އިތުބާރުކުރެވޭ މަގާމެއްގައި ހުރެ، ތިން އަހަރު ދުވަހުގެ މުއްދަތަކަށް ކުޑަކުއްޖަކަށް ޖިންސީ ގޯނާކުރި ކަމުގެ ތުހުމަތުގައި މާލޭގެ ޓިއުޝަން ސެންޓަރެއްގެ ވެރިޔަކު ދިވެހި ފުލުހުންގެ ޚިދުމަތުން ހައްޔަރުކޮށްފިއެވެ.

މި މައްސަލައާ ގުޅިގެން ހައްޔަރުކޮށްފައިވަނީ މާލެ، ހމ. ޚައިރާތު، ޢަލީ އަފްލަޙު (27އ) އެވެ. އޭނާއަކީ ސްކޫލް ކުދިންނަށް އޮންލައިންކޮށް ޓިއުޝަންގެ ޚިދުމަތްދޭ "ބްރައިޓް މައިންޑްސް" އެޑިއުކޭޝަންގެ ވެރިޔާއެވެ.

Ad by Hajj Corporation

ފުލުހުން މަޢުލޫމާތު ދޭ ގޮތުގައި، އަފްލަޙު ހައްޔަރުކޮށްފައިވަނީ 2026 ފެބްރުއަރީ 11 ވަނަ ދުވަހު ކޯޓު އަމުރެއްގެ ދަށުންނެވެ.

އޭނާ ހައްޔަރުކުރީ ރާއްޖެއިން ބޭރުގައި ފިލައިގެން ގިނަ ދުވަސްތަކެއް ވަންދެން އުޅުމަށްފަހު، އިންޑިއާގެ މުމްބާއީން ފްލައިޓެއްގައި އެނބުރި ރާއްޖެ އައުމުން ވެލާނާ އިންޓަރނޭޝަނަލް އެއާޕޯޓުންނެވެ.

އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ކޯޓުން ވަނީ 30 ދުވަހުގެ މުއްދަތަކަށް އޭނާ ބަންދުކުރުމަށް އަމުރުކޮށްފައެވެ.

ޢަލީ އަފްލަޙުގެ މައްޗަށް ތުހުމަތު ކުރެވެނީ، އެ ކުއްޖާގެ އުމުރުން 14 އަހަރުން ފެށިގެން 16 އަހަރާ ދެމެދު، އެކި ދުވަސްމަތިން ތަކުރާރުކޮށް ޖިންސީ ގޯނާކޮށް، ކުއްޖާ "ގްރޫމް" ކުރި ކަމަށެވެ. މި މައްސަލައިގައި އަނިޔާ ލިބުނު ކަމަށް ތުހުމަތު ކުރެވޭ ކުއްޖާ މިހާރު ވަނީ ފުލުހުންނަށް ބަޔާން ދީފައެވެ.

މި މައްސަލައިގެ ތުހުމަތުތައް ފެންމަތިވުމާއެކު، ބްރައިޓް މައިންޑްސް އެޑިއުކޭޝަން ޕްރައިވެޓް ލިމިޓެޑްގެ ހިއްސާ މިދިޔަ އަހަރުގެ ސެޕްޓެމްބަރު މަހު އަފްލަޙުގެ ބޭބެއާއި ބޭބެގެ އަނބިމީހާގެ ނަމަށް ބަދަލުކޮށްފައިވާކަން ވެސް ވަނީ އެނގިފައެވެ.

ފުލުހުން ގެންދަނީ މި މައްސަލަ އިތުރަށް ތަހުގީގު ކުރަމުންނެވެ.

ކުޑަކުދިންނަށް ކުރާ ޖިންސީ ގޯނާގެ މައްސަލަތަކަކީ ފުލުހުން ވަރަށް ސީރިއަސްކޮށް ބަލަމުންދާ މައްސަލަތަކެކެވެ.