ރިސޯޓުތައް އަލުން ތަރައްޤީކޮށް ބަންދުކުރަން ދޭ މުއްދަތު ތިން އަހަރަށް ފަސްކޮށް، ރިސޯޓު ކުލި ދެއްކުން ފަސްކުރާ މުއްދަތުވެސް އިތުުރުކުރުމަށް ފަތުރުވެރިކަމާ ބެހޭ ވުޒާރާއިން ނިންމައިފިއެވެ.

އެ ވުޒާރާއިން އިއްޔެ އާންމުކުރި، ފަތުރުވެރިކަމުގެ ބޭނުންތަކަށް ކުއްޔަށް ދޫކޮށްފައިވާ ތަންތަން ތަރައްޤީކުރުމަށް ދީފައިވާ މުއްދަތު އިތުރުކޮށްދިނުމާއި ކުއްޔާއި ޖޫރިމަނާ ފަސްކޮށްދިނުމުގައި ޢަމަލުކުރާނެގޮތުގެ ގަވާއިދަށް ގެނައި އިސްލާހުގެ ދަށުން، ރިސޯޓުތައް ރީޑެވެލޮޕްކުރަން ދޭ މުއްްދަތު ވަނީ އިތުރުކޮށްފައެވެ.

އެ އިސްލާހުގެ ކުރީގެ އިސްލާހުގެ ދަށުން:

1. ރީޑިވެލޮޕް ކުރަން ދެވޭނީ ގިނަވެގެން ދެ އަހަރުގެ މުއްދަތެއް
2. އެހެން ނަމަވެސް އެ މުއްދަތު އިތުރުކުރަން އެދި ހުށަހަޅައިފިނަމަ އިތުރު އެއް އަހަރުގެ މުއްދަތެއް އިތުރުކޮށްދޭ

އެހެން ނަަމަވެސް، އިއްޔެ ގެޒެޓުކުރި އައު އިސްލާހުގެ ދަށުން، ރީޑިވެލޮޕްމަންޓަށް އާންމު އުސޫލުން ތިން އަހަރުގެ މުއްދަތަކަށް ދޭއިރު، މުޅި ތަން ތަޅާލައި، އަލުން އެއްކޮށް ތަރައްގީ ކުރާނަމަ ތިން އަހަރުގެ އިތުރަށް ހަ މަހަށްވުރެ ދިގުނޫން މުއްދަތެއް ދެވޭނެއެވެ.

އެއާއެކު، ރިސޯޓު ތަރައްގީ ކުރުމަށް ހޭދަވާ މުއްދަތުގައިވެސް ކުލި ފަސްކުރުމުގެ އިޚްތިޔާރު ފަތުރުވެރިކަމުގެ ވުޒާރާއަށް ލިބޭ ކަމަށް އެ އިސްލާހުގައިވެއެވެ.

މީގެ އިތުރުން ކަނޑައަޅާފައިވާ މުއްދަތުގައި ރިސޯޓު ހިންގަން ނުފަށައިފިނަމަ، އެތަނުގައި މަސައްކަތްކުރުމަށް ބޭނުންވާ ތަކެއްޗާއި، މަސައްކަތްތެރިން އެތަނުގައި ތިބި ކަމުގެ ލިޔުމެއް ނުވަތަ އިގްރާރެއް އެ ވުޒާރާއަށް ހުށަހެޅުމުން، އެ މުއްދަތު އިތުރުކުރުމުގެ އިޚްތިޔާރު އެ ވުޒާރާއަށް ލިބެއެވެ.

އަދި ހުށަހަޅާ އިގްރާރާ ޚިލާފަށް މަސައްކަތް ކުރިއަށްގެދާނަމަ، އެ މުއްދަތު އުވާލުމުގެ ބާރު ވެސް އެ ވުޒާރާއަށް ލިބެއެވެ.