ނެޓްފްލިކްސްގެ މަޝްހޫރު ތަރި، ޓެޒް ސްކައިލާ ވިޒިޓް މޯލްޑިވްސްގެ ގްލޯބަލް އެމްބެސެޑަރެއްގެ ގޮތުގައި ރާއްޖޭގައި ދަތުރެއް ފަށައިފި އެވެ.

ވިޒިޓް މޯލްޑިވްސް ކޯޕަރޭޝަން (ވީއެމްސީ) އިން މަޢުލޫމާތު ދީފައިވާ ގޮތުގައި، ރާއްޖޭގެ ގުދުރަތީ ރީތިކަމާއި ސަގާފީ މުއްސަނދިކަމާއި ދެމެހެއްޓެނިވި ޓޫރިޒަމް އަދި ޚާއްޞަކޮށް އެޑްވެންޗަރ ޓޫރިޒަމްގެ ފުރުސަތުތައް ޕްރޮމޯޓްކުރުމަށް މިދިޔަ ހަފުތާގައި ޓެޒް ވަނީ އެމްބެސެޑަރެއްގެ ގޮތުގައި އައްޔަންކޮށްފައެވެ.

Ad by Hajj Corporation

އަންނަ މަހުގެ 14 އާ ހަމައަށް ދެމިގެންދާ މި ދަތުރުގައި، ޓެޒް ވަނީ ރާއްޖޭގެ އެކި ސަރަހައްދުތަކަށް ޒިޔާރަތްކޮށް، އެޑްވެންޗަރ ޓޫރިޒަމް ޕްރޮމޯޓްކުރުމުގެ ގޮތުން ތަފާތު މޫދު ކުޅިވަރުތަކާއި ކަނޑުއަޑީގެ ހިތްގައިމުކަން ތަޖުރިބާކުރުމަށް ހަމަޖެހިފައެވެ. މީގެ އިތުރުން، ދިވެހި ސަގާފަތާއި އާދަކާދަ ޕްރޮމޯޓްކުރުމަށް މީހުން ދިރިއުޅޭ ރަށްރަށަށް ޒިޔާރަތްކޮށް، ދިވެހީންގެ ދިރިއުޅުމާއި އާދަކާދަ ވެސް ތަޖުރިބާކުރާނެއެވެ.

ވީއެމްސީން ފާހަގަކުރި ގޮތުގައި، އިންސްޓަގްރާމްގައި 1.8 މިލިއަނަށް ވުރެ ގިނަ ފޮލޯވަރުން ތިބި ސްކައިލާގެ ޕޯސްޓުތަކަށް އެވްރެޖްކޮށް 45،000 ލައިކް އަދި 300 އަށްވުރެ ގިނަ ކޮމެންޓް ލިބެއެވެ. މިފަދަ ނުފޫޒެއް އޮތް ތަރިއެއްގެ ސަބަބުން،ވިޒިޓް މޯލްޑިވްސް އަށް އާ ބައިނަލްއަގުވާމީ އޯޑިއަންސްތަކަކާ ހަމައަށް ރާއްޖޭގެ ޓޫރިޒަމްގެ ވާހަކަތައް ގެންގޮސްދިނުމުގެ ފުރުސަތު ލިބޭނެ ކަމަށް ވީއެމްސީން ބުނެފައިވެއެވެ.

ތާރިޤް ޔާސިން (ޓެޒް ސްކައިލާ) އަކީ ލަންޑަންގައި ދިރިއުޅޭ ބްރިޓިޝް-ސްޕެނިޝް އެކްޓަރެއް އަދި ސްކްރީންރައިޓަރެކެވެ. އޭނާ އުފަން އަދި ބޮޑުވެފައިވަނީ ކެނަރީ އައިލެންޑްސްގެ ޓެނެރީފޭގައެވެ. އޭނާގެ ބައްޕައަކީ ސިއެރާ ލިއޯނިއަން-ލެބަނީޒް އަޞްލަކަށް ނިސްބަތްވާ މީހެކެވެ. އަދި އޭނާގެ މަންމައަކީ އިނގިރޭސިވިލާތުގެ މީހެކެވެ.

ސްކައިލަރގެ ކެރިއަރ ފެށުނީ އިނގިރޭސިވިލާތުގައެވެ. އެތާނގައި އޭނާ ކުރު ފިލްމުތަކުގައި އެކި ކުދިކުދި ރޯލުތައް ކުޅެފައިވެއެވެ. އޭނާ އަމިއްލައަށް ލިޔެ އަދި ޕްރޮޑިއުސްކުުރި މަސައްކަތްތަކުގެ ތެރޭގައި "ދަ ރިޒަރވްސް" މި ނަމުގެ ކުރު ފިލްމާއި "ވޯހެޑްސް" މި ނަމުގެ ޑްރާމާ ހިމެނެއެވެ. އޭނާއަށް އެންމެ ބޮޑު މަޝްހޫރުކަމެއް ލިބުނީ ނެޓްފްލިކްސްގެ "ވަން ޕީސް" (2023) ސީރީޒްގައި ސަންޖީގެ ދައުރު އަދާކުރުމުންނެވެ. މީގެ އިތުރުން އޭނާ ވަނީ އެމޭޒަން ޕްރައިމްއަށް "ގޭސްޑް އަޕް" ލިޔުމުގައި ބައިވެރިވެ އަދި އެ ފިލްމުގައި ތަމްސީލުކޮށްފައެވެ. އަދި "ދަ ކިލް ޓީމް"، "ވިލެއިން" އަދި "ކްލީނަރ" ފަދަ ފިލްމުތަކުގައިވެސް ފެނިފައިވެއެވެ.

އޭނާގެ އުފެއްދުންތެރި މަސައްކަތްތަކުގެ އިތުރުން، ސްކައިލަރ އަކީ ސްކައިޑައިވިންގ އަދި ސަރފިންގ ފަދަ ކުޅިވަރުތަކަށް ޝައުޤުވެރިކަން ހުންނަ މީހެކެވެ.