2024 ވަނަ އަހަރު އޮތް ރައްޔިތުންގެ މަޖިލީހުގެ އިންތިޚާބުގައި ކުޑަހުވަދޫ ދާއިރާއިން ކުރީގެ ރައީސް ޔާމީން އަބުދުﷲ ޔާމީން އަބުދުލްޤައްޔޫމް ދެއްކެވި ކެންޑިޑޭޓަށް ލިބުނީ 10 ވަރަކަށް ވޯޓުކަމަށާއި، މެމްބަރުކަން ލިބުނީ ޔާމީންގެ ފޮޓޯ ދައްކައިގެނެއްނޫންކަމަށް ކުޑަހުވަދޫ ދާއިރާގެ މެމްބަރު ހުސައިން ހަމީދު ވިދާޅުވެއްޖެއެވެ.

މެމްބަރު ހަމީދު މިފަދައިން ވިދާޅުވީ، މެންދުރު ޓީވީން ހުކުރު ދުވަހުގެ ރޭ ގެނެސްދިން ''ޖަވާބު ދާރީ'' ޕްރޮގްރާމްގައި ޕްރެޒެންޓަރ އައިމިނަތު ޝަފާ ކުރި ސުވާލަކަށް ޖަވާބު ދެއްވަމުންނެވެ.

Ad by Hajj Corporation

އެއީ ރައްޔިތުންގެ މަޖިލީހަށް ޕީއެންސީގެ މެމްބަރުން އިންތިޚާބުވީ ''ތިމަން މަނިކުފާނުގެ ފޮޓޯފުޅު ދައްކައިގެން'' ކަމަށް ރައީސް ޔާމީން ވިދާޅުވާތީ، ހަމީދާމެދު ޔާމީނަށް އެހެން ވިދާޅުވާނެ ފުރުސަތު އޮންނާނެތޯ ޕްރެޒެންޓަރ ކުރި ސުވާލެކެވެ.

އެ ސުވާލަށް ޖަވާބު ދެއްވަމުން ހަމީދު ވިދާޅުވީ، އޭނާ އާއި މެދު އެހެން ވިދާޅުވުމުގެ ކުޑަވެސް ފުރުސަތެއް ޔާމީނަށް ނޯންނާނެ ކަމަށެވެ.

''އަޅުގަނޑާއި އެއްކޮށް އަޅުގަނޑާއި ދެކޮޅަށް ވާދަކުރަން ޕީއެންއެފްގެ ކެންޑިޑޭޓެއް ނުކުތް، ރައީސް ޔާމީންގެ ތާއީދާއި،މަދަދާއި އޯޑަރަށް ނުކުންނެވި ކެންޑިޑޭޓެއް ހުރި، ރައީސް ޔާމީންގެ ފޮޓޯ ހިފައިގެން ހިނގެވި ކެންޑިޑޭޓެއް ހުންނެވި، މުޅި ދާއިރާގައި،ކުޑަހުވަދޫ އާއި މާއެނބޫދޫގައި އެ ބޭފުޅާ ހިންގެވި، އެހެންނަމަވެސް އެބޭފުޅާއަށް ލިބިވަޑައިގެންެވި ތާއީދަކީ އެއީ ރައީސް ޔާމީންގެ ތާއީދުކަމަށް ރައީސް ޔާމީން ޤަބޫލުފުޅުކުރަށްވަންޏާ އެއީ ކިތަންމެހާ ވެސް ރަނގަޅުކަމެއް،'' ހަމީދު ވިދާޅުވިއެވެ.

ހަމީދު ވިދާޅުވީ، ޔާމީންގެ ކެންޑިޑޭޓަށް އެ އިންތިޚާބުގައި ލިބުނީ ވަރަށް ކުޑަ ތާއީދެއްކަމަށެވެ.

''އެބޭފުޅާއަށް ލިބިވަޑައިގަތީ ހަ ކެންޑިޑޭޓުން ބައިވެރިވެ ރައްޔިތުންގެ މަޖިލީހުގެ އިންތިޚާބުގައި 10 ވަރަކަށް ވޯޓު، އެހެންވީމަ އަޅުގަނޑު މަގާމަށް އައީ ރައީސް ޔާމީންގެ އެހީތެރިކަމެއް މަދަދެއް އޮވެގެންނެއްނޫން، އަޅުގަނޑާއި ދިމާއަކަށް އެހެނެއް ވިދާޅެއް ނުވޭނެ'' ހަމީދު ވިދާޅުވިއެވެ.

ހަމީދު ވިދާޅުވީ އޭނާ ނޫނަސް ދެން ޕީއެންސީން އިންތިޚާބުވި ކެންޑިޑޭޓުންނާ މެދު ވެސް ޔާމީނަށް އެފަދައިން ވިދާޅު ނުވެވޭނެކަމަށެވެ. ސަބަބެއް ގޮތުގައި އޭނާ ފާހަގަކުރެއްވީ، ސަރުކާރުން ނެރުނު ކެންޑިޑޭޓުން ހޮވުނަނުދޭން ޔާމީން މަސައްކަތް ކުރައްވާފައިވުމާއި، ޔާމީންގެ ތާއީދާއެކު ކެންޑިޑޭޓޫންތަކެއް ޕީއެންސީގެ ކެންޑިޑޭޓުންނާއި ވާދަކޮށްފައި ވުމެވެ. ނަމަވެސް ކާމިޔާބު ލިބުނީ ރައީސް ޑރ. މުޙައްމަދު މުޢިއްޒުގެ ކެންޑީޑޭޓުންނަށް ކަމަށް އޭނާ ވިދާޅުވިއެވެ.

ހަމީދު ވިދާޅުވީ މަޖިލިސް އިންތިޚާބުން ފެނިގެން ދިޔައީ ރައީސް މުޢިއްޒަށާއި، މި ސަރުކާރަށް އެއިރު އޮތް ރައްޔިތުންގެ ތާއީދާއި އިތުބާރު ކަމަށާއި، އެކަން ބަދަލުނުވެ އެ އިތުބާރާއި ތާއީދު މިހާރު ވެސް އެބައޮތްކަމަށް އޭނާ ވިދާޅުވިއެވެ. އަދި ރައީސް މުޢިއްޒުގެ ސާދާކަމާއި ހަރުދަނާ ސިޔާސަތުތައް ރައްޔިތުން ބަލައިގަނެ، 75 މެމްބަރުންނާއެކު މަޖިލީހުގެ ސުޕަރ މެޖޯރިޓީ ރައްޔިތުން އެމަނިކުފާނަށް ދިންކަމަށް ހަމީދު ވިދާޅުވިއެވެ.