑެއްދޫ ކައުންސިލުން ހުޅުވާލައިފިއެވެ.

އެ ކައުންސިލުގެ އިޙްތިސާސުގައި އޮންނަ ކަނޑެވާރެހާގައި ރިސޯޓު ތަރައްގީ ކުރަން ހުޅުވާލީ މިއަދުއެވެ. ރާއްޖެ އަދި ބޭރުގެ ފަރާތްތަކަށް ހުޅުވާލައި އެ ކައުންސިލުން މިއަދު ކުރި އިއުލާނުގައި ވަނީ އެކަމާ ގުޅޭ ކޮންސެޕްޓް އަދި ތަފްސީލުތައް އާންމުކޮށްފައެވެ.

އެގޮތުން އެ އިއުލާނުގައި ބުނީ، އެ މަޝްރޫއާ ގުޅޭ ބީލަން ހުށަހަޅަން ޖެހެނީ މިއަދުން ފެށިގެން މި އަންނަ ނޮވެމްބަރުގެ 17 ވާ އާދިއްތަ ދުވަހުގެ މެންދުރު އެކެއްގެ ކުރިންނެވެ. އަދި އެ މަޝްރޫއާ ގުޅޭ ޕްރީ ބިޑް ބައްދަލުވުމެއް މި އަންނަ މަހުގެ 15 ވާ އަންގާރަ ދުވަހު އޮންނާނެ ކަމަށް ވެސް އެ އިއުލާނުގައި ބުންޏެވެ.

އަދި ބީލަންތައް ހުޅުވުން އޮންނާނީ ނޮވެމްބަރު މަހުގެ 24 ވާ އާދިއްތަ ދުވަހު، ކައުންސިލުން އަންގާ ތަނެއްގައެވެ.

އެ ބީލަމުގައި ހިމެނޭ މުހިންމު ކަންކަމުގެ ތެރޭގައި:

1. ލޭންޑް އިކިއުޒިޝަން ކޯސްޓްގެ ގޮތުގައި 700،000 ޑޮލަރު ދައްކަންޖެހޭ
2. ބިޑް ސެކިއުރިޓީގެ ގޮތުގައި 50،000 ޑޮލަރު ހުށަހަޅަންޖެހޭ
3. އެ ރަށް ކުއްޔަށް ދޭނީ 50 އަހަރަށް
4. ލީސް އެގްރިމެންޓުގައި ސޮއިކުރާތާ 30 މަސް ދުވަހުގެ ތެރޭގައި އެ ރަށް އޮޕަރޭޝަނަށް ގެންދަން ޖެހެއެވެ.

ހޯޑެއްދޫ ކައުންސިލުން އެ މަޝްރޫއު ކުރިއަށް ގެންދަނީ އިކޯ ޓޫރިޒަމްގެ ކޮންސެޕްޓްގެ ތެރެއިންނެވެ. އެ ރަށަކީ ގުދުރަތީ ގޮތުން ރީތި ގޮނޑުދޮށެއް އޮވެމެ، ކަނޑުގެ ދިރުންތަކުން ވެސް މުއްސަނދި ރަށެކެވެ. އެ ރަށުގައި ޖުމްލަ 100 ވިލާ ގާއިމް ކުރަން ނިންމާފައިވާއިރު، ޖުމްލަ ފަސް ވައްތަރެއްގެ ކޮޓަރި އެޅުމަށް ވަނީ ނިންމާފައިއެވެ. އެއީ:

1. ބީޗް ވިލާ އަދި ބީޗް ވިލާ ވިތް ޕްރައިވެޓް ޕޫލް
2. މަލްޓި ބެޑްރޫމް ބީޗް ވިލާސް ވިތް ޕްރައިވެޓް ޕޫލް
3. އޮވާ ވޯޓާ ވިލާސް އަދި އޯވާ ވޯޓާ ވިލާސް ވިތް ޕްރައިވެޓް ޕޫލް

އެ އިއުލާނާއެކު ކައުންސިލުން އާންމު ކުރި ކޮންސެޕްޓްގައި ބުނާ ގޮތުން، އެރަށް ތަރައްގީ ކުރާ ފަރާތަކަށް އެ ރަށުން ރަނގަޅު އާމްދަނީއެއް ލިބޭނެއެވެ. އެގޮތުން އެ ކައުންސިލުގެ އަންދާޒާތަކުން ދައްކާ ގޮތުން، އެވްރެޖް ގޮތެއްގައި ވިލާތައް 1،500 ޑޮލަރަށް ވިއްކައިގެން އަދި އޮކިއުޕަންސީ 70 އިންސައްތައިގައި ހިފަހެއްޓި ނަމަވެސް، ތަރައްގީ ކުރާ ފަރާތަކަށް އަހަރެއްގެ މައްޗަށް 38 މިލިއަން ޑޮލަރުގެ އާމްދަނީއެއް ލިބޭނެއެވެ.

އަދި އޮޕަރޭޝަންގެ ޚަރަދުގެ ގޮތުގައި 50 އިންސައްތަ ކެނޑި ނަމަވެސް، އަހަރެއްގެ މައްޗަށް 19 މިލިއަނާއި 22 މިލިއަން ޑޮލަރުގެ ދެމެދުގެ ފައިދާއެއް ލިބޭނެ ކަމަށް އެ ކައުންސިލުން ދެކެއެވެ.