ކުޅުދުއްފުށި ސިޓީގައި ގާއިމުކުރާ ސިންތެޓިކް ޓްރެކްގެ މަސައްކަތް ލަސްވެގެން ޑިސެމަބަރު މަހު އެޅޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ ހދ. އަތޮޅުގެ ރަށްތަކަށް ކުރެއްވި ދަތުރުފުޅުގެ ތެރެއިން ކުޅުދުއްފުށި ސިޓީއަށް ވަޑައިގެން އެރަށުގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.

Ad by Hajj Corporation

ކުޅުދުއްފުށި ސިޓީގެ ރައްޔިތުންނާ ބައްދަލުކުރައްވާ ރައީސް ވިދާޅުވީ، ކުޅިވަރުގެ ދާއިރާއިން ރާއްޖެއަށް ގެންނަމުންދާ ތަރައްގީތަކުގެ ތެރެއިން އެންމެ ލަސްވެފައިވާ މަޝްރޫއަކީ ސިންތެޓިކް ޓްރެކް ގާއިމުކުރުންކަމަށާއި، އެހެންނަމަވެސް ސަރުކާރުގެ މިހާރުގެ ވިސްނުމަކީ މިމަޝްރޫއު ދިގުލައިގެން ދިޔަނުދީ ވީހާވެސް އަވަހަކަށް މިމަސައްކަތުގެ އަމަލީ މަސައްކަތް ފެށުންކަމަށެވެ.

ރައީސް ވިދާޅުވީ މިމަޝްރޫއުގެ ސަބަބުން އެތުލެޓިކްއަށް ވަރަށް ބޮޑު ކުރިއެރުމެއް އަންނާނެކަމަށް ގަބޫލުފުޅުކުރައްވާކަމަށެވެ. އަލަށް ގާއިމުކުރުމަށް ހަމަޖެހިފައިވާ ސިންތެޓިކް ޓްރެކްތަކުގެ ސަބަބުން އެތުލީޓުންނަށް ތަމްރީނުތައް ހެދުމަށް ލުއިފަސޭހަވެ މިކުޅިވަރުން އައު ކުޅުންތެރިންތަކެއް އުފަންވެގެންދާނެކަމަށް ރައީސް ހާމަކުރެއްވިއެވެ.

ރައީސް ވިދާޅުވީ ކުޅުދުއްފުށީ ސްޕޯޓްސް ކޮމްޕްލެކްސް ތަރައްޤީކުރެއްވުމުގެ މަޝްރޫޢުގެ އިތުރުން، ފުޓުބޯޅަ އާއި ހޭންޑް ބޯލް ކުޅޭ ޑުއަލް ދަނޑެއްގެ މަސައްކަތްވެސް ކުރިއަށްގެންދަވާނޭ ކަމަށެވެ. މީގެ އިތުރުން ސިންތެޓިކް ޓްރެކްގެ މަސައްކަތް ޑިސެމްބަރު މަހު ފައްޓަވައި، އަންނަ މަހު ބާއްވާ ކޮމަންވެލްތު ބީޗް ހޭންޑްބޯލް ޓޯނަމަންޓަށް އަމާޒުކުރައްވައިގެން ބީޗް ހޭންޑްބޯލް ސްޓޭޑިއަމެއް ޤާއިމުކުރައްވާނޭކަމަށް އެ މަނިކުފާނު ވިދާޅުވިއެވެ.