ބާސެލޯނާ އަދި ސްޕެއިންގެ ޒުވާން ކުޅުންތެރިޔާ ލަމީން ޔަމާލް މިއަދު އިޢުލާން ކުރަން ހަމަޖެހިފައިވާ ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާއަށް ދޭ އެންމެ ޝަރަފުވެރި އެވޯޑް 'ބެލަންޑިއޯ' ބަލައި އޭނާގެ އާއިލާގެ މީހުންނާއި ރައްޓެހިންނާއެކު ޖުމްލަ 20 މީހުން ޕެރިހަށް ދާން ފުރައިފިކަމަށް ނޫސްތަކުން ރިޕޯޓްކުރަން ފަށައިފިއެވެ.

ގިނަބަޔަކުޤަބޫލުކުރާގޮތުގައި ޔަމާލް މިއެންމެން ގޮވައިގެން ޕެރިހަށް ދާން ނިންމާފައިވަނީ މިއަހަރުގެ ބެލަންޑިއޯ ލިބޭނެކަން ޔަޤީންވުމުންނެވެ. ނަމަވެސް އަނެއްބައި ރިޕޯޓްތަކުން ބުނަނީ މިއެވޯޑް މިފަހަރު ލިބޭ ކުޅުންތެރިޔާ އެއްވެސް ފަރާތަކަށް އަދި ނޭނގޭނެކަމަށާއި، އެއީ ސަޕްރައިޒް އެއް ކަމަށެވެ.

Ad by Hajj Corporation

18 އަހަރުގެ މި ޒުވާން ކުޅުންތެރިޔާ މިރޭ ޝަޓެލެޓް ތިއޭޓަރުގައި ބޭއްވޭ ރަސްމިއްޔާތުގައި ބައިވެރިވާއިރު، ޔަމާލް އާއެކު މިއެވޯޑް އަށް އެންމެ ވާދަކުރާ ކުޅުންތެރިންނަކީ ބާސެލޯނާގެ ރަފީނިޔާ އާއި ޕީއެސްޖީގެ އުސްމާން ޑެމްބެލޭއެވެ.

މުންޑޯ ޑިޕޯޓިވޯގެ ރިޕޯޓުތަކުން ހާމަކުރާ ގޮތުގައި ޔަމާލް މި ރަސްމިއްޔާތަށް ޚާއްސަ ތައްޔާރީތަކެއް ވަނީ ކޮށްފައެވެ. އޭނާއާއެކު އޭނާގެ އާއިލާގެ 20 މެންބަރުން ބައިވެރިވާނެއެވެ. އަދި އެންމެން ޑޮލްޗެ އެންޑް ގަބާނާއިން ފަރުމާކޮށްފައިވާ ޚާއްސަ ހެދުން ލައިގެން ތިބޭނެއެވެ.

2024/25 ގެ ސީޒަންގައި ޔަމާލް ވަނީ ބާސެލޯނާއަށް ފާހަގަކޮށްލެވޭ ކުޅުމެއް ދައްކާފައެވެ. އޭނާ ވަނީ 55 މެޗެއްގައި ބައިވެރިވެ، 18 ލަނޑު ޖަހައި، 25 އެސިސްޓް ހަދާފައެވެ. އޭނާގެ މި ހިއްސާ ކެޓަލާން ޓީމަށް ލަ ލީގާ އަދި ކޯޕާ ޑެލް ރޭ ބާސެލޯނާއަށް ހޯދައިދިނުމުގައި މުހިންމު ދައުރެއް އަދާކުރިއެވެ.

ޔަމާލްގެ މޮޅު ސީޒަނެއް ނިންމާލި ނަމަވެސް، މި ވަގުތު ޑެމްބެލޭ އަކީ މި އެވޯޑު ކާމިޔާބު ކުރުމަށް އެންމެ ބޮޑު ފުރުސަތު އޮތް ކުޅުންތެރިޔާ ކަމަށް ބެލެވެއެވެ. ނަމަވެސް ޔަމާލް އޭނާގެ އާއިލާއާއެކު މި ރަސްމިއްޔާތުގައި ބައިވެރިވުމަށް ތައްޔާރުވުމުން ދައްކުވައިދެނީ ފުޓްބޯޅައިގެ އެންމެ ބޮޑު އެވޯޑު ކާމިޔާބު ކުރުމުގެ ވަރުގަދަ އުއްމީދެއް އޮތްކަމެވެ.

ޔަމާލް މި އެވޯޑު ކާމިޔާބުކޮށްފިނަމަ، މި ތާރީޚީ ކާމިޔާބީ ފާހަގަކުރުމަށް ޕެރިހުގައި ޕްރައިވެޓް ފާހަގަކުރުމެއް ބޭއްވުމުގެ ޕްލޭންތައް ވެސް ވަނީ ރާވާފައެވެ.