ރައްޔިތުންގެ މަޖިލީހުން ދައުރުން ބޭރު ޖަލްސާތަކެއް މި ހަފުތާގެ ތެރޭގައި ބާއްވަން ނިންމައިފި އެވެ.

މަޖިލީހުގެ އިދާރާއިން ބުނީ، މަޖިލީހުގެ ގަވާއިދުގެ 45 ވަނަ މާއްދާގެ (ރ) ގެ ދަށުން، ދައުރުން ބޭރުގައި ޖަލްސާތަކެއް ބޭއްވުމަށް އެދިފަވާ ކަމަށެވެ.

Ad by Hajj Corporation

އެހެން ކަމުން، މި މަހުގެ 27 ވާ ބުދަދުވަހު ދައުރުން ބޭރުގެ ޖަލްސާ އެއް އޮންނާނެ ކަމަށާއި، ޖަލްސާގެ އެޖެންޑާ ފަހުން ހިއްސާ ކުރާނެ ކަމަށް މަޖިލީހުގެ އިދާރާއިން ވަނީ ބުނެފައެވެ. މި ޖަލްސާ ބާއްވަން ނިންމާފައިވާ ސަބަބެއް އަދި މަޖިލީހުގެ އިދާރާއަކުން ހާމަކޮށްފައެއް ނުވެއެވެ.

ރައްޔިތުންގެ މަޖިލީހުގެ ދައުރު ބެހިގެން ވަނީ ތިން ދައުރަކަށެވެ. ފުރަތަމަ ދައުރު ފަށާފައި ވަނީ ފެބުރުއަރީ މަހުގެ 6 ވަނަ ދުވަހު އެވެ. ދެވަނަ ދައުރު ފެށިފައިވަނީ 1 ޖޫން އިން 15 އޮގަސްޓްގެ ނިޔަލަށެވެ.

މަޖިލީހުގެ ދެވަނަ ދައުރު ނިންމައި މެންބަރުން ޗުއްޓީއަށް ވަޑައިގެންފައިވަނީ، މިމަހުގެ 19 ވަނަ ދުވަހުއެވެ.

މެމްބަރުންގެ ޗުއްޓީއަށް ފަހު ތިން ވަނަ ދައުރު ފެށުމަށް ހަމަޖެހިފައި ވަނީ 1 އޮކްޓޫބަރުން ނޮވެމްބަރުގެ ނިޔަލަށެވެ. ނަމަވެސް މި ތާރީހުތަކަށް ބަދަލު އައުމަކީ އެކަށީގެންވާ ކަމެކެވެ.