އާސެނަލްގެ ސްޓްރައިކަރު ވިކްޓަރ ގެޔޯޜކެރޭސް ޗެންޕިއަންސް ލީގުގެ މެޗުތަކާއި ދިމާކޮށް ކޯޓަށް ހާޞިރުވާން ޖެހޭކަމަށް މީޑިޔާ ރިޕޯރޓްތައް ބުނަންފަށައިފިއެވެ. އެގޮތުން އަންނަ އަހަރު ކުރީކޮޅުގައި ޗެންޕިއަންސް ލީގުގެ ނޮކްއައުޓް ކުޅެން ހަމަޖެހިފައިވާއިރު، މިމުހިންމު މެޗުތަކެއް ގެއްލިދާނެކަމުގެ ބިރު ހީވެފައިވަނީ އެދުވަސްވަރު އޭނާގެ އަމިއްލަ ޤައުމު ކަމަށްވާ ސްވިޑަނުގައި ބާއްވަން ހަމަޖެހިފައިވާ ކޯޓި ސެޝަން ތަކަސް ހާޞިރުވާންޖެހޭތީއެވެ. މި މައްސަލައަކީ އޭނާގެ އޭޖެންޓް ހަސަން ސެޓިންކަޔާ ސުވީޑިޝް ނޫސްތަކަކާ ދެކޮޅަށް އުފުލާފައިވާ ދަޢުވާއެކެވެ.

ސްޓޮކްހޯމް ޑިސްޓްރިކްޓް ކޯޓުގައި ހިނގަމުންދާ މި މައްސަލައިގައި ގެޔޯޜކެރޭސް ހެކިބަސް ދޭން އެއްބަސްވެފައިވާކަން އޭނާގެ އޭޖެންޓްގެ ވަކީލު ޖޮއަކިމް ލުންޑްކްވިސްޓް ކަށަވަރުކޮށްދީފައިވެއެވެ. މި މައްސަލައަކީ "ފޮޓްބޯލް ސްޓޮކްހޯމް" އަދި "އެކްސްޕްރެސެން" އިން ސެޓިންކަޔާގެ އޭޖެންސީ ކުށުގެ ގޭންގުތަކާ ގުޅުން އޮތްކަމަށް ބުނެ ޝާއިޢުކުރި ލިޔުންތަކާ ގުޅޭ މައްސަލައެކެވެ.

Ad by Hajj Corporation

މި މައްސަލައިގެ ޝަރީޢަތުގެ ތާރީޚު މީޑިޔާތަކަށް ތިލަވެފައިނުވިޔަސް ރިޕޯޓްތައް ބުނާގޮތުން މި އަޑުއެހުންތައް އޮތީ ފެބުރުވަރީ މަހުގެ ކުރީ ކޮޅުގައެވެ. މިއީ އާންމުކޮށް ޗެންޕިއަންސް ލީގުގެ ގަދަ 16 ގެ ނޮކްއައުޓް ކުޅޭ ދުވަސްވަރެވެ. މީގެ އިތުރުން، 2026 ވަނަ އަހަރު ކުޅެން ހަމަޖެހިފައިވާ އެފްއޭ ކަޕްގެ މެޗުތަކުގައި ގެޔޯޜކެރޭސް އަށް ބައިވެރިނުވެވުމުގެ ފުރުސަތު އެބައޮތެވެ.

ސްޕޯޓިންގ އިން 63.5 މިލިއަން ޕައުންޑަށް އާސެނަލްއާ ގުޅުނު 27 އަހަރުގެ ސްޓްރައިކަރު މިހާތަނަށް ކުޅުނު ތިން މެޗުގައި ދެ ލަނޑު ޖަހާފައިވެއެވެ. އަދި މިދިޔަ ހަފްތާގައި ސްލޮވީނިއާއާ ދެކޮޅަށް ކުޅުނު ވޯލްޑް ކަޕް ކޮލިފައިންގ މެޗުގައި އެސިސްޓެއްވެސް ދީފައިވެއެވެ.

މި މައްސަލައާ ގުޅިގެން ގެޔޯޜކެރޭސްގެ އޭޖެންޓްގެ ގާތް ތިމާގެ މީހަކަށް ވަޅިން ޖެހުމުގެ މައްސަލައެއް މިދިޔަ މަހު ސުވީޑިޝް ފުލުހުން ތަހުގީގުކުރަން ފަށާފައިވާކަންވެސް ފާހަގަކުރެވެއެވެ.