17 ނޮވެމްބަރު 2023 ގައި އައު ސަރުކާރެއް ވެރިކަމާއި ހަވާލުވިއިރު، ބިލިއަނުން ވާރުތަވި ތަރަނީގެ ބުރަ އޮތީ ތަހައްމަލުކުރާން ޖެހިފައެވެ. އެ ބުރަ އުފުލާންޖެހިފައިވާ ދައުލަތުގެ އެކި ގުނަވަންތަކުގެ ތެރޭގައި ދައުލަތުގެ އެކި ކުންފުނިތައް ވެސް ހިމެނެއެވެ. އޭގެ ތެރެއިން ވެސް އަތޮޅު ތެރޭގެ މީހުން ދިރިއުޅޭ 90 އިންސައްތައަށްވުރެ ގިނަ ރަށްރަށުގައި ކަރަންޓާއި ފެނާއި ނަރުދަމާގެ ޚިދުމަތްދޭ ކުންފުނި، ފެނަކަ ކޯޕަރޭޝަރޭޝަން ކިރިޔާ ދިރިއޮތް ކަމެވެ. އެ ކުންފުންޏަށް ދިމާވެފައިއޮތް ދަތިހާލާއި، އެދަތި ކުރިމަތިވިގޮތުގެ ވާހަކަ އެއީ ސާފު ޙަޤީޤަތެކެވެ. އެ ކުންފުންޏަކީ ނިމުނު ސަރުކާރުން ވޯޓު ހޯދުމަށް ބޭނުންކުރި އެއް ހަތިޔާރުކަން މިކަމުގެ ފުނަށް ފީނާލުމުން އެނގި ސާފުވެދެއެވެ. ކަންކޮށްފައި އޮތްގޮތް މިނެކިރާލުމުން އެކަން ކުރި ބަޔެއްގެ ޤައުމީލޯތްބެއް، އިޚްލާސްތެރިކަމޭ މިކިޔާ ބަހުގެ ކުނޑިފުކެއްގެ މިންވަރުވެސް ހުރިތޯ އެއީ ސުވާލެކެވެ.

ވޯޓު ހޯދުމަށް ވަގުތީ ވަޒީފާތަކެއް އުފައްދާފައިވަނީ ވަޒީފާދިން މީހުންގެ މައްޗަށް ވެސް ރަހްމެއްނެތި

ވަޒީފާ ލިބުމަކީ ރަނގަޅުކަމެކެވެ. އާންމު ދިރިއުޅުން ތިޔާގިވެ، ހަމަނޭވާއެއް ލެވޭނެކަމެކެވެ. ނަމަވެސް ވަގުތީ ބޭނުމެއްގައި، އެ ދެވޭ ވަޒީފާތައް ދާއިމީ ކުރެވޭނެ މަގެއް ފެނިނެތި، ވަޒީފާ ބަހާލުމަކީ ނާއިންސާފެކެވެ. އެ ވަޒީފާ ލިބިދިން މީހުންނަށް ދެވޭ ކޮޅުކެއްސެކެވެ. 2023 ވަނަ އަހަރުގެ ރިޔާސީ އިންތިޚާބު ބޯމަތިވެގެން އައިއިރު، އެއިރުގެ ވެރިކަމުގައި އޮތް ޕާޓީން ރަށްރަށުގެ ބޮޑެތި ޢާއިލާތައް ހޯދައި، ވޯޓުގެ މުޤާބިލުގައި ފެނަކައިން ވަޒީފާތައް ދިނެވެ. ތިމާމެންގެ ފިކުރަށް ލަންބުވާލަން އިދިކޮޅަށް ވާދަކުރާ ޕާޓީތަކުގެ ރަށްރަށުގެ އެކްޓިވިސްޓުންނާއި، އެމީހުންގެ ޢާއިލާތަކަށް ވަޒީފާގެ ހަދިޔާ ދައްކައި، ޤަބޫލުކުރި ފަރާތްތަކަށް ވަޒީފާ ދިނެވެ. ނަރުދަމާ އަޅަން ހޮޅިއެއް ރަށަށް އަރުވާފައި އޮތަސް، އެ ނަރުދަމާ ނިޒާމު ބަލަހައްޓަން ކަމަށް ބުނެ މުވައްޒަފުންނެގިއެވެ. ފެން އެޅުމުގެ ކޮންޓްރެކްޓްގައި ސޮއިކުރުމާއެކު މަސައްކަތް ފެށޭނެގޮތެއް ތާރީޚެއް ނޭނގުނަސް މުވައްޒަފުންނެގިއެވެ. އައު އިމާރާތެއް އެޅުމަށް ބަޖެޓް ނެތަސްވެސް ގާފޮޅެއް ރާނާލާފައި ވަޒީފާއަށް މީހުންނެގިއެވެ.

އިސްވެ މިދެންނެވީ ކުންފުންޏަށް ފަތުއަޑުކިޔާފައި އެތައް ސަތޭކަ މުވައްޒަފުންނެއް ނެގި ފޯމިއުލާއެވެ. ތިންސަތޭކަ ހަމަވާ އާބާދީގައި ފަސް ދޮޅަސް މީހުން ފެނަކައަށް ނަގާފައި އެބަތިއްބެވެ. އެއީ ހެޔޮނިޔަތެއްގައި ކުރިކަމެއްނޫނެވެ. އަދި ދެމެހެއްޓެނި ފައިދާއެއް އެ ފަރާތްތަކަށް ހޯދައި ދިނުމަށް ކުރިކަމެއްނުމެ ނޫންމެއެވެ. ބޭނުންވެފައި އޮތީ ބަޔަކު ޤުރުބާންކޮށްގެންވެސް އައު ދައުރެއް ކާމިޔާބުކުރުންކަމަށް ކަންވެފައި އޮތްގޮތުން ބުނެވިދާނެއެވެ.

ކުންފުނި ސަލާމަތްކުރަން މުވައްޒަފުންތަކެއް ދޫކޮށްލަންޖެހުން

އައު މެނޭޖްމަންޓާއި ހަވާލުވިއިރު ފެނަކަ އޮތީ މާލީގޮތުން ފަހު ނޭވާގައެވެ. މާލީ ބޮޑު އަނދަވަޅެއްގައެވެ. ސަޕްލަޔަރުންނަށް މިލިއަނުން ދަރާފައެވެ. ކުންފުންޏަށް ގެއްލުންވާގޮތަށް ކުރަމުންދިޔަ ބޭކާރު ޚަރަދުތަކުގެ ސަބަބުން މާލީ ދަންތުރައެއްގައި ޖެހިފައެވެ. ނުހިނގާ، ނުފެށޭ އެތައް މަޝްރޫޢުއަކަށް ނެގި މުވައްޒަފުން ވެސް ސަލާމަތް ނުކުރެވޭ ހާލަތުގައެވެ. އެހެންކަމުން ކުންފުނީގެ ވެރިންނަށާއި ބޯޑަށް ޖެހުނީ އުނދަގޫ ނިންމުމެއް ނިންމާށެވެ. އެ ނިންމުން ނުނިންމައިފިނަމަ އެ ކުންފުނީގައި ޚިދުމަތް ކުރަމުން އަންނަ އެތައް ސަތޭކަ ދާއިމީ މުވައްޒަފުންނަށާއި، އެމީހުންގެ ޢާއިލާތަކަށް ވެސް އޮތީ ހިތްދަތިކަމެވެ. ދާ އޮހޮރުވައިގެން ލޯބިން ޚިދުމަތްކުރި ކުންފުނި ބަނގުރޫޓްވެ، އެމީހުންގެ ވަޒީފާތައް ވެސް ގެއްލި ދިޔުމެވެ.

18 ސެޕްޓެމްބަރު 2024 ގައި ފެނަކައިން އެ ކުންފުނީގެ ވަގުތީ މުވައްޒަފުންތަކެއް ދޫކޮށްލަންޖެހުނު ސަބަބު ނޫސްބަޔާނަކުން ސާފުކޮށްދިނެވެ. އެ ބަޔާނުގައި ބުނެފައިވާގޮތުން އެ ކުންފުނިން 2020 ވަނަ އަހަރުން ފެށިގެން އިންހައުސްކޮށް ކުރިއަށް ގެންދިޔަ ޕްރޮޖެކްޓްތަކަކީ، މާކެޓް ރޭޓަށްވުރެ އެތައް ގުނައެއް ބޮޑުކޮށް، ކުންފުންޏަށް ނުހަނު ގެއްލުވާ ގޮތަށް، ބޭނުންވާ އަދަދަށްވުރެ އިތުރަށް މުވައްޒަފުން ނަގައިގެން ކުރިއަށް ގެންދިޔަ ޕްރޮޖެކްޓްތަކެއް ކަމަށެވެ.

''ކުންފުނި މިހާރު ތަޙައްމަލް ކުރަމުން މި ދާ މާލީ ގޮންޖެހުންތަކުން އަރައިގަތުމަށާއި، ނުނިމި ދިގުލައިގެން ގޮސްފައިވާ ޕްރޮޖެކްޓްތައް، ޚަރަދު ކުޑަ އުސޫލަކުން ކުރިޔަށް ގެންދިޔުމަށްޓަކައި އެ ޕްރޮޖެކްޓްތަކަށް ނަގާފައިވާ މުވައްޒަފުން ދޫކޮށްލުމަށް ކުންފުނީގެ ބޯޑުން ނިންމާފައިވާތީ، އެ މުވައްޒަފުންނަށް ނޯޓިސް ފޮނުވަން ވަނީ ފަށާފައި'' ފެނަކައިން އެދުވަހު ބުނެފަވެއެވެ. މިގޮތުން ދޫކޮށްލެވޭ ގިނަ މުވައްޒަފުން ނަގާފައިވާ ޕްރޮޖެކްޓްތަކަކީ މަސައްކަތް ނުހިނގާ ޕްރޮޖެކްޓްތަކެއް ކަމަށް ވެސް އެ ކުންފުނިން ވަނީ ބުނެފައެވެ.

ޚަރަދުކުޑަކުރުމުގެ ފިޔަވަޅުތައް އެޅުން

13 އޯގަސްޓް 2024 ގައި ފެނަކައިން ވަނީ އެ ކުންފުނީގެ މާލީގޮތުން ވެއްޓިފައިވާ އަނދަވަޅުން ކުންފުނި ސަލާމަތް ކުރުމަށް ކުރަންޖެހޭ ގިނަ މަސައްކަތަކެއް ފަށާފައިވާކަން ހާމަކޮށްފައެވެ. އޭގެ ތެރެއިން ބައެއް ކަންކަމަށް ބަލާއިރު، ކުރިން ނުއަގުގައި ހޯދަމުން އައި ޚިދުމަތްތައް އަމިއްލައަށް ކުރަންފެށުމާއި، ކުންފުނީގެ މެޝިނަރީޒް ސަރވިސް ކުރުމަށް އިންވެސްޓް ކުރުމާއި، ޑީސަލަށް ކުރަމުންދާ ޚަރަދު އެތައް ތަނަކުން ކުޑަކުރުމުގެ ފިޔަވަޅުތައް އެޅުން ހިމެނެއެވެ. އަދި ފެނަކައިން ދެމުންގެންދާ ޚިދުމަތްތަކާ އެކަށީގެންވާ ގޮތަށް ކުންފުނި ރައިޓް ސައިޒް ކުރުމުގެ މަސައްކަތާއި، އެ ކުންފުނީގެ ސީއެސްއާރުގެ ދަށުން ކުރަމުންއައި ބޮޑެތި ހޭދަތައް ހުއްޓާލަން ނިންމިއެވެ.

އެ ކުންފުނީގެ ބޭނުންތަކަށް މުދާ އުފުލުމަށް، ދަތުރުތަކަށް މަހެއްގެ މައްޗަށް 7 މިލިއަން ރުފިޔާއަށްވުރެ މަތިން ކުރަމުން އައި ޚަރަދުކުރުން ނިމުމަކަށް ގެނެސް ޚަރަދު ކުޑަކުރުމަށް ފެނަކައިން ކުރު މުއްދަތަށް ދޯނި ކުއްޔަށް ހިފައިގެން މުދާ އުފުލުމުގެ ދަތުރުތައް ފެށުމާއި، އިންހައުސް ސޯލާ ޕްރޮގްރާމް ފަށައި، މި ޕްރޮގްރާމުގެ ދަށުން، ފެނަކައިން ޚިދުމަތް ދޭ ހުރިހާ ރަށެއްގައި ޤާއިމްކޮށްފައިވާ ފެނަކައިގެ އިންޖީނުގެތަކާއި އޮފީސް އިމާރާތްތަކުގައި ސޯލާ ހަރުކުރަން ވަނީ ނިންމާފައެވެ. މި މަޝްރޫޢުގެ ދަށުން އަހަރަކު 2.6 މިލިއަން ލީޓަރ ޑީސަލް ސަލާމަތް ކުރެވޭނެކަމަށް ފެނަކައިން ވަނީ އަންދާޒާކޮށްފައެވެ. އަދި އެ ކުންފުނީގެ ފިއުލް މޮނިޓަރިން ސިސްޓަމް ތައާރަފްކޮށް ފިއުލް ފްލޯ މީޓަރ ހަރުކުރުމަކީ ވެސް ޚަރަދުތައް ސަލާމަތްކުރުމަށް ފެނަކައިން އަޅާ ފިޔަވަޅުތަކުގެ ތެރޭގައި ހިމެނޭ ކަމެކެވެ.

މީގެ އިތުރުން ވެސް މެޝިނަރީސް، އަދި ބޮޑެތި އިކުއިޕްމަންޓް އުފުލުމަށް ބޭނުންކުރާ ހެވީ ވެހިކަލާއި ލޭންޑިން ކްރާފްޓްތައް ހޯދުމަށް ނިންމުމާއި، ސަރވިސް އަދި ޓްރެއިނިން ފެސިލިޓީއެއް ޤާއިމްކުރުންފަދަ އެ ކުންފުނީގެ މާލީ ހާލަތަށް ތަސައްލީއެއް ލިއްބައިދޭނެ ގިނަ މަސައްކަތްތަކެއް ކުރަން އެ ކުންފުނިން ނިންމިއެވެ.

ފިޔަވަޅުތަކާއެކު ތުހުމަތުތައް، ފެނުނީ ހެޔޮނިޔަތާއި ދުޅަހެޔޮ ނަތީޖާ

މުވައްޒަފެއް ވަކިކޮށްލަން ޖެހުމަކީ އެ މުވައްޒަފެއްގެ ނަފުރަތާއި އޭނާއި ގުޅިފައިވާ މީހުންގެ ހިތްނުބައިކަން އަންނާނެކަމެކެވެ. ނަމަވެސް ހަގީގަތަކީ އެކަން އެ ގޮތަށް ކުރާންޖެހުނީ އެނޫންގޮތެއް ނެތިގެން ކަމަށްވުމެވެ. އަދި އެ މުވައްޒަފުންނަށް ވަޒީފާދިން މީހުން އޮޅުވާލައި، އެވަރު ދެރައެއްގެ ތެރެއަށް ވައްޓާލާފައިވުމެވެ. މިހެންކަން ހިނގުމުން ތުހަމުތައް އިތުރުކޮށް، އިލްޒާމް އެޅުވުމުގައި ވެރިކަން ގެއްލުނު ޕާޓީގެ ބޮޑުން ހިމެނޭހެން އެމީހުންގެ އެކްޓިވިސްޓުންނާއި ކޮންޓްރޯލް މީޑިއާތައް އަތުކުރިއޮޅާލުމަކީ ތަބީއަތުގައި ވެސް އެކަން ހިނގާނެގޮތެވެ. އެހެންނަމަވެސް މުޅި މި މައްސަލައިގެ ތެރެއަށް ފީނުމުން ފެންނާން އޮތީ ފެނަކައިގެ އައު މެނޭޖްމަންޓްގެ ހެޔޮ ނިޔަތްކަން އެއީ އެނގި ކަށަވަރުވާ ކަމެކެވެ.

ކިރިޔާ ފުރާނަ ހުރި ކުންފުނި ނަގާކޮޅަށް ޖެހުމަށް އެޅި ފިޔަވަޅުތަކުގެ ނަތީޖާ ވަރަށް ފޮންޏެވެ. މި އަހަރުގެ ފުރަތަމަ 8 މަސް ދުވަހު ފެނަކައިގެ ހަރަދު 60 ޕަސެންޓަށް ކުޑަކޮށްކުންފުނި އަމާން އައްސޭރިއަކަށް ދާކަމުގެ ފެހި ސިގްނަލް އެ ކުންފުނިން ވަނީ 24 ސެޕްޓެމްބަރު 2024 ގައި ދީފައެވެ. ފެނަކަ ކޯޕަރޭޝަނަކީ އައު ސަރުކާރު ހަވާލުއިވިއިރު އެންމެ ބޮޑު ގެއްލުމެއްގައި އަދި އެންމެ ބޮޑު ދަރަނީގައި ހިންގަމުން އައި އެއް ކުންފުންޏެވެ. އެ ކުންފުނީގެ ދަރަނި 4.3 ބިލިޔަން ރުފިޔާއަށް އަރައެވެ. ނަމަވެސް ކުންފުނީގެ ވެރީންގެ އިޚްލާސްތެރި ނިޔަތާއި މަސައްކަތުން ކުންފުނި އެ ދަނީ ކޮޅަށް ޖަހަމުންނެވެ. އެ ކުންފުނީގެ މިސްރާބު ފަހި ވައިގައި ދަތުރުފެށީ ކުންފުނީގެ ވެރީންގެ ނިންމުންތަކުގެ ސަބަބުންނެވެ. ކުންފުނި ސަލާމަތްކުރުމަށް ކުޅަ ބުރަމަސައްކަތުގެ ސަބަބުންނެވެ. ގާ އުކާނީ މޭވާ އަޅާ ގަހަކަށޭ ބުނެވޭ ބީދައިން އެ ކުންފުނީގެ ވެރީންގެ ނެރޭ ނަތީޖާ ފޮނިވިވަރަކަށް، މަސައްކަތުގެ ކޮލިޓީގައި ވަރު ޖެހުނުވަރަކަށް ރަށުތެރޭ ވާހަކަ ގިނަވެދާނެއެވެ. އެހެނަސް، މައްސަލައިގެ ފެށުމާއި، ކަން ހިނގަމުންދާ ގޮތާއި، ހިސާބުއަކުރުން އަތުރާލި ނަތީޖާއިން ފެންނަނީ އިޚްލާސްތެރި ހެޔޮނިޔަތްނޫން އެހެންއެއްޗެއްކަމަށް ދަށްނަވާކަށް ނޭނގެއެވެ.