އިނގިރޭސި ޕްރިމިއާ ލީގުގައި 14 އަހަރަށް ފަހު ފުރަތަމަ ފަހަރަށް އެންފީލްޑްގައި ލިވަޕޫލް 0-1 އިން ބަލިކޮށް، އާސެނަލުން ތާވަލުގެ އެއްވަނައަށް ޖެހިލައިފިއެވެ. މި ނަތީޖާއާއެކު މިކޭލް އާޓެޓާގެ އާސެނަލް ވަނީ މެންޗެސްޓާ ސިޓީއަށް ވުރެ ތިން ޕޮއިންޓް ކުރި ހޯދައިފައެވެ. އަދި ލިވަޕޫލް އޮތީ އެއްވަނައިގައިވާ އާސެނަލަށް ވުރެ ނުވަ ޕޮއިންޓް ފަހަތުން ފަސްވަނައިގައެވެ.

މެޗުގެ ހަމައެކަނި ލަނޑު 16 ވަނަ މިނެޓުގައި ޖަހައިދިނީ ކައި ހަވާޓްޒްއެވެ. މިއީ ޑެކްލަން ރައިސް ދިން ބޯޅައަކުން އޭނާ ކާމިޔާބުކުރި ލަނޑެކެވެ. މިއީ ޕްރިމިއާ ލީގުގައި ޖަރުމަނު ކުޅުންތެރިއަކު ޖެހި 46 ވަނަ ލަނޑެވެ. މި ލަނޑާއެކު އޭނާ ވަނީ އިލްކާއި ގުންޑޮގާން (45 ލަނޑު) ފަހަތަށް ޖައްސާލައި، ލީގުގެ ތާރީޚުގައި އެންމެ ގިނަ ލަނޑު ޖެހި ޖަރުމަނު ކުޅުންތެރިޔާގެ ޝަރަފު ހޯދައިފައެވެ.

Ad by Hajj Corporation

ލިވަޕޫލުން މެޗުގައި 17 ހަމަލާ އުފެއްދި ނަމަވެސް، އެއްވެސް ބޯޅައެއް ގޯލާ ސީދާކޮށްލެވިފައެއް ނުވެއެވެ. މިއީ 2003-04 ވަނަ އަހަރުގެ ސީޒަނަށް ފަހު އަމިއްލަ ދަނޑުގައި އެ ޓީމަށް ގޯލާ ސީދާ އެންމެ ހަމަލާއެއްވެސް ނުފޮނުވި ނިމުނު ފުރަތަމަ ލީގު މެޗެވެ. ލިވަޕޫލްގެ ފްލޯރިއަން ވިޓްޒް ފޮނުވާލި ހިލޭޖެހުން ގޯލުގެ ހުރަސް ދަނޑިއަށް އަމާޒުވިއިރު، އެލެކްސިސް މެކް އަލިސްޓާއަށް ލިބުނު ފުރުސަތު ބޭކާރުވީ ބޮލުން ގޯލަށް ވައްދާނުލެވުމުންނެވެ. އާސެނަލްގެ ވަރުގަދަ ޑިފެންސުން ވަނީ މެޗު ނިމެންދެން ލީޑު ދަމަހައްޓައިފައެވެ.