ކާބޯތަކެތީގެ ހިދުމަތްދޭ ތަންތަނުގެ ސާފުތާހިރުކަން ބެލުމަށް މާލެ ސަރަހައްދުގައި އިންސްޕެކްޝަނެއް ފަށަން މޯލްޑިވްސް ފުޑް އެންޑް ޑްރަގު އޮތޯރިޓީ (އެމްއެފްޑީއޭ) އިން ތައްޔާރުވެއްޖެ އެވެ.

އެ އިދާރާއިން ބުނީ ކާބޯތަކެތީގެ ޚިދުމަތްދޭ ތަންތަނުގެ ސާފުތާހިރުކަމުގެ މިންގަނޑުތައް ދެމެހެއްޓުމަށް ބާރުއެޅުމަށާއި އޮތޯރިޓީގައި ރަޖިސްޓްރީނުކޮށް ކާބޯތަކެތީގެ ޚިދުމަތްދޭ ފަރާތްތަކުގެ މަޢުލޫމާތު އެއްކުރުމަށް 21 ސެޕްޓެންބަރު 2025 އިން 31 ސެޕްޓެންބަރު 2025 އަށް، މާލެ ސަރަހައްދުގައި ޚާއްސަ އިންސްޕެކްޝަނެއް ކުރިއަށް ގެންދިއުމަށް ހަމަޖެހިފައިވާކަމަށެވެ. މި އިންސްޕެކްޝަން ކުރިއަށް ގެންދަނީ އެ އޮތޯރިޓީއާއި، މާލޭ ސިޓީ ކައުންސިލް އަދި ހައުސިންގ ޑިވެލޮޕްމަންޓް ކޯޕަރޭޝަންއާ ގުޅިގެންނެވެ.

ކާބޯތަކެތީގެ ޚިދުމަތްދޭ ތަންތަނަކީ ކާބޯތަކެތީގެ ރައްކާތެރިކަމުގެ ޤާނޫނުގެ ދަށުން އެ އޮތޯރިޓީގައި ރަޖިސްޓްރީކުރަން ލާޒިމްކޮށްފައިވާ ތަންތަނެވެ. އެހެންކަމުން، ރަޖިސްޓްރީނުކޮށް ޚިދުމަތްދޭ ތަންތަން ބަންދުކުރުމަށް އަދި މިފަދަ ތަންތަނުގެ މަޢުލޫމާތު މި އިންސްޕެކްޝަންގެ ތެރެއިން އާންމުކުރުމަށް ވަނީ ނިންމާފައެވެ.