ލަލީގާގެ މެޗްޑޭ ހަތަރެއްގައި ބާސެލޯނާ އާއި ވެލެންސިއާ ދެމެދު ކުޅެން ހަމަޖެހިފައިވާ މެޗު، މިހާރު މަރާމާތުކުރަމުންދާ ސްޕޮޓިފައި ކެމްޕް ނޫގެ ބަދަލުގައި ޔޯހަން ކްރޯއިފް ސްޓޭޑިއަމްގައި ކުޅުމަށް ލަ ލީގާއިން ހުއްދަދީފިއެވެ.

ޖުއާން ގެމްޕަރ ސްޕޯޓްސް ސިޓީގައި ހުންނަ، 6،000 މީހުންގެ ޖާގައިގެ މި ސްޓޭޑިއަމް ވަނީ ލަ ލީގާގެ އޮފިޝަލުން ޗެކްކޮށް، ބައެއް ޓެކްނިކަލް ބަދަލުތަކާއެކު މެޗު ކުޅުމަށް އެކަށީގެންވާ ތަނެއްކަމަށް ކަނޑައަޅާފައެވެ. މި ގޮތުން ވީއޭއާރު ބޭނުންކުރުމަށް ކެމެރާތައް ހަރުކުރުމާއި، ފައިބަރ އޮޕްޓިކް ގުޅުން ޤާއިމްކުރުމަށްފަހު އަލުން ޗެކްކުރުމަށް ވަނީ ހަމަޖެހިފައެވެ.

Ad by Hajj Corporation

އާންމު ގަވާއިދުތަކުގައި ރަސްމީ މެޗުތައް ކުޅުމަށް މަދުވެގެން 8،000 މީހުންގެ ޖާގަ އޮންނަންޖެހޭ ކަމަށް ބަޔާންކޮށްފައި ވީނަމަވެސް، ކެމްޕް ނޫ މަރާމާތުކުރަމުންދާތީ މިއީ ޚާއްސަ ހާލަތެއްގެ ގޮތުގައި ބަލައި، ލަ ލީގާއިން ވަނީ މިފަހަރު އިސްތިސްނާއެއް ދީފައެވެ.

ބާސެލޯނާގެ އަންހެނުންގެ ޓީމުވެސް އެ ހަފްތާގައި ޖޮހާން ކްރޯއިފް ސްޓޭޑިއަމްގައި މެޗެއް ކުޅޭނެއެވެ. ނަމަވެސް އެ މެޗު ކުޅޭނީ ހުކުރު ދުވަހު މެންދުރު 12:00 ގައި ކަމަށްވާތީ، ފިރިހެނުންގެ މެޗާ ދެމެދު 48 ގަޑިއިރަށްވުރެ ގިނަ ވަގުތު އޮންނާނެއެވެ.

މިއާއެކު، ސްޕޮޓިފައި ކެމްޕް ނޫ އަލުން ހުޅުވުމުގެ މަސައްކަތް ބާސެލޯނާގެ ބޯޑުން ވަރަށް ބާރަށް ކުރިއަށް ގެންދެއެވެ. މަރާމާތުގެ ފުރަތަމަ މަރުހަލާގައި 27،000 ސަޕޯޓަރުންނަށް ޖާގަ ދެވޭނެ ކަމަށް ލަފާކުރެވުނު ނަމަވެސް، އަދި ސްޓޭޑިއަމް ހުޅުވުމަށް ބޭނުންވާ ހުއްދަތައް ލިބިފައެއް ނުވެއެވެ. މިދިޔަ ސީޒަނުގައި ބާސެލޯނާ ބޭނުންކުރި ލުއީސް ކޮމްޕަނީސް އޮލިމްޕިކް ސްޓޭޑިއަމް (މޮންޖުއިކް) ގައި ސެޕްޓެމްބަރު 12 ގައި ޕޯސްޓް މެލޯންގެ ކޮންސަޓެއް އޮންނާތީ، އެތަނުގައިވެސް މެޗު ނުކުޅެވޭނެއެވެ.