ސެޓްޕީސް އެންމެ ގިނަ ގޯލުޖަހައިގެން މިދިޔަ ތިން ސީޒަނުގައި ޔޫރަޕުގައި އެންމެ ގިނަ ގޯލު ޖެހުމުގެ ފަޚުރު ހޯދާފައިވާ އާސެނަލް ހިލޭ ޖެހުމަކުން ބަލިވެއްޖެއެވެ. މިދިޔަ އަހަރުގެ ޕްރީމިއަރ ލީގު ޗެންޕިއަން ލިވަޕޫލާއި ދެކޮޅަށް ލިވަޕޫލު ދަނޑުގައި ކުޅުނު މިމެޗު ލިވަޕޫލުން ކާމިޔާބުކުރީ 1-0 އިންނެވެ.

400 މިލިޔަން ޑޮަލަރާއެކު ޓްރާންސްފާ މާކެޓްގައި ޔޫރަޕުގެ އެންމެ ބޮޑު ޚަރަދެއްކުރި އާސެނަލް އިން މިރޭގެ މެޗަށް ކުރިމަތިލީ އެޓީމުގެ އެންމެ މުހިންމު އެއް ކުޅުންތެރިޔާ ސަކާ އަނިޔާގެ ސަބަބުން ފުރަތަމަ 11 ގައި ނުހިމަނައެވެ. ލޮނުމަޑު ކުޅުމެއް ދެޓީމުގެ ފަރާތުން ފުރަތަމަ ހާފުގައި ފެނިގެންދިޔަ ނަމަވެސް ދެވަނަ ހާފުގައިވެސް ދެޓީމަށް ގޯލުޖަހާކަށް މާކަށް ގިނަ ފުރުސަތުތަކެއް ނުލިބުނެވެ.

Ad by Hajj Corporation

މެޗުގެ ހަމައެކަނި ގޯލު ފެނިގެންދިޔައީ 30 ޔާޑު ދުރުން ލިބުނު ހިލޭޖެހުމަަކުން ސަބޮޒްލައި އެވެ. މިރޭގެ މެޗުގައި ލިވަޕޫލުގެ ފުރަތަމަ 11 ގައި މިސީޒަނުގައި އެޓީމާ އަލަށް ގުޅުނު ކުޅުންތެރިންކަމަށްވާ ކާކޭޒް އާއި ވާރޓްޒްގެ އިތުރުން އެކިޓިކެ ހިމެނިފައިވާއިރު، އާސެނަލްގެ ޓީމުންވެސް މި ޓްރާންސްފާގައި އަލަށް ސޮއިކުރުވި 4 ކުޅުންތެރިން ހިމެނިފައިވެއެވެ. އަދި ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި އެޓީމާ އަލަށް ގުޅުނު އެޒޭ ވެސް ވަނީ ފެނިގެން ގޮސްފައެވެ. މިރޭ އެންމެ ފާހަގަކޮށްލެވޭ އެއްކަމަކީ މިސީޒަނުގައި ލިވަޕޫލާއި އަލަށް ގުޅުނު ރައިޓްބެކް ޕްރިމްޕޮންގް އަށް އަނިޔާވެފައިވުމުން، އެތަނަށް ސަބޮޒްލައި ކުޅުވުމެވެ.

މިރޭގެ މެޗާއެކު އާސެނަލް 3 މެޗުން ލިބުނު 6 ޕޮއިންޓާއެކު ތާވަލުގެ ތިންވަނައިގައި އޮތްއިރު، ލިވަޕޫލް އޮތީ ކުޅުނު ތިން މެޗުން ލިބުނު 9 ޕޮއިންޓާއެކު ތާވަލުގެ އެއްވަނައިގައެވެ.