އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ (ޑަބްލިއުޑީސީ) ބަޖެޓު ދެގުނަ ބޮޑުކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައި ހުކުރުދުވަހުގެރޭ އެކަން ޢިއުލާންކުރަށްވައިފިއެވެ.

އެކަން ޢިއުލާންކުރަށްވަމުން ރައީސް ހުކުރުދުވަހުގެރޭ ސޯޝަލްމީޑިއާގައި ކުރެއްވި މެސެޖެއްގައި ވިދާޅުވީ، އަންހެނުންގެ ތަރައްޤީއަށް މަސައްކަތްކުރާ ކޮމިޓީތައް އިތުރަށް ބާރުވެރި ކުރުވުމަށްޓަކައި، 2026 ވަނަ އަހަރަށް ބަޖެޓު ހުށަހެޅުމުގެ ކުރިން، ދެ ބަދަލެއް ގެނައުމަށް ނިންމަވާފައިވާ ކަމަށެވެ.

މިގޮތުން އެމަނިކުފާނު ޢިއުލާންކުރެއްވި ބަދަލުތަކުގެ ތެރެއިން އެއް ބަދަލަކީ، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ބަޖެޓުގެ ގޮތުގައި، ކައުންސިލްގެ ބަޖެޓުން ދެމުން ގެންދާ 5% (ފަސް އިންސައްތަ) ދެގުނަ ބޮޑުކޮށް، %10 (ދިހަ އިންސައްތަ) އަށް ބަދަލުކުރުމެވެ. މިއީ ޑަބްލިއުޑީސީތަކަށް އެބޭފުޅުންގެ ރާވައިފައިވާ މަޝްރޫޢުތަކާއި ހަރަކާތްތައް ހިންގުމަށް އިތުރު މާލީ ވަޞީލަތްތަކެއް ފަހިކޮށްދޭނެ ކަމެކެވެ.

Ad by Hajj Corporation

ދެވަނަ ބަދަލަކީ، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރުންނަށް ދޭ ރަމަޟާން މަހުގެ އެލަވަންސް، އެ ކޮމިޓީގެ ބަޖެޓުން ދިނުމުގެ ބަދަލުގައި ކައުންސިލްގެ ބަޖެޓުގެ ތެރެއިން ހަމަޖެއްސުމެވެ. މިކަމުގެ ސަބަބުން ޑަބްލިއުޑީސީ ބަޖެޓުން އެލަވަންސަށް ކުރެވޭ ޚަރަދު ކުޑަވެ، އެ ފައިސާ ކޮމިޓީގެ ތަރައްޤީގެ މަސައްކަތްތަކަށް ބޭނުންކުރެވޭނެ ފުރުޞަތު އިތުރުވެގެންދާނެއެވެ.

ރައީސްގެ ދުރުވިސްނޭ ސިޔާސަތުގެ ދަށުން ގެންނެވި މިބަދަލުތަކުގެ ސަބަބުން ޑަބްލިއުޑީސީތަކުގެ މަސައްކަތަށް އިތުރު ކުރިއެރުމެއް ލިބި، ރަށްރަށުގެ ތަރައްޤީގައި އަންހެނުންގެ ބައިވެރިވުން އިތުރުވެ، އިތުރު ހިތްވަރެއް ލިބިގެންދާނެ އެވެ.