ކ. ހިންމަފުށީގައި ހުންނަ ޑްރަގް ޓްރީޓްމަންޓް އެންޑް ރިހެބިލިޓޭޝަން ސެންޓަރުގައި ފުލުހުން ހަރަކާތްތެރިވާން ފަށައިފިއެވެ.

ފުލުހުންގެ މީޑިއާ އޮފިސަރު ވިދާޅުވީ، އެ ސެންޓަރުގައި ހަރަކާތްތެރިވަމުން ދަނީ ފުލުހުންގެ ޑްރަގް އެންފޯސްމަންޓުގެ އޮޕަރޭޝަން ޓީމެއް ކަމަށެވެ. މިކަމާ ގުޅޭގޮތުން ނޭޝަނަލް ޑްރަގް އޭޖެންސީގެ ޗެއާޕާސަން ލުބްނާ ޒާހިރު ވަނީ، މި އޮޕަރޭޝަނަކީ, އެ ސެންޓަރަށް ފޯނު ވައްދައިގެން ގެންގުޅޭ ކަމުގެ މައުލޫމާތު ފުލުހުންގެ އިންޓެލިޖެންސަށް ލިބިގެން ހިންގާ އޮޕަރޭޝަނެއްކަމަށް ވިދާޅުވެފައެވެ.

Ad by Hajj Corporation

އާންމު އުސޫލުން ޕޮލިހުންނާއެކު ރިހެބް ސެންޓަރުތައް ބަލައިފާސްކުރުމުގެ އޮޕަރޭޝަންތައް ހިންގަމުން އަންނަކަން ވެސް ލުބްނާ ފާޙަގަކުރައްވާފައިވެއެވެ. އެފަދަ އޮޕަރޭޝަންތަކުގެ ބޭނުމަކީ، އެއްވެސް ސެންޓަރެއްގައި މަނާ އެއްވެސް އެއްޗެއް ގެންގުޅޭތޯ ބަލައި، އެފަދަ ތަކެތި ހޯދުން ކަމަށް އޭނާ ވިދާޅުވިއެވެ.

އަދި ފަރުވާ ހޯދަން ތަނުގައި ތިބޭ މީހުންގެ ރައްކާތެރިކަން ކަށަވަރުކުރުމަކީ ވެސް މިފަދަ އޮޕަރޭޝަންތަކުގެ ބޭނުމެއްކަމަށް ލުބްނާ ވިދާޅުވެފައިވެއެވެ.

ހިންމަފުށީގައި ހުންނަ އެ ސެންޓަރަކީ މަސްތުވާތަކެތީގެ ވަބާގައި ޖެހިފައިވާ ފަރާތްތައް އެތަނުގެ ބައިތިއްބައިގެން އިސްލާޙު ކުރުމުގެ ފަރުވާ ޕްރޮގްރާމްތައް ހިންގައިދީ، މަސްތުވާތަކެތީގެ ކިބައިން ސަލާމަތް ވެވޭނެ މަގުދައްކައިދީ، ފަރުވާގެ ވަގުތުގައި ދިމާވާ އުނދަގޫތައް ތަޙައްމަލު ކުރުމުގައި އެހީތެރިވެދިނުން އަސާސަކަށް ބަލައިގެން ހިންގާ ސެންޓަރެކެވެ.