މި އަހަރުގެ ޕީކް ސީޒަނަށް ފަހު ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ފުރަތަމަ ފަހަރަށް އިތުރުވާން ފަށައިފައިވާ ކަމަށް ފަތުރުވެރިކަމާ ބެހޭ ވުޒާރާގެ ތަފާސް ހިސާބުތަކުން ދައްކައިފިއެވެ.

އެ ވުޒާރާއިން އާންމުކުރި ފަތުރުވެރިކަމުގެ ތަފާސް ހިސާބުތަކުން ދައްކާގޮތުން މި އަހަރުގެ ފުރަތަމަ ކުއާޓަރަށް ފަހު ރާއްޖެއަށް ޒިޔާރަތްކުރާ ފަތުރުވެރިންގެ އަދަދު މަދުވަމުން އައި ނަމަވެސް، މިހިނގާ މަހުން ފެށިގެން އެ އަދަދު ވަނީ އިތުރުވާން ފަށާފައެވެ. އެގޮތުން މި އަހަރުގެ ފެބްރުވަރީގައި ދުވާލެއްގެ މައްޗަށް 7،400 ފަތުރުވެރިން ރާއްޖެއަށް ޒިޔާރަތްކުރިއިރު އެ އަދަދު އޭޕްރީލްއާ ހަމައަށް އައިއިރު 5،600 އަށް މަދުވިއެވެ.

އެއީ މުޅި ފެބްރުވަރީގައި ދެ ލައްކައަށް ވުރެ ގިނަ ފަތުރުވެރިންނަށް ވީއިރު، އޭޕްރީލްގައި ގާތްގަޑަކަށް ދެ ލައްކަ ފަތުރުވެރިންނެވެ. އެ މަހަށް ފަހު ރާއްޖެއަށް ޒިޔާރަތްކުރާ ފަތުރުވެރިން މަދު ވަމުން އައިސް، މޭއި އަދި ޖޫން މަހުގައި ރާއްޖެއަށް ޒިޔާރަތްކޮށްފައިވަނީ މަހަކު ލައްކައެއްހާ ފަތުރުވެރިންނެވެ.

އެހެން ނަމަވެސް، މި މަހުން ފެށިގެން އެ އަދަދު ވަނީ މައްޗަށް ޖެހިފައެވެ. އެގޮތުން މި މަހުގެ 20ގެ ނިޔަލަށް 126،343 ފަތުރުވެރިއަކު ރާއްޖެއަށް ވަނީ ޒިޔާރަތްކޮށްފައެވެ.

ފާއިތުވި ފަސް މަހު ރާއްޖެއަށް ޒިޔާރަތްކުރި ފަތުރުވެރިންގެ އަދަދުތައް:

1. މާރިޗު: 194،227 ފަތުރުވެރިން
2. އޭޕްރީލް: 168،366 ފަތުރުވެރިން
3. މޭއި: 119،875 ފަތުރުވެރިން
4. ޖޫން: 123،284 ފަތުރުވެރިން
5. ޖުލައި: 167،528 ފަތުރުވެރިން

އެ ވުޒާރާއިން އާންމުކުރި ހިސާބުތަކުން ދައްކާގޮތުން، އެ އަދަދުތަކަކީ މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކުރި ފަތުރުވެރިންނަށް ވުރެ 13.6 އިންސައްތަ އިތުރު އަދަދެކެވެ. އެގޮތުން މުޅި ޖުމްލަ މި އަހަރުގެ މިހާތަނަށް 1.3 މިލިއަން ފަތުރުވެރިން ރާއްޖެއަށް ޒިޔާރަތްކޮށްފައިވާއިރު، މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކޮށްފައިވަނީ 1.1 މިލިއަން ފަތުރުވެރިންނެވެ.

މި އަހަރުގެ މިހާތަނަށް ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރީ ޗައިނާއިންނެވެ. އެގޮތުން ކޮވިޑުގެ ފަހުން ޗައިނާގެ މާކެޓަށް ރަނގަޅަށް ހުޅުވި އެ މާކެޓުން ފަތުރުވެރިން އަންނަން ފެށި ފުރަތަމަ އަހަރަށް މި އަހަރު ވާއިރު، މި އަހަރުގެ މިހާތަނަށް ޗައިނާއިން ރާއްޖެއަށް 180،000 އަށް ވުރެ ގިނަ ފަތުރުވެރިން އައިސްފައިވެއެވެ.