މިއީ އިންސާނަކަށް ކެތްވާވަރުގެ ތަނެއް ނޫން، ބައެއްފަހަރު ކުލަބު ދޫކޮށްލަން ބޭނުންވޭ - އަމޮރިމް
30 އޯގަސްޓު 2025 - 07:39

މެންޗެސްޓަރ ޔުނައިޓެޑްގެ ކޯޗުގެ މަޤާމުން އިސްތިއުފާދޭން ބޭނުންވާ ކަމަށް ރޫބެން އަމޮރިމް ހާމަކޮށްފިއެވެ. މިގޮތަށް އޭނާ މި ވާހަކަ ދައްކާފައިވަނީ ހަތަރުވަނަ ޑިވިޝަނުގެ ގްރިމްސްބީ ޓައުންއާ ދެކޮޅަށް ކެރަބާއޯ ކަޕްގައި ކުޅުނު މެޗުން ޕެނަލްޓީ ޝޫޓްއައުޓުން ބަލިވުމަށް ފަހުއެވެ. މިއީ މެންޗެސްޓަރ ޔުނައިޓެޑް މިހާ ދަށުޓީމެއްގެ އަތުން ބަލިވި ފުރަތަމަ ފަހަރެވެ.
ނިމިދިޔަ ނޮވެމްބަރު މަހު އެރިކް ޓެން ހާގްގެ ބަދަލުގައި ޔުނައިޓެޑްގެ ކޯޗުކަމަށް އައްޔަންކުރެވުނު އަމޮރިމްގެ ދަށުން މިހާތަނަށް ކުޅުނު 45 މެޗުން ކާމިޔާބުކުރެވިފައިވަނީ އެންމެ 17 މެޗެވެ. އަދި 19 މެޗުން ބަލިވެ، 9 މެޗު އެއްވަރުވެފައިވެއެވެ.

Ad by Hajj Corporation
"ބައެއް ފަހަރު އަހަރެން ބޭނުންވޭ އިސްތިއުފާދޭން، އަނެއްބައި ފަހަރު 20 އަހަރު ވަންދެން މިތާ ހުންނަން ބޭނުންވޭ. ބައެއް ފަހަރު ކުޅުންތެރިންނާއެކު މަސައްކަތްކުރަން ވަރަށް ރަނގަޅު، އަނެއްބައި ފަހަރު އެމީހުންނާއެކު އުޅޭކަށް ބޭނުމެއް ނުވޭ،" އަމޮރިމް އުދާސްތައް ބޭރުކުރަމުން ބުންޏެވެ. ގްރިމްސްބީ ޓައުންއާއި ދެކޮޅަށް ކުޅުނު މެޗުގައިވެސް އަމޮރިމް ޕެނަލްޓީ ޝޫޓު ބަލާފައެއް ނުވެއެވެ. އެއީ އަމޮރިމް ބުނާގޮތުން ހިތަށް ކެތްވާވަރުގެ ކަމެއް ނޫނެވެ.
މިދިޔަ ސީޒަނުގައި ރެލިގޭޝަން ޒޯނާއި ގާތުން 15 ވަނަ ލިބިފައިވާއިރު، މިސީޒަނުގައި މިހާތަނަށް ކުޅުނު 3 މެޗުންވެސް މޮޅެއް ލިބިފައެއް ނުވެއެވެ. އަދި އޭޕްރީލް މަހުން ފެށިގެން ޕްރިމިއަރ ލީގުގައި އެންމެ މަދުން ޕޮއިންޓް ހޯދި ޓީމަކީވެސް ޔުނައިޓެޑެވެ. މިސީޒަނުގައި ޔޫރަޕުގެ އެއްވެސް މުބާރާތަކަށް ކޮލިފައިވެފައިނުވާ ޔުނައިޓެޑަށް ބާކީ އޮތީ އެންމެ ދެ މުބާރާތެވެ.
ފާގަސަން ޔުނައިޓެޑް ދޫކޮށްލިފަހުން ބޮޑު އަނދަވަޅަކަށް ވެއްޓިފައިވާ ޔުނައިޓެޑަށް އެންމެ ފަހުން ލީގު ނެގިފައިވަނީ މީގެ 13 އަހަރުކުރިންނެވެ. އެހެންކަމުން އަމޮރިމް އާއެކު ޔުނައިޓެޑްގެ މުސްތަޤުބަލު ބަދަލުވާނެކަމަށް ޔުނައިޓެޑުގެ ސަޕޯޓަރުން އުއްމީދުކުރިނަމަވެސް، އަދި އެހުވަފެންތަކުގެ ކުލަޖެހޭތަން ފެންނަމުން ނުދެއެވެ.