ދެކުނު ލުބުނާނުގައި އާންމު ރައްޔިތުންގެ މުދަލާއި ދަނޑުބިންތަކަށް އިޒްރޭލުގެ ސިފައިން ގަސްތުގައި ދިން ގެއްލުންތައް ހަނގުރާމައިގެ ކުށްތަކުގެ ގޮތުގައި ތަހުގީގު ކުރަންޖެހޭ ކަމަށް ބައިނަލްއަގުވާމީ އިންސާނީ ހައްގުތަކުގެ ޖަމިއްޔާ އެމްނެސްޓީ އިންޓަނޭޝަނަލްއިން ބުނެފިއެވެ.

"ނޯވެއަރ ޓު ރިޓާން: އިސްރާއީލްސް އެކްސްޓެންސިވް ޑިސްޓްރަކްޝަން އޮފް ސަދަން ލެބަނަން" ގެ ނަމުގައި އެމްނެސްޓީން ނެރުނު އައު ރިޕޯޓުގައި ފާހަގަކޮށްފައިވާ ގޮތުގައި، އިޒްރޭލުގެ ސިފައިން ވަނީ 24 ކައުންސިލް ސަރަހައްދެއްގައި ހުރި ގެތަކާއި، މިސްކިތްތަކާއި، ގަބުރުސްތާނުތަކާއި، މަގުތަކާއި، ޕާކުތަކާއި ކުޅިވަރު ކުޅޭ ބިންތައް ގޮވާ ތަކެއްޗާއި ބުލްޑޯޒަރު ބޭނުންކޮށްގެން ހަލާކުކޮށްލާފައެވެ.

Ad by Hajj Corporation

އެމްނެސްޓީން ބުނާ ގޮތުގައި 2024 ވަނަ އަހަރުގެ އޮކްޓޯބަރު 1 އިން 2025 ވަނަ އަހަރުގެ ޖަނަވަރީ 26 އާ ދެމެދު 10،000 އަށްވުރެ ގިނަ އިމާރާތަށް ބޮޑެތި ގެއްލުންތައް ލިބި، ނުވަތަ މުޅިން ހަލާކުވެފައިވެއެވެ. މި ގެއްލުންތަކުގެ ބޮޑު ބައެއް ދީފައިވަނީ އިޒްރޭލާއި ހިޒްބުﷲ ދެމެދު 2024 ވަނަ އަހަރުގެ ނޮވެމްބަރު 27 ގައި ހަނގުރާމަ ހުއްޓާލުމުގެ އެއްބަސްވުމެއްގައި ސޮއިކުރުމަށްފަހުގައެވެ.

"އިޒްރޭލުގެ ސިފައިން ދެކުނު ލުބުނާނުގެ އާންމުންގެ ގެތަކާއި، މުދަލާއި، ބިންތަކަށް ދިން ގެއްލުމުގެ ސަބަބުން އެތައް ސަރަހައްދެއްގައި ދިރިއުޅެން ނުކުޅެދޭ ހާލަތަކަށް ގޮސް، އެތައް ބައެއްގެ ދިރިއުޅުން ބަރުބާދުވެގެން ގޮސްފައިވޭ،" އެމްނެސްޓީގެ ސީނިއާ ޑިރެކްޓާ ފޯ ރިސާޗް، އެޑްވޮކަސީ، ޕޮލިސީ އެންޑް ކެމްޕެއިންސް އެރިކާ ގުއެވާރާ ރޯސަސް ވިދާޅުވިއެވެ.

އެމްނެސްޓީން ވަނީ އިޒްރޭލުން ގަސްތުގައި ޢަމަލުތައް ހިންގާފައިވާ ކަމަށް ފެންނަ ނަމަ، އެކަންކަން ހަނގުރާމައިގެ ކުށްތަކުގެ ގޮތުގައި ތަޙުޤީގުކުރަން ޖެހޭ ކަމަށް ފާހަގަކޮށްފައެވެ.

އެމްނެސްޓީން އެފަދައިން ބުނެފައިވާއިރު، އިއްޔެ އިޒްރޭލުން ޣައްޒާގެ ޚާން ޔޫނިސްގައި ހުންނަ ނަސްރް ހޮސްޕިޓަލަށް ދިން ހަމަލާގައި 21 މީހުން ޝަހީދުޮށްލީ އެކްސިޑެންޓަކުން ނޫން ކަމަށާއި، އެއީ ގަސްތުގައި ދިން ޙަމަލާއެއް ކަމަށް ބެލްޖިއަމްގައި މަސައްކަތްކުރާ ހިންދު ރަޖަބް ފައުންޑޭޝަނުން ވެސް ވަނީ ބުނެފައެވެ.

އެގޮތުން އެ ފައުންޑޭޝަނުން ނެރުނު ބަޔާނުގައި ބުނީ، ހަމަލާގެ ވީޑިއޯ ހެކިތައް ދައްކާ ގޮތުން މި ހަމަލާގައި ބޭނުންކޮށްފައިވަނީ "ގައިޑެޑް މިސައިލް" އެއް ކަމަށާއި، ޓޭންކެއް ނޫން ކަމަށެވެ.  މި ބާވަތުގެ މިސައިލްތަކަކީ އިޒްރޭލުން ބޭނުންކުރާ ޕްރެސިޝަން-ގައިޑެޑް ހަތިޔާރު ސިސްޓަމްތަކާ އެއްގޮތް އެއްޗެހި ކަމަށް އެ ޖަމްޢިއްޔާއިން ވަނީ ފާހަގަކޮށްފައެވެ.

އެ ޖަމްޢިއްޔާއިން އިތުރަށް ބުނެފައިވަނީ މި ހަމަލާއާ ގުޅޭ ޓެކްނިކަލް ރިޕޯޓެއް ތައްޔާރުކުރަމުންދާ ކަމަށާއި، މި ހަމަލާގައި ޒިންމާވާ ފަރާތްތަކާ ދެކޮޅަށް ކުރިއަށް އޮތް ތަނުގައި ޤާނޫނީ ފިޔަވަޅު އަޅާނެ ކަމަށެވެ.