logo
ޚަބަރު

މީޑިއާ ރެގިއުލޭޓްކުރާ ބިލަށް އާންމުންގެ ޚިޔާލު ހޯދަން ކޮމިޓީން ނިންމައިފި

ޢައްފާން މުޙައްމަދު
28 އޯގަސްޓު 2025 - 05:54
މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން މީގެކުރިން ބޭއްވި ބައްދަލުވުމެއްގެ ތެރެއިން --ފޮޓޯ/ މަޖިލިސް
މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން މީގެކުރިން ބޭއްވި ބައްދަލުވުމެއްގެ ތެރެއިން --ފޮޓޯ/ މަޖިލިސް

 މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭޝަންގެ ބިލާ މެދު އާންމުންގެ ޚިޔާޅު ހޯދަން ހުޅުވާލުމަށް ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން ނިންމައިފިއެވެ.

މި ބިލަކީ ރައްޔިތުންގެ މަޖިލީހުގެ ތުޅާދޫ ދާއިރާގެ މެންބަރު ޢަބްދުލްޙަންނާން އަބޫބަކުރު ހުށަހަޅުއްވާފައިވާ ބިލެކެވެ. މި ބިލު މަޖިލީހަށް ބަލައިގަންނަން އަދި ގުޅުންހުރި ކޮމިޓީއަށް ފޮނުވުމާމެދު ގޮތެއް ނިންމުމަށް ބުދަ ދުވަހު މަޖިލިސް ތަޅުމުގައި ނެގި ވޯޓުގައި ބައިވެރިވެވަޑައިގަތް 61 މެމްބަރުންގެ ތެރެއިން 49 މެމްބަރުންގެ ވޯޓުން ވަނީ ނިންމަވާފައެވެ.

Ad by Hajj Corporation

Ad by Hajj Corporation

މިއަދު ބޭއްވި ކޮމިޓީ ބައްދަލުވުމުގައި ނިންމާފައި ވަނީ މިއަދުން ފެށިގެން، ސެޕްޓެމްބަރު މަހުގެ ހަވަނަ ދުވަހުގެ ނިޔަލަށް، އާންމުންނަށް މި ބިލާ މެދު ޚިޔާލު ހުށަހެޅުމަށް ހުޅުވާލާށެވެ. އަދި ގުޅުންހުރި އިދާރާތަކާއި، ވުޒާރާތަކުގެ ވެރިން އަދި ނޫސް މަޖައްލާތަކާ ވެސް މި ބިލާ ގުޅޭގޮތުން މަޝްވަރާކުރުމަށް މިނިވަން މުއައްސަސާތަކާ ބެހޭ ކޮމިޓީން ވަނީ ނިންމާފައެވެ.

އެގޮތުން، މިއީ ޒުވާނުންނާ ގުޅުންހުރި މައްސަލައަކަށްވާތީ، ޔޫތު މިނިސްޓަރ އިބްރާހީމް ވަހީދު (އަސްވާޑު) ވެސް ކޮމިޓީގައި ބައިވެރިކުރައްވައި މަޝްވަރާކުރެއްވުމަށް ވަނީ ނިންމަވާފައެވެ. ފާޙަގަކޮށްލަން ޖެހޭ ގޮތުގައި މިއަދު ހެނދުނު ނޫސްވެރިންތަކެއް މިނިސްޓަރ އިބްރާޙީމް ވަހީދާ މަގުމަތިން ބައްދަލުކުރުމުން އެ ނޫސްވެރިންނާ ވާހަކަދައްކަވަމުން މިނިސްޓަރ ވެސް ވަނީ މި ބިލާ ގުޅޭގޮތުން މަޝްވަރާކުރެއްވުމަށް މަޖިލީހަށް ވަޑައިގަންނަވާނެކަމަށް ވިދާޅުވެފައެވެ.

ކޮމިޓީން ނިންމާފައި ވަނީ އަންނަ ހަފްތާގެ އާދިއްތަ، ހޯމަ އަދި އަންގާރަ ދުވަހުގެ ކޮމިޓީ ބައްދަލުވުންތަކުގައި އެ ފަރާތްތައް ކޮމިޓީއަށް ހާޒިރުކުރުމަށެވެ.

މި ބިލުގެ މަސައްކަތް ކޮމިޓީން ނިންމާލަން ކަނޑައަޅާފައި ވަނީ ސެޕްޓެމްބަރު މަހުގެ 15 ވަނަ ދުވަހުގެ ނިޔަލަށެވެ.

މި ބިލުގައި ބަޔާންކޮށްފައިވާގޮތުގައި ބިލު ޤާނޫނަކަށްވުމާއެކު "މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަން"ގެ ނަމުގައި ކޮމިޝަނެއް އުފެދިގެންދާނެއެވެ. މި ގާނޫނާއެކު މިހާރު އަމަލުކުރަމުންދާ މޯލްޑިވްސް މީޑިއާ ކައުންސިލުގެ ގާނޫނާއި ނޫސް މަޖައްލާފަދަ ތަކެތީގެ ގާނޫނު އުވާލެވި، ބްރޯޑްކާސްޓުކުރުމުގެ ގާނޫނުގެ ބައެއް މާއްދާތައް އުވާލެވޭނެއެވެ. އަދި މި ގާނޫނުތަކުގެ ދަށުން މިހާރު އުފައްދާފައިވާ މީޑިއާ ކައުންސިލާއި ބްރޯޑްކާސްޓިންގ ކޮމިޝަންވެސް އުވިގެންދާނެ ކަމަށް ބިލުގައި ވަނީ ބަޔާންކޮށްފައެވެ.


މި ޤާނޫނު ވުޖޫދުވުމާއެކު އެކުލަވާލާ ކޮމިޝަނަކީ 7 މެންބަރުންގެ މައްޗަށް އެކުލެވިގެންވާ ކޮމިޝަނެކެވެ. އެއީ ރައްޔިތުންގެ މަޖިލީހުގެ ރުހުމާއެކު ރައީސުލްޖުމްހޫރިއްޔާ އައްޔަން ކުރައްވާ 3 މެންބަރުންނާއި މީޑިއާތަކުން އިންތިޚާބުކުރާ 4 މެންބަރުންނެވެ. މި ކޮމިޝަނުގެ ރައީސް، މަޖިލީހުގެ ރުހުމާއެކު ރައީސުލްޖުމްހޫރިއްޔާ އައްޔަން ކުރައްވަންޖެހޭގޮތަށް ބިލުގައި ބަޔާންކޮށްފައިވާއިރު ނައިބު ރައީސް އައްޔަން ކުރައްވާނީ ކޮމިޝަންގެ މެންބަރުންގެ މެދުގައި ނަގާ ވޯޓަކުން ކަމަށްވެސް ވަނީ ބަޔާންކޮށްފައެވެ.

ބިލުގައި މިހެން ބަޔާންކޮށްފައިވީ ނަމަވެސް، މީޑިއާ ކޮންޓްރޯލް ކުރުމުގެ ޝައުގުވެރިކަމެއް ނުގެންގުޅުއްވާކަމަށާއި އެއީ އެއްވެސް އިރަކު އެމަނިކުފާނު ނުކުރައްވާނެ ކަމެއްކަމަށް ހދ. ނޮޅިވަރަންފަރުގެ ރައްޔިތުންނާ ބައްދަލުކުރުމަށް ބޭއްވި ޖަލްސާގައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެފައިވެއެވެ.

ރައީސް ވިދާޅުވީ އެ މަނިކުފާނުގެ އެއްވެސް ކޮންޓްރޯލެއް އޮންނަ ގޮތަށް އެ ބިލް އެކުލަވައިލަން ބޭނުންފުޅު ނުވާ ކަމަށެވެ. އަދި ރައީސްގެ އެއްވެސް ކޮންޓްރޯލެއް ނޯންނާނެ ގޮތަކަށް ބިލު އިސްލާހުކުރަން، ސަރުކާރު މެމްބަރުންނަށް ދަންނަވާފައިވާނެކަމަށް ވެސް ރައީސް ވިދާޅުވިއެވެ.


މީގެ އިތުރުން ނޫސް މަޖައްލާއެއް ތަކުރާރުކޮށް ސުލޫކީ މިންގަނޑާ ހިލާފުވާނަމަ 5000 ރުފިޔާ އާއި 100،000 ރުފިޔާއާ ދެމެދުގެ އަދަދަކުން ޖޫރިމަނާކުރުމުގެ ބާރުވެސް މި ގާނޫނުގެ ދަށުން އުފައްދާ ކޮމިޝަނަށް ލިބޭނެއެވެ. އަދި ގާނޫނާއި ގަވާއިދާ ހިލާފުވާނަމަ މައްސަލަ ނިމެންދެން ވަގުތީގޮތުން ރަޖިސްޓްރީ ބާތިލުކުމާއި ތަކުރާރުކޮށް ގާނޫނާއި ގަވާއިދާ ހިލާފުވާނަމަ ރަޖިސްޓްރީ ބާތިލުކުރުމަށް ކޯޓަށް ދިއުމުގެ ބާރުވެސް ކޮމިޝަނަށް ލިބޭނެއެވެ.

ކޮމިޝަނުން ކަމެއް އިސްލާހުކުރުމަށް އަންގާ މުއްދަތުގެ ތެރޭގައި އެކަމެއް އިސްލާހުނުކޮށްފިނަމަ 5000 ރުފިޔާ އާއި 25،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށްވެސް ބިލުގައި ވަނީ ބަޔާންކޮށްފައެވެ.

ބިލްގައިވާ ގޮތުން އަލަށް އުފައްދާ ކޮމިޝަނަށް ބެލޭނީ ބިލް ތަސްދީގު ކުރާ ދުވަހުގެ ކުރިއަށް އެއް އަހަރަށް ވުރެ ގިނަ ދުވަސް ނުވާ މައްސަލަތަކާއި ތަސްދީގު ކުރާ ފަހުން ހުށަހަޅާ މައްސަލަތަކެވެ. އާ ކޮމިޝަނަށް މެންބަރުން އައްޔަންކުރެވެންދެން ވަގުތީ ގޮތުން ކޮމިޝަން ހިންގާނީ ސިވިލް ސާވިސް ކޮމިޝަނުން ކަނޑައަޅާ ފަސް މެންބަރުންގެ ކޮމިޓީއަކުންނެވެ.

Hajj Corpooration

Hajj Corpooration

ކޮމެންޓް

ގުޅުންހުރި ލިޔުންތައް

މީޑިއާ ރެގިއުލޭޓްކުރާ ބިލަށް އާންމުންގެ ޚިޔާލު ހޯދަން ކޮމިޓީން ނިންމައިފިޚަބަރު | 2 ދުވަސް ކުރިންއެމްއެމްސީ އާއި ބްރޯޑްކޮމް އެއްކޮށްލުމުން ލިބޭނެ ރަނގަޅު ފައިދާތައް ފެނޭ: އިބްރާހީމް ޙުސައިންޚަބަރު | 2 ދުވަސް ކުރިންޖެހިޖެހިގެން ތިން އިންތިޚާބުން އެމްޑީޕީ ބަލިވީމަ ވެސް ކިޔަނީ ''ތާއީދެއް ނެތޭ": ޒަރީރުޚަބަރު | 2 ދުވަސް ކުރިންރައީސް ހާމަކޮށްދެއްވީ ބިލު ތަސްދީގުކުރައްވާނީ ރައްޔިތުންނަށް އެންމެ ލާބަހުރިގޮތަށްކަން: މެމްބަރު ފަލާޙްޚަބަރު | 3 ދުވަސް ކުރިން