އަނިޔާވެރި ދުޝްމިނުންގެ ކުރިމަތީގައި ފުރާނައަށްޓަކައި ހަނގުރާމަކުިރ ނަމަވެސް، އިސްރާއީލުން ސުލްޙަ ހޯދުމަށް ބޭނުންވާ ކަމަށް އެ ގައުމުގެ ބޮޑު ވަޒީރު ބެންޖަމިން ނަތަންޔާހޫ ވިދާޅުވެއްޖެއެވެ.

އދ. ގެ އާންމު މަޖިލީހުގައި ތަގުރީރު ކުރައްވަމުން ނަތަންޔާހޫ ވިދާޅުވީ، އިސްރާއީލު އޮތީ ހަނގުރާމައެއްގައި ކަމަށާއި، އެ ހަނގުރާމަ ކުރަނީ އެ ގައުމުގެ ހައްގުގައި ކަމަށެވެ. އަދި އެ ހަނގުރާމަތައް ކުރަނީ އިސްރާއީލް އާއި އެގައުމުގެ ރައްޔިތުން ނައްތާލަަން ބޭނުންވާ ދުޝްމަނުންނާ ކަމުގައި ނަތަންޔާހޫ ވިދާޅުވިއެވެ.

މި އަނިޔާވެރި މީހުންގެ ކިބައިން ދިފާއުވާން ޖެހޭ. އަހަރުމެންގެ ދުޝްމަނުން ހަމައެކަނި ބޭނުންވަނީ އިސްރާއީލް ހަލާކުކޮށްލާކަށެއް ނޫން. އެމީހުން ބޭނުންވަނީ އަހަރުމެންގެ ނަސްލު ނައްތާލައި، އަނިޔާވެރިކަމާއި ބިރުވެރިކަމުގެ ތެރެއަށް އަހަރުމެން އަނބުރާ ގެންދަން، - އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ

ނަތަންޔާހޫ އޭނާގެ ތަގުރީރުގައި ވަނީ، އިސްރާއީލުން ޣައްޒާ އަދި ލެބަނޮންއަށް ދެމުންދާ ހަމަލާތަކުގެ ޒިންމާ، އީރާނުން ނަގަން ޖެހޭނެ ކަމުގައި ވިދާޅުވެފައެވެ. އެގޮތުން ހަމާސްއާ ދެކޮޅަށް ކުރާ ހަނގުރާމަ ވެސް، "އީރާނުން ފަންޑު ކުރާ ހަމާސް" އިން އަމާންދީ، ހަމާސް އިން ރަހީނު ކުރި މީހުން އަނބުރާ ރައްދުކުރުމުން ހަނގުރާމަ ހުއްޓާލާނެ ކަމުގައި ނަތަންޔާހޫ ވިދާޅުވިއެވެ.

އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ، އދ. ގެ އާންމު މަޖިލީހުގައި ތަގުރީރު ކުރައްވަނީ -- ފޮޓޯ/ރިއުޓާސް

ނަތަންޔާހޫ ވިދާޅުވި ގޮތުގައި، އެ ހަނގުރާމަތަކުން އިސްރާއީލް ދަނީ މޮޅުވަމުންނެވެ.

މި އެސެމްބްލީއަށާއި މި ހޯލުން ބޭރުގެ ދުނިޔެއަށް އިތުރު މެސެޖެއް އެބައޮތް: އިސްރާއީލުން މި ދަނީ އެ ހަނގުރާމަ ކާމިޔާބު ކުރަމުން، - އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ

ނަތަންޔާހޫ އެފަދައިން ވިދާޅުވިއިރު، ހަނގުރާމަ ހުއްޓާލުމަށް އެހި ބުރާސްފަތި ދުވަހު ހިޒްބުﷲ އިން އިސްރާއީލަށް ހުށަހެޅި ހުށަހެޅުން ނަތެންޔާހޫ ވަނީ ގަބޫލުކުރުމަށް ދެކޮޅު ހަދާފައެވެ. އެއާއެކު އިސްރާއީލުން ލެބަނޮންއަށް ދިން ޙަމަލާގައި، 500 އަށް ވުރެ ގިނަ އާންމުން މަރުވެފައިވެއެވެ.

އަދި މިދިޔަ އަހަރުގެ އޮކްޓޯބަރު މަހުގެ ހަތްވަނަ ދުވަހުން ފެށިގެން ފަލަސްތީނުގެ ޙަމާސް އިން ވެސް އިސްރާއީލަށް، ހަނގުރާމަ ހުއްޓާލުމަށް އެތައް ފަހަރަކު ހުށަހެޅުންތައް ހުށަހެޅިއެވެ. އޭގެ ތެރޭގައި ރަހީނުން ބަދަލުކުރުމަށް ވެސް ހަމާސް އިން ހުށަހެޅި ނަމަވެސް، އެ ހުށަހެޅުންތައް ގަބޫލުކުރަން ވެސް ނަތެންޔާހޫ ވަނީ ދެކޮޅު ހަދާފައެވެ. އެ ހަނގުރާމައިގައި އިސްރާއީލުން މިހާތަނަށް ވަނީ ފަލަސްތީނުގެ 41،000 އަށް ވުރެ ގިނަ މީހުން މަރައި، މުޅި ޣައްޒާ ބިމާ ހަމަކޮށްފައެވެ.