ނިއު ރޭޑިއަންޓް ސްޕޯޓްސް ކްލަބުގެ ތާރީޚުގައި އެންމެ ފާހަގަކޮށްލެވޭ އަހަރުތަކުގެ ތެރެއިން އެއް އަހަރު ކަމުގައިވާ 1995 ވަނަ އަހަރުގެ ސީޒަނުން އިންސްޕަޔާވެގެން ކުރިޔަށް އޮތް ސީޒަނަށް ފަރުމާކޮށްފައިވާ 2025/26 ވަނަ އަހަރުގެ ހޯމް ކިޓް ނެރޭން ކުލަބުން ތައްޔާރުވާން ފަށައިފިއެވެ. މި ކިޓަކީ އޭރު ކްލަބުގެ ކާމިޔާބީތަކާއި ފަޚުރުވެރި ތާރީޚު ދައްކުވައިދޭ ރަންޒަމާނުގައި ނިއު އިން ބޭނުންކުރި ކިޓް ރަމްޒުކޮށްދޭނެ ކިޓެއްކަމުގައި ނިއުރޭޑިއަންޓުން ޤަބޫލުކުރެއެވެ.

1995 ވަނަ އަހަރަކީ ނިއު ރޭޑިއަންޓަށް އެތައް ކާމިޔާބީތަކެއް ހޯދި އަހަރެކެވެ. އެ އަހަރު ޕޮމިސް ކަޕް ފައިނަލްގައި ވިކްޓްރީ އާއި ވާދަކޮށް، 1-1 އިން މެޗު އެއްވަރުވުމަށްފަހު ޕެނަލްޓީ ޝޫޓްއައުޓުން 4-2 އިން މެޗު ކާމިޔާބުކޮށް، އެ މުބާރާތުގެ ޗެމްޕިއަންކަން ހޯދިއެވެ. މީގެ އިތުރުން އެ އަހަރު މޯލްޑިވްސް ނެޝަނަލް ޗެމްޕިއަންޝިޕް/ޕްރެޒިޑެންޓްސް ކަޕްވެސް ކާމިޔާބުކުރިއެވެ.

Ad by Hajj Corporation

ބައިނަލްއަޤްވާމީ ފެންވަރުގައިވެސް އެ އަހަރަކީ ނިއު ރޭޑިއަންޓަށް ފާހަގަކޮށްލެވޭ އަހަރެކެވެ. އޭޝިއަން ކަޕް ވިނާސް ކަޕްގައި ކުއާޓަރ ފައިނަލާ ހަމައަށް ދަތުރުކުރި ނިއު ރޭޑިއަންޓުން، 1995 އޮކްޓޯބަރު 13 ވަނަ ދުވަހު އިންޑިއާގެ މަޝްހޫރު ކްލަބް އީސްޓް ބެންގާލް އާ ވާދަކޮށް 3-0 އިން މެޗު ކާމިޔާބުކުރިއެވެ.

ނިއުރޭޑިއަންޓް އާއި އައު ޗެއާމަން ހަވާލުވިފަހުން މިވީ ކުޑަދުވަސްކޮޅުގެ ތެރޭގައި ޓީމަށް ބޮޑެތި އިންގިލާބީ ކުރިއެރުން ތަކެއް ދަނީ ހޯދަމުންނެވެ. މިގޮތުން ކުރިޔަށް އޮތް ސީޒަނަށް ތައްޔާރުވުމުގެ ގޮތުން ނިއު އިން ވަނީ ރާއްޖޭގެ ކުލަބް ފެންވަރުގެ އެންމެ ކާމިޔާބު ކޯޗު އަލީ ސުޒޭނާއެކު އަލީ އަޝްފާޤު (ދަގަނޑޭ) އާއި އަލީ ފާސިރު (ސެންޓޭ) އާއި އަހުނަފް ރަޝީދު (އަހުއްކޮ) އާއި މުހައްމަދު ނިޒާމް (ޕީކޭ) އާއި މުޙައްމަދު އިރުފާންގެ އިތުރުން ހަސަން ރާއިފް (ހަންނާ) ކުލަބާއި ގުޅުނުކަން އިޢުލާން ކޮށްފައެވެ.

އައު މެނޭޖްމަންޓުން ވަނީ ކުރިޔަށް އޮތް ސީޒަނުގައި ރަނގަޅު ނަތީޖާތަކެއް ހޯދައި، ފުޓްބޯޅައިގެ ފޯރިއާއި ޖޯޝު އަލުން ގަލޮޅު ދަނޑަށް ގެނައުމަށް އަމާޒު ހިފާފައެވެ. މިގޮތުން ރާއްޖޭގެ ނަން މަޝްހޫރު މޮޅެތި ގިނަ ކުޅުންތެރިންތަކެއް ނިއުރޭޑިއަންޓާ ގުޅިފައިވުމާއެކު، ކުރިޔަށް އޮތް ސީޒަނުގައި ގަލޮޅު ދަނޑު ކައްކާލުމަށް ޓީމު މިހާރު އޮތީ ތައްޔާރަށެވެ.