ރާއްޖޭގައި ޒާތީ މަޢުލޫމާތު އެއްކުރުމާއި، ޕްރޮސެސްކުރުމާއި، ބޭނުންކުރުމުގެ ހަރުދަނާ ނިޒާމެއް ޤާއިމުކުރުމަށްޓަކައި ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާފައިވާ "ޒާތީ މަޢުލޫމާތު ރައްކާތެރިކުރުމުގެ ބިލު" އަށް ޢާންމުންގެ ޚިޔާލު ހޯދުމަށް ރައްޔިތުންގެ މަޖިލީހުގެ އިދާރާއިން މިއަދު ހުޅުވާލައިފިއެވެ.

ސަރުކާރުގެ ފަރާތުން މި ބިލު މަޖިލީހަށް ހުށަހެޅުއްވީ ހެންވޭރު ހުޅަނގު ދާއިރާގެ މެންބަރު ޢަލީ އިބްރާހިމެވެ. މި ބިލު މަޖިލީހަށް ބަލައިގަތުމަށް ފާސްކުރީ ޖަލްސާގައި ބައިވެރިވެވަޑައިގެންނެވި 66 މެންބަރުންގެ އިއްތިފާގުންނެވެ. ބިލު އިތުރަށް ދިރާސާކުރުމުގެ މަސައްކަތް މިހާރު ކުރިއަށްދަނީ މަޖިލީހުގެ ކަމާގުޅޭ ކޮމިޓީގައެވެ.

Ad by Hajj Corporation

މި ބިލަކީ ރާއްޖޭގައި އުޅޭ މީހުންގެ ޒާތީ މަޢުލޫމާތު ރައްކާތެރިކުރުމަށާއި، އެފަދަ މަޢުލޫމާތު ބޭނުންކުރުމުގައި ހަރުދަނާ ޤާނޫނީ އޮނިގަނޑެއް ޤާއިމުކުރުމަށް ހުށަހެޅި ބިލެކެވެ. މި ބިލު ޤާނޫނަކަށް ވުމުން، ޒާތީ މަޢުލޫމާތު ނިސްބަތްވާ ފަރާތްތަކުގެ ޙައްޤުތަކާއި، އެފަދަ މަޢުލޫމާތު އެއްކުރާ އަދި ޕްރޮސެސްކުރާ ފަރާތްތަކުން އަމަލުކުރަންޖެހޭ އުސޫލުތައް ސާފުކޮށް ކަނޑައެޅިގެންދާނެއެވެ.

މީގެ އިތުރުން، ޒާތީ މަޢުލޫމާތު އެއްކޮށް ބަލަހައްޓާ ފަރާތްތަކުގެ ޒިންމާތައް ބަޔާންކޮށް، އެ ފަރާތްތައް ރެގިއުލޭޓްކުރުމުގެ އުސޫލުތައްވެސް މި ބިލުގެ ދަށުން ތަންފީޛުކުރެވޭނެއެވެ. މިއީ ޒަމާނީ ޓެކްނޮލޮޖީގެ ސަބަބުން މަޢުލޫމާތުގެ ރައްކާތެރިކަން ކަށަވަރުކުރުމަށް ސަރުކާރުން އަޅުއްވާ މުހިންމު ފިޔަވަޅެކެވެ.

މަޖިލީހުގެ އިދާރާއިން ބުނީ، މި ބިލަށް އެއްވެސް ފަރާތެއްގެ ޚިޔާލެއް ނުވަތަ ކަންބޮޑުވުމެއް އޮތްނަމަ، އެ ފުރުޞަތު މިހާރު ހުޅުވާލެވިފައިވާ ކަމަށެވެ. ކޮމިޓީ މަރުހަލާގައި ޢާންމުންގެ ޚިޔާލު ހޯދަނީ ބިލު އިތުރަށް ފުރިހަމަކޮށް، ރައްޔިތުންގެ މަސްލަހަތު ހިމާޔަތްކުރުމުގެ މަޤްޞަދުގައެވެ.