އިސްރާއީލުގެ އަސްދޫދު ސިޓީގައި ހުރި ކަނޑުގެ ސިފައިންގެ މަރުކަޒަކަށް ހަމަލާދީ، އެންމެ ފަހުގެ ހަތިޔާރު ބޭނުންކޮށްގެން އޮޕަރޭޝަނެއް ހިންގާފައިވާ ކަމަށް އީރާނުގެ ތާއީދު އޮންނަ ލުބުނާނުގެ ހަތިޔާރު އެޅި ޖަމާއަތް ހިޒްބުﷲ އިން ބުނެފިއެވެ.

މިއީ އިޒްރޭލުން ބެއިރޫތަށް ދިން ވައިގެ ހަމަލާތަކުގައި 29 މީހުން ޝަހީދުވުމާ ގުޅިގެން ބަދަލު ހިފުމުގެ ގޮތުން ހިޒްބުالله އިން އިޒްރޭލަށްދިން ހަމަލާތަކެކެވެ.

އިސްރާއީލުގެ އަސްކަރިއްޔާއިން ރިޕޯޓްކޮށްފައިވާ ގޮތުގައި ތެލް އަވީވް ހިމެނޭ ގޮތަށް އިސްރާއީލުގެ މެދުތެރެއާއި އުތުރުގެ ސަރަހައްދުތަކުގައި ވައިގެ ހަމަލާތަކުގެ އަޑު އިވިފައިވެއެވެ.

އިސްރާއީލުގެ އުތުރަށް ފޮނުވާލި ގިނަ އަދަދެއްގެ މިސައިލް ހުއްޓުވާފައިވާ ކަމަށް އަސްކަރިއްޔާއިން ބުނެފައިވާއިރު، ލުބުނާނުން 250 މިސައިލް ފޮނުވާލާފައިވާ ކަމަށް ވެސް އަސްކަރިއްޔާއިން ބުނެއެވެ.

ފަހުން އިސްރާއީލު ސިފައިންގެ ރޭޑިއޯއިން ރިޕޯޓްކޮށްފައިވާ ގޮތުގައި ލުބުނާނުން 340 މިސައިލް ފޮނުވާލާފައިވެއެވެ.

އެ ހަމަލާތަކުގައި ގާތްގަޑަކަށް 11 މީހަކު ޒަޚަމްވެފައިވާއިރު، އޭގެ ތެރޭގައި ހާލު ސީރިއަސް މީހަކުވެސް ހިމެނޭ ކަމަށް މެޑިކަލް އެޖެންސީތަކުން ބުނެއެވެ.

އިސްރާއީލުން ދިން ހަމަލާތަކުގައި ލުބުނާނުގައި 3،500 އަށް ވުރެ ގިނަ މީހުން މަރުވެފައިވާއިރު، ހަނގުރާމައިގެ ސަބަބުން ގާތްގަނޑަކަށް 1.2 މިލިއަން މީހުން ނުވަތަ ލުބުނާނުގެ އާބާދީގެ ތިންބައިކުޅަ އެއްބައި މީހުން ވަނީ ގެދޮރު ދޫކޮށް ގޮސްފައެވެ.