މިހާރުން މިހާރަށް މުސްލިމް ހުރިހާ ގައުމަކުން އިސްރާއީލާ ގުޅުން ކަނޑާލުމަށް އިރާނުގެ ރައީސް މަސްއޫދު ޕެޒެޝްކިއަން ގޮވާލައްވައިފިއެވެ.

ރައީސް މަސްއޫދު ވިދާޅުވީ އިސްރާއީލުން ޤަޠަރަށް ދިން ހަމަލާއަކީ ބައިނަލްއަޤްވާމީ ހުރިހާ ޤާނޫނުތަކާއި ހަމަތަކާ ޚިލާފަށް ސީދާ ސުލްހައަށް ދިން ހަމަލާއެއްކަމަށެވެ. ފަލަސްތީނުގެ އިތުރުން ލުބުނާނާއި ސީރިއާއާއި ޤަތަރާއި އިރާނާއި ޔަމަނާއި ޢިރާޤަށް ޔަހޫދީން މިހާރު ހަމަލާތައް ދެމުންދާކަމަށް އިރާނުގެ ރައީސް ވިދާޅުވިއެވެ.

Ad by Hajj Corporation

އިސްރާއީލުން ހިންގާ ޖަރީމާތަކަށް އެމެރިކާ އާއި ހުޅަނގުގެ ބައެއް ގައުމުތަކުން ދޭ ތާއީދަށް ރައީސް މަސްއޫދު ފާޑުވިދާޅުވިއެވެ.

އިސްލާމީ ގައުމުތަކުގެ ސިޔާސީ، އިޤްތިޞާދީ، ސަގާފީ އަދި އިޖުތިމާޢީ އެއްބައިވަންތަކަން މިހާރަށް ވުރެ ވަރުގަދަކޮށް ޔަހޫދީންނާ އޮންނަ ހުރިހާ ގުޅުމެއް މިހިނދުން މިހިނދަށް ކަނޑާލުމަށް މުސްލިމް ހުރިހާ ގައުމުތަކަށް އިރާނުގެ ރައީސް ވަނީ ގޮވާލައްވާފައެވެ.

ރައީސް މަސްއޫދު ފާހަގަކުރެވެނީ ޔަހޫދީންނާއި އަދި ހުޅަނގުގެ ގައުމުތަކަށް ހަރުކަށިކަމާއެކު ރައްދުދެއްވައި ބޭފުޅެއްގެ ގޮތުގައެވެ.

ޢައިރު ގާނޫނީ ސަހުޔޫނީ ދައުލަތުން ގަތަރުގެ ވެރިރަށް ދޯހާއަށް ހަމަލާދިނީ މި މަހުގެ 9 ވަނަ ދުވަހުއެވެ.

ޔަހޫދީން ބުނީ އެ ހަމަލާ ދީފައިވަނީ ފަލަސްތީނުގެ މިނިވަންކަމަށް ޖިހާދުކުރަމުން އަންނަ ހަމާސްގެ ލީޑަރޝިޕްގެ އިސް ފަރާތަކަށް އަމާޒުކޮށްކަމަށެވެ.

ޔަހޫދީންގެ ހަމަލާ ކުށްވެރިކޮށް ގަތަރުން ބުނީ ޔަހޫދީންގެ ހަމަލާއަކީ ބައިނަލްއަޤްވާމީ ޤާނޫނުތަކާ ޚިލާފަށްދިން ހަމަލާއެއްކަމަށެވެ. އަދި ޤަޠަރުގެ ރައްޔިތުންނާއި، އެޤަޢުމުގައި ދިރިއުޅޭ މީހުންގެ ސަލާމަތާއި ރައްކާތެރިކަމަށް ޔަހޫދީން އަރައިގެންފައިވާކަމަށް ގަތަރުންވަނީ ބުނެފައެވެ.

މި ހަމަލާ ތަހުގީގުކުރާނެކަމަށްވެސް ގަތަރުންވަނީ ބުނެފައެވެ.

ގަތަރުގެ ވެރިރަށް ދޯހާއަކީ ފާއިތުވި ހަފްތާތަކުގައި ޔަހޫދީން ހަމަލާދިން 6 ވަނަ އަރަބި އިސްލާމީ ގައުމެވެ.