ލުބްނާނުގައި ހަރަކާތްތެރިވާ ހެޒްބުﷲ އިން، އެ ޖަމާއަތުގެ ލީޑަރު ސައްޔިދު ނަސްރުﷲ އަވަހާރަވެއްޖެކަން ކަށަވަރުކޮށްދީފިއެވެ.

ހެޒްބުﷲ އިން މިއަދު ނެރުނު ބަޔާނެއްގައި ބުނީ، ޔަހޫދީން އިއްޔެ ދިން ބާރުގަދަ ޙަމަލާގައި، އެ ޖަމާއަތުގެ ލީޑަރު ނަސްރުﷲ އަވާހަރަވެފައިވާ ކަމަށެވެ. އަދި އެކަމުގެ ހިތާމަ އެ ޖަމާއަތުން ވަނީ ފާޅުކޮށްފައެވެ.

އެ ބަޔާނުގައި އެ ޖަމާއަތުން ވަނީ ނަސްރުﷲ އެ ޖަމާއަތް ކުރިއެރުވުމަށް ކުރެއްވި މަސައްކަތްތައް ފާހަގަކުރައްވާފައެވެ.

ނަސްރުﷲ އަވާހަރަވެފައިވާކަން ހިޒްބުﷲ އިން އިއުލާންކުރުމުގެ ކުރިން، ޔަހޫދީ ދައުލަތް އިސްރާއީލުން އެކަން ވަނީ އިއުލާންކޮށްފައެވެ.

މިއީ ޣައްޒާގެ ހަނގުރާމަ ފެށި ފަހުން، އިސްރާއީލާ ދެކޮޅަށް ހަނގުރާމަ ކުރާ ޖަމާއަތެއްގެ ލީޑަރަކު، އިސްރާއީލުން ޝަހީދުކުރި ދެވަނަ ފަހަރެވެ. އެގޮތުން މިދިޔަ ޖުލައި މަހު ޣައްޒާގައި ހަރަކާތްތެރިވާ ހަމާސްގެ ލީޑަރު އިސްމާއީލް ހަނިއްޔާ ވެސް އިސްރާއީލުން ވަނީ އަވަހާރަކޮށްލާފައިއެވެ.